قضية لم الشمل

البارت واحد وعشرون

السلام عليكم ورحمة الله وبركاته
اسعد الله مساءكم يا احبتي المتابعين ❤️
اعتذر عن التأخير بسبب الخلل الناتج من ضعف شبكة نت

#الكاتبة_نهى_الحسون
#قضية_لم_الشمل

جلال
بس سمعت بسيرة ابو بهاء جسمي كله ارتعد وتذكرت ايامي السودة وياهم

مهيمن والبنات انتبهوا علية
مهيمن.. شكو شبيك جلال

باوعت لمصطفى وخالي يمه كال بخوف
.. اكلك جلال هذولي بس لاهم نفسهم الي خطفوك من فترة وعذبوك

كلام خالي كان مثل القنبلة وكعت على راسي
الكل التفت يباوع علية متفاجيء احس بروحي انحشرت بزاوية

ردت اغير الموضوع واخلي خالي يحجي بغير شي
.. لا خالي هذول غير جماعه
وباوعت لمصطفى الي كان بعده واكف يم خالي
.. اكول مصطفى وين كلتلهم مسافر

.. كلتلهم سافر لبغداد
غيرت الموضوع
.. اي زين سويت
اكلك انت جاي تدرس لو بعدك

حسيت على مهيمن انسحب ونزل جوة وريم ونور
خلوني لوحدي وراحوا. نزلوا ورة مهيمن

انهيت الاتصال من خالي واتصلت على سلون اتصل عليه ما يجاوب

باوعت للساعة اهووو هسة هذا اكيد نايم بهيج وقت بسابع حلم
هذا مثل الدجاج ينام من وكت.
ان شاء الله باجر اتصل عليه واحذره منهم خاف يرحون عليه

ظليت احوم بالسطح كان الجو بي نسمة هوى طيبة
شكله الشتا عالابواب شكد اكره الشتا كئيب ويذكرني بلون حياتي

دخنت جيكارتين اريد شوية اهديء ماكو
الي شفته على ايد هذولي الانذال
مستحيل اكدر انساه كلما يمر ذكرهم على بالي ينقبض كلبي.
هو انا ما صدكت اخلص منهم وكلت واخيراً
ارتاحيت وبديت اشوف رحمة الله