مياس قلب الشهم

مقتطف

#مياس_قلب_الشهم

للكاتبه #لبنى_الموسوي

تهمشت حتى تهشمت
سقطت ارضاً ثم نهضت

مضيت بطريقي مسرعتاً واذا بي اياك التقيت

منقذي .. بطلي .. فارس احلامي .. شهمي

كل تلك ،، انا لك ناديت

اتجهت نحوك ميلاً وانت بخطواتك الى الخلف اميالاً ابتعدت

وقفت امامك وبقلبي احببت
رفعت لي يدك وبعقلك رفضت

_____________________

الساعه ثنتين الظهر تموز والشمس تضرب بالگلب قبل الراس

رفعت ايدي حتى احمي بيها وجهي وعيوني من الشمس العاموديه واشعتها القويه

اتلفت يمنه ويسره الشارع فارغ ما تلگه بي الطير الطاير

المحل بعيد عن بيتنه لان هو الوحيد اليفتح بهالفحيمه

الطريق طويل وميقبل يخلص ،، مجبوره اروحله واشتري منه اللبن لان لو رجعت وما مشتريته معناها انام بلا اكل لباچر الصبح هاي من غير المسبه والضرب الراح اكله من سميحه

مياس.. يا ربي كون بهاي الشمس التخلي الدجاجه تستوي بخمس دقايق تسمط جد جد سميحه وتريحني منها

امشي وادردم ويا روحي واحس العرگ يگطر من كل مكان بجسمي وشعري لزگ على رگبتي وحتى النفس كوه اجره من التعب

فجأه شخطت سيارة گدامي ونزلو منها ٣ شباب

عاينت عليهم مبين من شكولاتهم سرسريه ومو راحه

- وين رايحه الحلوه بهالظهريه

مياس.. وانت شعليك طايح الحظ

- احترمي نفسچ ولچ والزمي السانچ من تحچين ويا المعلم

مياس.. معلم عليكم وعلى روحه مو عليه ،، يلا وخرو من طريقي خلوني اولي

- تعالي خلي نوصلچ احسن من المشي بهالحر

مياس.. ميحتاج وصلت بس چفوني شركم

واگفين گدامي سادين عليه الطريق ومبتسمين بوجهي بابتسامه شريره

گمت ارجع ليوره واتلفت بلكت الله يجي واحد بالصدفه ويخلصني منهم بس منو اليطلع بهيچ وقت غير بس المخبل

ركضت بكل حيلي واحسهم يركضون ورايه واصوات ضحكاتهم عاليه كلش

صارت خرابه گدامي طبيت بيها على السريع من حلاة روحي حسبالك شفت باب بيت مفتوحه مو خرابه والنتيجه انحصرت هناك

- اي عاشت ايدچ همزين طبيتي هنا حتى ناخذ راحتنه

مياس.. احترم نفسك ولك ايدك تنكسر اذا تمدها عليه غير اصيح بصوت الم عليكم امة لا اله إلا الله

- ههههههااااااي منو اليسمعچ بهالظهريه العالم التحچين عنهم هسه بسابع نومه گدام السبالت والمبردات

- هههه دعوفها حقها مغشمه نفسها گول متدري محد يطلع بهيچ وقت غير بس الك... والع....

مياس.. زين والله من تعرفون نفسكم شنو من بشر

- ههههه وانت شنو لعد غير حالچ من حالنه قابل طبينالچ للبيت

- هاي شبيج دخلينه نتونس وياچ لتخافين مراح تنقص منچ قطعه ،، ومتأكد انتي هم عاجبچ هالشي بس تبيعين ثگل علينه

سمعت كلامهم وگلبي گام يدگ براسي من الخوف ،، يتقربون مني واني ارجع ليوره لحد ما جروني من ايدي

- ليش خايفه حياتي بعدين گوليلي شهل جسم اليموت انتي شگد عمرچ ولچ

- دعاين عيونها وشوف اللون الغريب مالتهن يبووووووي من يا قالب الله خلقچ بت الكلب

- اي والله تملخ ولكم ،، هي صح مبهذله بس مو مشكله تعديلات بسيطه وتصير صاروخ

- صح كلامك بس يمعود احنه خلي ناخذ النريده منها وهي بعدين تعدل روحها مثل متريد هههه

اسمعهم يحچون وارجف من الخوف واني اشوف مصيري مرسوم بنظراتهم التتفحص كل جسمي

مقيدين حركتي ويتلمسون بأيدي بشكل مقزز ،، جريت نفس قويت نفسي بي وحاولت ما انقللهم خوفي حتى لا يستغلون هالشي

ضحكت ضحكه قويه بس حتى اربكهم واتدارك الموقف قبل لا تفضحني عيوني

مياس.. ههههههه والله ضحكوتي كلش

- ليش تضحكين الظاهر عجبتچ السالفه

ثواني وسمعنه صياح رج المكان رج وهو يعيط بيهم بصوت عالي ،،، شديصير هناااااااااا ...

~~~~~~~~~

مقتطف من البارت الاول لقصتنا الجديده

القصه حقيقيه مثل ما عودتكم بس للأسف راح اتأخر بتنزيلها احتمال شهر واحتمال اكثر لان يرادلها شغل هواي لذالك عليكم بالصبر هههه

احداث القصه رهيبه ومتقل قوتها عن قصتنا السابقه واختاريتها الكم من دون كل القصص لان بيها جانب كبير من الانسانيه ،، وبالتالي متأكده راح تحبوها كلش

بالقصه الفاتت چان اكو الحاح شديد من قبلكم ردتو صور مقاربه للابطال فـ بهاي القصه اختصرت على نفسي وعليكم وخليتلكم من الاول صور شبيهه للابطال بغلاف القصه والي راح تتعرفون عليهم بوقت لاحق

قصتنا الجديده تجمع هواي امور بطياتها ....

الحب والكره
الخير والشر
الانسانيه والا انسانيه
التضحيه والايثار

حبايب ضيفو القصه للمكتبه حتى يجيكم اشعار من انزلها

انتظروني قريبا اذا الله راد .. تحياتي الكم متابعيني الاعزاء

اختكم (لبنى الموسوي)