I love you, Mr. Right [Published under Lifebooks] (Complete)

Chapter One

"GAGONG lowlife 'yon! Ipagpapalit lang ako, sa mukhang hitong pusit pa? Akala mo naman kung sinong guwapo, eh mukha namang kangaroo! Pagbabayaran niya ang panloloko niya sa'kin, letse siya!"

Patuloy lang si Anika sa gigil na paglilitanya habang ang mga kaibigan niya ay naiiling na lang. Kasalukuyan silang nakatambay sa Love Me Coffee Shop. Kaibigan at ka-eskuwela nila si Jade, ang anak ng may-ari ng naturang establisimyento.

Their group was known because they are all suckers for sweets at masasarap ang mga pastries sa coffee shop na iyon that's why they always want to go there. Ngunit nang mga sandaling 'yon, parang walang appeal sa kanya ang tatlong klaseng chocolate cakes na nasa harap niya, idagdag pa ang paborito niyang mocha frappucino. Iyon ay dahil sa siraulong ex-boyfriend niya na nahuli niyang nasa kandungan ng ibang babae. Ang akala pa naman niya ay titino na ito kapag binigyan niya ng pangalawang pagkakataon ngunit nagkamali siya.

Nahuli niya si Derek---ang ex-boyfriend niyang mukhang kangaroo--- na halos makipag-niig na sa babaeng kasama nito sa loob ng apartment nito. Balak sana niya itong sorpresahin dahil gusto niyang ito ang unang makaalam na nakapasa siya sa Licensure Examination for Teachers ngunit siya ang nasorpresa dahil sa naabutan niyang tagpo.

Halos wala nang saplot ang mga ito. Nagngitngit siya ng husto at sinugod ang mga ito ngunit galit na pinigilan lang siya ng dating nobyo. Ang dahilan raw nito kaya nito nagawa 'yon ay dahil hindi niya hinahayaang gawin nito ang lahat ng gusto nito sa kanya. Ang akala pa naman niya ay naiintindihan siya nito kung bakit hindi pa siya handang gawin iyon. Ang mga kaibigan niya ang unang-una niyang tinawagan upang may makasama siya. Ang akala nga niya ay sa inuman mauuwi ang masalimuot at naunsiyaming relasyon ngunit doon siya dinala ng mga ito.

"Ano ba naman kasi ang sinabi ko sa'yo dati? Hindi ba't binalaan na kita na nasa loob ang kulo ng gunggong na ex mo?" anang kalalapit lang na si Jade. Umupo ito sa tabi niya at inumpisahang lantakan ang cakes niya.

Napapadyak siya dahil sa sobrang inis. "Eh kasi naman Jade, hindi ko matanggap na gano'n lang ang mangyayari sa lovelife ko. Aba, ngayon nga lang ako nagkaro'n no'n eh mawawala pa agad? " frustrated na paliwanag niya.

"It's not as if you love him." nakasimangot na singit ni Angela. "Na-miss mo lang na magkaro'n ng boyfriend at nagkataong siya ang available." Alam ng mga ito ang nangyari sa kanya at kay Derek noong unang beses niyang maging nobyo ang binata dahil naikuwento niya iyon sa mga ito noong mga panahong nililigawan siya ni Derek sa ikalawang pagkakataon.

"Alam mo, I hate to say this pero tama si Angel." pagsang-ayon ni Larisse. "Hindi mo naman talaga mahal si Derek eh. Kaya tama lang na naghiwalay na kayo. Sasakit lang ng bonggang-bongga ang ulo mo do'n. Lowlife nga di ba? Once a lowlife, always a lowlife." umismid pa ito.

Napaisip siya dahil sa sinabi nina Angela at Larisse. May point ang mga ito. Unang beses niyang naging boyfriend si Derek noong third year highschool siya. At dahil wala siyang kaalam-alam sa pakikipag-relasyon ay agad niya itong sinagot. Ang totoo ay na-excite lang siya dahil iyon ang unang beses na may nanligaw sa kanya, kung ligaw nga na matatawag ang mga ginawa nito. And being a fool that she was back then, not to mention stupid, hindi na siya nag-isip at agad na pumayag maging nobya ng binata.

Nang unang beses silang maghiwalay nito ay hindi siya nakaramdam ng kahit anong emosyon. Disappointment lang ang naramdaman niya dahil hindi ang inaasahan niyang relasyon ang mararanasan niya sa piling nito. Hindi naman sa naniniwala siya sa fairy tale love story pero dahil sa mga nakikita niya sa paligid ay hindi rin niya maiwasang ma-excite sa isiping maaari niyang maranasan ang nararanasan ng ibang babaeng ka-edad niya. Ngunit sa kasamaang-palad ay hindi nangyari 'yon.

Wala naman kasi silang ginagawa katulad ng ibang magkasintahan. Ang tanging komunikasyon lang nila ay ang usong-uso noon na Friendster at ang pagtawag nila sa isa't-isa sa telepono. Sweet naman ito sa kanya ngunit hanggang doon lang ang ginagawa nito. At dahil sa isa nga siyang tanga at mangmang, madali siyang kinikilig sa mga pambobola nito sa kanya.