عندما تتحالف جميع الأشياء لتجعلك الشخص الأكثر حظاً..من رأيي فده افضل اسكريبت هنزله برغم من أنه مش انا اللى كتباه،بس حقيقي حبيته جداً،اتمنو تحبوه معايه،وانا منزلاه للأستفاده ،هستنا كومنتاتكم بردوو عشان اعرف رأيكم🧡🤝.
" = يا اسطا والله زي ما بقولك، بقالي أسبوع بشغل قرآن قبل ما أنام..
_...
= صدقني والله أنا كنت هتجنن من قلة النوم، وأخدت مهدئات ومفيش فايدة،، شغله انت بس بصوت هادي جمبك واتوضي قبلها وهتنام علي طول "
* لأول مرة أركز مع حد في المواصلات... أنا عادة بركب من هنا وألبس الهاند فري، وأفصل عن العالم... ده كان حوار شاب راكب ورايا مع حد معاه عالفون....يومها انشغلت طول الطريق بكلامه..
استنتجت من كلامه انه بينام علي صوت القرآن من فترة..!
وغالبا بينصح صاحبه يعمل كده علشان يعرف ينام..!
روحت البيت والموضوع مازال شاغل بالي.. يومي مر بشكل عادي،، وجه وقت النوم... أنا بنام بصعوبة شديدة...ممكن أفضل في السرير ساعتين لحد ما أنام،، بس يومها قررت أعمل زي الشاب بتاع العربية..
شغلت سورة يوسف بصوت مشاري راشد وطيت الصوت ونمت...
" لأول مرة من زمان جداً، أنام بسهولة كده..
قومت بدري بكل حماس،، ونزلت الجامعة،،
وأنا راجعة،بعد ماالعربية حملت،، لبست الهاند فري وشغلت الفون علي اساس هسمع أغاني.. لقيت سورة يوسف،، اتكسفت أغيرها وأشغل حاجه تانية،، نمت في العربية ودي من سابع المستحيلات بالنسبالي.. "
فات أسبوع.. تقريباً مسمعتش فيه أغاني خالص... بنام كويس جداً... مزاجي رايق... نسيت أقولكم إني بقيت أصلي.. بقطع أي نعم.. بس أهو أملي في ربنا كبير.. يوم الخميس كنت واقفة مع ماما بنجهز الغدا..
وهيا كالعادة مشغلة إذاعة القرآن الكريم..
لقيت الشيخ بيقرأ سورة يوسف... وأنا بكمل معاه!!!!!!!!
أنا مش مصدقة نفسي بجد!!!
ماما بصتلي وابتسمت.. وكملت اللي هيا بتعمله... وأنا كملت مع الشيخ.. بفرحة غير عادية... بعد الغدا جبت مصحف وراجعت السورة كذا مرة...لقيتني حفظاها كويس اوي.. فرحت اوي اوي.
يومها بالليل قررت اشغل سورة تانية قبل ما أنام.. وقد كان..وكذلك وأنا راجعة من الجامعة بسمعها.. بقيت بركز مع الشيخ... وأقول وراه..
بعد شهرين،، الفون مبقاش عليه ولا أغنية،، حفظت 6سور..
" يوسف، ومريم، الكهف، الإسراء، ق، النجم"
كنت بحكي لواحدة صاحبتي علي الحكاية دي،، وقولتلها علي كلام الشاب... افتكرته لما قال لصاحبه نام علي وضوء..
قررت أنفذ باقي كلامه...
وبقيت أنام علي وضوء.. ده خلاني أواظب علي صلاة العشا.. اللي أوقات كتير كانت بتضيع مني..
بعد كام يوم.. لاحظت إني بصحي علي آذان الفجر!!
من غير منبهات والله!!
فرحتي بنفسي كانت لا توصف...حقيقي..بعد التزامي بالفجر بالذات بقيت أتغير للأحسن في كل شيء... همتي للحفظ زادت..
عملت ورد قرآن يومي.. كنت بدعي لنفسي بالهداية كتير جداً..
وبشوف ماما مبسوطه بالتغير اللي حصلي..
* أنا حاليا بحفظ في سورة النور.... مش هتكسف أقولك إني أول مرة أعرف مواصفات اللبس الشرعي،، كنت متخيلة ان البنات اللي بتلبس خمار ونقاب، هما اللي متدينين، يعني بمزاجهم كده مش فرض، فاكره ان الطرحة بس اللي فرض،، مترددتش اني أخد الخطوة وكلمت ماما،، وغيرت لبسي،، *
بعد سنة وكام شهر أنا ختمت القرآن... يوم ما ختمت حسيت إني ملكت الدنيا والله...
بعدها بكام يوم سمعت الشيخ في التلفزيون بيقول أن ربنا عز وجل يقول لقاريء القرآن اقرأ وارتقي إن منزلتك عند آخر آية تقرأها..وقتها بكيت، وسجدت شكر لله أنه رزقني هذه النعمة اللي لو فضلت أشكره عمري كله مش هيكفي..
صحيح، أنا بدعي للشاب اللي كان في العربية ومش هبطل أدعيله... حياتي اتغيرت بسببه.
" ربنا بيبعتلك كل يوم ألف رسالة، لعلك تنتبه لواحدة منهم وتتغير قبل فوات الأوان 🌸"
أنت تقرأ
اسكربتات جامده💜!
Romanceاحترتُ في وصفِ الحُب،، وأحتارَ ألحُبُ في وصفك!🧡 عجبك أو لا سيب كومنت برأيك هستفاد منه اكيد وفوت لو عجبك🧡
