ليلة واحدة ( روايات ليبية ) 🔞🔞🔥

🔥🔥 Part 14 🔥🔥

#ليله_واحده 🔥
البارت 14
نوكوميس فتاة القمر

____________________________

وقفت نور مصدومه من اللي تشبح فيه مش مصدقه انه الشخص اللي قدامها قيس ؟؟ معقوله يتخلى ع حبهم ويخونها بوحده رخيصه زي هاذي؟
دفش قيس البنت وشاف لي نور وعيونه حمر من كثر شرب كأنه يراجي في ردة فعلها؟
نور بصوت واطي:اكيد مش ح تقعدي تتفرجي عليها تاخد فيه منك
قربت نور من البنت اللي واقفه مش فاهمه شيء ..
نور بنبره حاده: اطلعي البرا ..
قالتها بليبي وهيا تركيه ف مفهمتش عليها
قعدت البنت واقفه تشوف لي قيس بمعنى شن تقول هاذي!
نور شدتها من يدها بقوه وطلعتها وسكرت الباب في الوقت اللي كان قيس مقعمز حاط رجليه ع الطاوله وشاد الشيشه ويشرب
قربت نور منه وخدت الشيشه لوحتها ع الارض حتى تكسرت لي قطع .. وشافتله بنضره كلها كره وحقد يعيون يلمعو ..
نور: شفت الشيشه اللي نكسرت توا؟ انت كسرتني زيها توا
تقدر تاخدها وتلصقها صح،بس مش ح ترجع زي ماكانت💔 ...لمجرد مانهت كلماتها دارت ضهرها وكانت ح تطلع لو ماتكلمش قيس في هذيكا اللحظه
قيس: وعلاش ماقلتيش انك حامل بولدي؟ وعلاش هربتي وخليتني بروحي؟ وعلاش خليت الناس يتكلمو عليك ؟ قداش ضربت واحد الانه تكلم عليك وقداش عذبت واحد الانه حاول يعطي عليك فكره سيئه قدام الناس؟ طيلة ما انتي موجوده اهني ، اني كنت غادي نحامي عليك وقفت ضد عيلتي ضد بوي وامي ع خاطرك كنت نمشي في الطريق ونسمع في الناس تهدرز مش هذا اللي مرته هربت؟
اني مكانش هامني كلام الناس قد مكان هامني مكانك ..
مش بس انتي نكسرتي حتى اني نكسرت وتعذبت طول ما أنتي بعيده عليا ، راجيتك يوم واتنين وثلاته وقلت اول ماترجع ح نصالحها وح نغير الماضي التعيس ،حتى خدمتي اللي كانت بنسبع ليا جزء من شخصيتي، تخليت عليها باش نرضيك درت كل شيء عشان نرضيك انتي وبس عشان تكوني ليا اانتي عشان نكون عيله مع البنت اللي رادها قلبي وعقلي

كانت نور واقفه عاطياته بضهر تسمع في كلام قيس اللي كان يطعن فيها زي السكين ، بدون اي كلمه كانت تسمع ودموعها ينزلو ..
رجع قيس قال من جديد: يا إيما تبرريلي موقفك من الهروب او ..
لتفت نور حتى تقول" او شنو ؟
قيس: او ننتقم من الجرروح نعالج الجرح بجرح ..
كان قيس شارب هلبا صح بس مع هذا مافقدش توازنه انما قاعد مسيطر ع نفسه
نور: مش ح نقول تعرف وعلاش؟؟ وانت بوضعك هذا زي نقول زي منقولش الانك بتنوض الصبح ناسي كل شيء يعني وعلاش نتعب في روحي؟
قيس: اطلعي برا .
نور: طالعه برا من الحوش وطالعه بره حياتك مره وحده
طلعت وهيا على حافة الانهيار ،بكبر هالعالم الا انه الدنيا كانت ضيقه عليها هيا في دوامه بين تقول ! او متقولش!
قعدت تمشي بين الطرق الفاضيه وهيا من مكان لي مكان حتى قعمزت ع الرصيف وضمت رجليها لي بعض وقعمزت تبكي 💔 وهل في حل غير البكاء باش اديره؟؟

____________________________________

يمكن احني مانملكوش النصيب او القدر بس بتأكيد نملكو القرار ،🔥