مانيسوفيا | Manisophia

٣٦ ساعة..

أنا مش ساحر، بس انت وراك واجب فيزيا لسه مخلصتوش لحد دلوقتي.. صح؟
-----
في ليلة بائسة زي كل الليالي التانية يعني.. بتدق الساعة 12 معلنةً عن انتهاء اليوم وبداية يوم جديد والأهم.. عن بداية إن خزان أحزانك يفضي شوية أحزان..
وفي أثناء تلك المباحثات الحزينة المليئة بـ "يا ريتني كنت سلمت الشيت في معاده"، ولا "يا ريتني ذاكرت لامتحان الكيميا بتاع بكرة بدل ما أتزنق الزنقة دي"..
ولا أخفي عليك سرًا يا عزيزي بس أنا كمان وأنا بكتبلك المقال ده عندي امتحان كيميا بكرة مذاكرتلوش..
بس على فكرة ده مش ذنبي! اليوم هو اللي قصير! إيه الأربعة وعشرين ساعة دول!
أنا سامعك وانت بتسأل يا عزيزي القارئ، سؤال ذكي وأحييك عليه.. خد سقفة وتوينكزاية وقلم أحمر جاف..
عزيزي القارئ هو ليه الساعة 60 دقيقة؟ وليه الدقيقة 60 ثانية؟
طب استنى استنى، هو ليه اليوم 24 ساعة؟

عزيزي القارئ رغم مدى ما قد يبدو عليه السؤال من بديهية وتفاهة، لكن أحب أقولك إنت مش تافه، براڤو عزيزي القارئ.. شطور، هجاوبك عليه.
تعالى كده نشوف..
----

في العالم بتاعنا حديثًا، نظام الأرقام اللي بنستخدمه هو النظام العشري المبني على أساس الرقم 10.. بس الحضارات القديمة مكانتش زينا كده.
الحضارات البشرية القديمة كانت بتستخدم أنظمة مختلفة.. زي النظام الإثنى عشري والنظام الستيني.. وكانوا بيقسموا اليوم لأجزاء على أساسها، وبيرجع تاريخ تقسيم اليوم لأجزاء حسب بعض المؤرخين للحضارة المصرية ربنا يمسيها بالخير ويديها طولة العمر..

الحضارة المصرية استخدمت الساعات الشمسية، وهي عبارة عن شريط على شكل حرف T صغنون كده بتتحط في الأرض وتتظبط عشان تقسم الوقت ما بين شروق الشمس وغروبها ل12 جزء..
طيب ليه 12؟

عادةَ والمشهور إن رقم 12 مهم لإنه بيساوي عدد دورات القمر في السنة، أو لإنه ببساطة عدد مفاصل صوابع إيدك باستثناء الإبهام.. فلما كانوا ييجوا يعدوا باستخدام الإبهام مفاصل صوابعهم يطلعوا 12.. هوب قالك 12 ده رقم جامد اوي يبقى نستخدمه..
في البداية المصريون واجهوا مشكلة.. هنقسم فترة الليل إزاي؟ وقعدوا يتشقلبوا كده لحد ما شوية علماء فلك لاحظوا مجموعة نجوم بتتكون من 12 نجم مميزة كده.. هوب قالك دي صدفة جامدة جدًا، طب ما نقسم الليل 12 كمان..

طبعًا ييجي في بالك عزيزي القارئ سؤال مهم.. هما ليه مقسموش الليل 12 جزء زي النهار وخلاص ومن غير ولا نجوم ولا مجرات؟
الحقيقة أنا مش عارف، متسألش كتير بقى عشان أنا مصدع..
----
في وقت لاحق، ظهرت الساعة المائية clepsydra واستخدموها برضه لقياس الوقت بالليل، واتقسمت برضه لنفس ال12 جزء..
وبعد شيوع فكرة تقسيم النهار ل12 جزء والليل 12 جزء، بقى اليوم 24 جزء.. اللي هما 12 و 12 يعني يا بتوع علمي رياضة.

بس موضوع الساعات اللي معمولة بطول معين ده مبقاش معروف بشكل واضح أوي غير في الفترة الهيلينية، لما هيباركوس اقترح تقسيم اليوم ل24 ساعة متساوية.. فين الاختلاف بينه وبين المصريين؟ مش عارف، لازم التاتش يتحط عشان يبقى الحاجة عليها القيمة يعني؟
لحد ما ظهرت الساعة الميكانيكية في القرن ال14 في أوروبا، وبدأ العوام يعرفوا يعني إيه 24 ساعة متساوية..

طيب عزيزي القارئ عرفنا ليه عملوا اليوم 24 ساعة؟
طيب ليه الساعة 60 دقيقة؟ وليه الدقيقة 60 ثانية؟
عم الناس الفلكي اليوناني إيراتوسثينس استخدم النظام الستيني لتقسيم الدايرة ل60 جزء عشان يحط دوائر العرض الجغرافية، وبعد ما ده حصل بقرن.. جه عم الناس الفلكي اليوناني برضه هيباركوس وقرر يخلي دوائر العرض متوازية وملائمة للطبيعة الجغرافية للأرض، وكمان عمل خطوط الطول.. اللي احتوت على 360 درجة تتجه من القطب الشمالي لأخوه الجنوبي..
ما إنت لو كنت بتذاكر دراسات وجغرافيا زي البني آدمين مكنتش تعبتني عشان أشرح لك كده!

بعدها، في كتاب المجسطي تم توسيع اللي عم الناس هيباركوس عمله.. من خلال تقسيم خطوط الطول والعرض ( اللي كل واحد فيهم 360 درجة ) لأجزاء أصغر، حيث إنه قسم كل درجة ل60 جزء، وقسم كل جزء من الأجزاء دي ل60 جزء أصغر..

بعدها بفترة اتعرفت القسمة الأولى بإسم الدقيقة، والقسمة التانية بإسم الثانية..
ومع ذلك فالدقايق والثواني متمش استخدامهم غير بعد قرون من المجسطي، وكانوا بيقسموا الساعة لأنصاف وأثلاث وأرباع وساعات 12 جزء.. لحد ما ظهرت أول ساعة ميكانيكية.. أيوة هي اللي قولنا عليها فوق دي.

وفي 1967، تم إعادة تعريف الثانية بإنها بتساوي مدة (9192631770) عملية تحول طاقة لذرة السيزيوم.. وظهرتلنا الساعة الذرية..
فاهم؟ طبيعي متبقاش فاهم، مش لما تذاكر لامتحان بكرة؟

كده المفروض إنك فهمت ليه اليوم 24 ساعة وليه الساعة 60 دقيقة وليه الدقيقة 60 ثانية.. يا ترى هتقوم تذاكر؟ يا ترى هتخلص شغلك؟ يا ترى هتنام؟
أسيبك مع أحزانك، أشوفك في المقال الجاي يا وحيد ياللي مش لاقي قمر تسهر معاه.