حواجِز القلب

مشهد

حواجِز القلب

الكاتبه غدير العزواي

كوووووول ..كوووووول..
واكمز ونعالي تك برجلي والتك الثاني ماادري وينه ..تقدمت وكلي غرور ..

ها لك مو كتلك راح افوز يلا حساب الحلويات عليك وكثرلي من الي احبه ...

مسحت خشمي بغرور ومشيت من يمه لحكني حسن وهو يهني بيه ...وفجأه وكف درت وجهي علي كتله شبيك امشي يلا راح يجهز الغده والله اذا تأخرت احصلي كتله وبعدين لازم اطلع ويه بابا للشغل ..

حسن:ولك نعالك ضل هناك قبل الكتله ع التأخير مالتك راح تحصل كتله من وره النعال ..

ركضت وكتله غير تذكرني ياغبي ...ركضت شفته يم الطابوكه لبسته ومشينه اني ويا ...

وصلنه لبيتهم ...بيتهم نفس الشارع الي بي بيتنه وكل عمامنه هيج بيوتنا قريبه ع بعض ..طبيت ويا وسلمت ع عمي واني طالع شفتها هيه ودشداشتها ...وخدوها حمر بس هيه سمره وناعمه كتلها شلونج شيماء ..

دارت وجهها عليه بس شافتني ذبت الي بيدها وركضت فتحت ايدها وحطته كدامي ...

رفعت حواجبي ..ها شكو ..

شيماء:صغرت عيونها ..انت الي تعرف شكو وشنو اريد يلا بسرعه

اهووو شيماء يعني ربحتلي جم دعبل ركضتيلي عليهن هاج انطيتها 3 دعابل بيدها ..ضحكه شكت حلكها ..بس سرعان مااختفت ضحكتها..

شيماء:المره الثانيه لاتجيبلي 3 لانه راح احصل عليهن بس 6 خرز شنو العب بيهن ...

البنات يلعبن خرز والولد دعابل ..كل واحد وصاحبته.. الي يفوز يروح غصبا ماعلي ينطي الدعابل لصاحبته وطبعا اني من ضمنهم الله باليني بشيماء الي شكد ماجبتلها تريد اكثر...

رفعت ايدي ولوحت لمرت عمتي وطلعت من بيتهم وهيه تصيح وتكول لاتنسى تجيبلي حلويات تره عرفت انت الي فزت ..

درت وجهي عليها وغمزتلها وركضت للبيت ...شفتهم ستوهم صابين الغده وخواتي كلهن المتزوجات يمنه اليوم وصوت الجهال واصل لراس الشارع ...

طبيت وصيحت ع الجهال يسكتون اضوج من الهوسه والصوت العالي ..تقدم يمي عباس وهو هم ستوه جاي من الشغل حجه عليهم وكتله اسكت انت همينه ...

عباس:لك تره ماتكدرلي عمري مثل عمرك ..وغمزلي

تقدمت يمه ..حتى لو عمرك نفس عمري اضل عمك اني لاتنسى هل شي..

جيت عليه يريد يضربني صاحني ابوي ..

ركضت يمه ...كالي ولك كل عمرك 7 سنوات منين جايب هل جساره غير جهال انت هم جاهل والعب وياهم ...

رديت علي بغرور لا بابا اني جبير مو جاهل ..كال اريدك دوم هيج رجال ابني امشي يلا نودي اكل لبيت عمتك امك جلبت الا نودي ...

سمعت صوت امي وهيه تكول هم جبتوا اسمي شكو ..درت وجهي عليها شفت بيدها صينية اكل اخذ الصينيه بابا وطلعنه بلسياره ...

اني وره وامي كدام وبابا يسوق ...بابا كضه طول عمره يشتغل بهل تكسي ومامأذي احد .. بس اكبر مااخلي يشتغل بعد ابدا اشتغل اني واصرف علي كافي صرف ع 8 بنات وظهره نكسر من وراهن لو اخواني الثنين واحد يدرس خارج المحافظه وواحد متزوج وهو زوجته عايشين يمنه ...

محد مقصر الكل يشتغل بس اني حلمي جبير اكبر واشتري بيت جبير والمهم كلهم بدون مانفكر بلكمه الي ناكلها او الشرب الي نشربه ..

صحاني من حلمي صوت بابا وهو يصعد للسياره.....حيييل هاي شكد صفنت نزلوا الاكل وصعدوا واني ماحاس بشي ..

مشت السياره بينه لبيتنه ..مااحس الا وسيارتين طبكت كبال سيارتنه قبل لانوصل للبيت ونزلوا منها ملثمين ...

نزلوا وكسروا الجامه الي كدام ...وفتحو الباب الي من جهة بابا....

بابا يصيح لتنزلون اني اشوف شيريدون مني ...نزلت اني ...وامي هم ماتحملت ونزلت وصرنه بنص الشارع نصيح لااحد يسوي شي محد تحرك ...

كلهم يشوفون بس محد يكدر يتقدم ويخلصه منه ابدا ليش لانه الملثمين من اتباع صدام واي واحد يتدخل يروح ويا بابا بس جانو يكدرون يخلصونه من ايدهم..

صوتي راح واني اصيح لاابو المحلات الي معاشرهم بابا صارله سنين وياكلون من خيره شكد كرهتهم بوكتها يشوفون شلون ياخذون بابا ولاواحد يتحرك ...
........................................................

السلام عليكم حبايبي

اشلونكم شخباركم ..ادري صارلي فتره مختفيه وهواي اجتني مسجات ع خاص شكرا لسؤالكم ..

مشتاقلكم ومشتاقه انه نفتح كلب وعقل انسان ونسولف قصته ومشاعره وكولشي عنه بشينه وزينه وطبعا انتوا وياي وبدعمكم ...

رجعتلكم بقصه مختلفه هاي المره ومن هسه اكوللكم النهايه مو حزينه مو مثل قصة منقذي ذو النجوم الي محد اتوقع نهاية القصه ..ولكن الاعمار بيد الله والله يرحمها ويسكنها فسيح جناته ...

قصتنا هاي المره تحجي عن شاب عاش حياته بصعوبه كبيره وطبعا ماتخلو عن الحزن والفرح بنفس الوقت ..تدرون بيه من اجيبلكم قصه لازم مختلفه ومااحب تكرار احداث القصص الباقيه ...

قصتي وياكم ان شاءلله حلوه ومرحه وحزينه ومفرحه يعني حظروا دموعكم وكلينسكم وحظروا ضحكتكم وهلالكم🤣..

ولحد يسألني من هسه اكوووللكم القصه حقيقه ١٠٠ بل ١٠٠ ومستحيل اجيب واكتب قصه غير عن واقعنه ومستحيل اضيف اي حبكشلات من يمي الي يوصلني اكتبه مع بعض من التعديلات الي ماتخلو عن اي قصه اخرى ...

وشغله ثانيه لتسألوني بيها شوكت ابدي القصه ...حابه شويه اشلع كلبكم ....ههههه اتشاقه بس شي اكيد حسب دعمكم للقصه اذا صعدت ان شاءلله ابدي بيها ومواعيدي ثابته وياكم ....

واخر شي اكوله انه غيرت اسمي عن الكاتبه المجهوله وكتبتلكم اسمي الحقيقي ...

الكاتبه غدير العزواي ...بعدما كنت الكاتبه المجهوله😁

القاكم عن قريب ان شاءلله🖤