حب عن طريق الخطأ

البارت الثالث 3

كعدت الساعة ب٢ لزمت تليفوني شفت ٨٦ مكالمة من علي و ٢٢ مسج واحد منهن مكتوب اني هسه بالدوام بالموصل بس انزل اجيبج والله اجيبج و اجيج لبيتكم و انصدمت على اخر مسج مكتوب بيه ( اني رح اعوفج بس اريد اعرف شغلة وحدة منو علي فلان الفلاني ابويه هو مشتريلي السيم يعني باسمه )اني هنا انصدمت جاب اسم ابوية الثلاثي يعني عرفني و طلع عنوان بيتنا من السيم و مبين عليه خبل يعني يسويها و يجي لزمت السيم كسرته و ظليت ابجي من الخوف و لان كسرت خاطره  لعلي و قهرته مسجاته كلها قهر و عتاب و حتى منزلت و لا ساعدت امي بالفطور بقيت بغرفتي گمت توضيت و صليت و رجعت اتمددت اجتي لجين
لجين : بعدج دتفكرين بالموضوع
وجن : لج الحگيلي علي طلع اسم ابوية الثلاثي من السيم يعني طلع عنوان بيتنا
لجين : عزا لج والله ابوية و عامر يكسرونه و يكسروج 😣
وجن : عاشت ايدج خوش دتصبرين عليه
لجين : فرحانة كسرتي السيم ميفيد حبي بعد طلع المكان
وجن : شسوي شون هسه
لجين : لازم تتواصلين ويا تگليله ليجي لبيتنا تصير مشاكل
وجن : مسحت كلشي يخصه و كسرت السيم و محافضه رقمه 😖
لجين : يبووو ولج ليش هيج هسه شنسوي ؟!
وجن : خليها على الله 😞 و نزلي جوه ساعدي امي مالي خلگ انزل اسوي شي
راحت لجين و اني كمت سبحت و رجعت نمت دائما اهرب من مشاكلي بالنوم مرت ايام و ايام خلص رمضان  و اني مناسيه علي افكر بيه و اتذكر سوالفنه و اكول هسه اكيد نساني مشتاقتله هوايه اجه العيد وخلص العيد  و راها اجه يوم استلام النتائج رحنا للكلية اني وزينب الحمدلله نجحت و جان تقديري امتياز و صرت مرحلة ثالثة رسمياً
رجعت للبيت بشرتهم كلهم فرحولي بابا اشترالي تليفون حديث و ماما جابتلي كلادة ذهب
مشت الايام بسرعة مر ٢٠ يوم وره استلام النتائج بيوم جنت كاعدة بغرفتي داتفرج تلفزيون فجأة اجتي مسجات على التليگرام و مكتوب اسم علي بالانگليزي ( Ali) (طبعاً اني الواتس و التلي و الفايبرمسويتهن على رقمي القديم و هو موجود عنده )شفته مخلي صورته رأساً دخلت عليها ( طبعاً احنا طول الفترة الحچينه بيها مخابرات على السيم ولا مرة حچينه على السوشال ميديا علمود اشوف شكله ) شكله حنطي طووووويل و لحيته تجنن لابس بدله عسكرين و خوذة و لازم بيده سلاح يخبل ياناس
علي : ها جوجو حبيبي والله مشتاقلج بگد رحمة الله
وجن : نعم منو (تعمدت احجي ويا هيج حتى اضوجه و يعوفني و يكرهني)
علي : اني علي وجن
وجن : عفواً منو علي ويانا بالكلية طالب
علي : ولج ناسيتني و اني بالي و گلبي يمج و بس اريد طريقة حتى اسمع صوتج و اعرف اخبارج
وجن : ها اي تذكرتك هلا علي
علي : شنو ذكرتك شنو هلا علي ولج وجن داكولج مشتاقلج ميت عليج ولج احبج
وجن : تشتاقلك الجنة . باي مشغولة
علي : روحي بس اذا ما اجيت لباب بيتكم شاربي مو عليه
وجن : يعني تريد تسويلي مشاكل ويا اهلي تريدهم يكسروني ؟
علي : وجن افهمي رايدج بالحلال احبج حسي
وجن : هنا فرحت و حسيته صدك رايدني طمنت و گلت خطية كافي قسوة گتله اني هم احبك و مشتاقتلك بس ما اريد اسوي شي من وره اهلي
علي : و هذا الشي خلاج تكبرين بعيني اكثر بس مو معناه تعوفيني احبج و ورايدج و اني مو من هذا النوع الي بس يتونس اصبري عليه بس اكون نفسي و اجيب اهلي و اجيج
وجن : رح انتظر هذا اليوم
علي : اني رجال و كد حجايتي
وجن : حجينا و سولفتله عن كلشي صار ويايا بهالفترة و عن نجاحي و سألته أسئلة عن حياته و دراسته طلع دارس علوم سياسية و متخرج هم بس مقدم على الجيش لان يحبه
ظلينا نحجي ٣ ساعات نوب نعست عفته و نمت
گعدت ثاني يوم الصبح اتفقت ويا ماما نروح يوم الجمعة حتى اتسوگ ملابس للكلية مبقى شي و نداوم گالت اوك
طبعا اني امي مديرة مدرسة اعدادية و ابوية مهندس بالنفط و عامر دكتور مقيم و سجاد محامي و اني هندسة و لجين سادس علمي و سارة رابع علمي
كمت طبخت الغدا عن ماما طبعاً اني طبخي كلش طيب و كلها تمدح بيه شويه و دگ علي محد بالبيت كلهم دوامات بس اني و ماما و خواتي البنات
البنات نايمات و ماما فوگ دتنظف الغرف
وجن : صباحو حبيبي
علي : صباح الورد و الفل و الياسمين يا روحي
وجن : هذن كلهن انت .. انت الورد و الفل و الياسمين
علي : فدوة لگلبلج حبيبي
وجن : داطبخ غدا
علي : فدوة لقزومتي مريتي تعرف تطبخ .. ولج خاف دتجذبين  عليه و طلعين دتسوين اندومي عبالج هذا غدا مكلفه روحج
وجن : صورت له صور للاكل الي داطبخه
علي : اي خوش هسه ارتاحيت يعني مراح نخلصها مطاعم من نتزوج
وجن : هههههه 😂😅
مرت الايام بسرعة طبعاً اني و علي علاقتنا كلش زينة انطاني الفيس مالته تابعته و اعلق عليه و اراسله بالماسنجر اجه يوم الجمعه كعدت سبحت و مشطت و خليت مكياج خفيف بس حمرتي حمرة و بدلت لبست بنطلون ابيض و قميص رصاصي طويل لحد الركبة و الردن مالته بوف تول ابيض و شال أبيض فانيه و جنطة رصاصي و حذاء هم نزلت لگيت ماما مبدله لابسه عبايه خليجية گالت روحي يم السيارة (طبعاً ماما تسوق) اجيب جنطتي و اجي طلعت بره و شفت شوفه انصدمت صدمه اخت الجذب 💔 .....
يتبع ....
لا تنسون النجمة و اذا عجبتكم القصة شاركوها ❤️