حب بين ثنايا الثار

البارت 3

انا حواء انا من صادرت العادات والتقاليد حقوقها ،،،،،
انا حواء انا من حملها الناس ذنب خطيئة لم ترتكبها ،،،،،
انا حواء انا من سلبت المعتقدات البالية رئيها ،،،،،
انا حواء انا من دمروا حياتها تحت مسمى فصليه ،،،،،

بقلمي شيو النجفيه

حب بين ثنايا الثار

البارت 3

الكاتبه شيو النجفيه

ام جاسم ،، جا متدرين خيه غير ابنج باسم كتل ماجد ابن الشيخ

صدقه ،، مصيبة وصاحت على راسنة امي فقدت توازنها وكعت بالشارع رحت ركض كومتها وهي تبجي وتحجي ودخلتها للبيت

ام غياث ،، راح باسم راح اخخخ يا باسم شسويت بينه هاي تاليت تعبي وياك ربيتك وحبيتك اكثر من بزري وتالي اذبلك طركاعه على راسي وتشرد اخخخ

صدقه ،، منهارين خواتي يبجن وامي بادن رجليها من الخرعه ومتكدر تكوم ما هي إلا دقايق واشتغل الطلق كمنه منعرف منين يجينا الطلق نزلنا روسنا اني وخواتي واطشرنه كل وحده صارت بصفحة عرفنه بيت الشيخ دكونه دكه عشائرية

معرف شكد مر من الوكت ياله شويه بدا يخف الطلق الي زرف سكف بيتنه المتهالك وامي تبجي وتكطع بروحها فقدت بالكوه لزمناها وكعدت بالكاع ادك وتلطم واحنه داير مدايرها نبجي باوعت الساعة عبرت ال9 بالليل وابوي واخواني لسه ما اجو دقايق وانفتحت الباب طبوا ابوي واخواني مخترعين وعصبين

ابو غياث ،، شكو شصاير ام غياث

ام غياث ،، شكلك يبو غياث مصيبة وصاحت على راسنة باسم كتل ماجد ابن الشيخ

ابو غياث ،، استغفر الله انا الى الله وانا اليه راجعون

صدقه ،، كعد ابوي صافن و حاير واخواني واجيين ومنطفين وبس يغلطون على باسم صار ثاني يوم الصبح واحنه حالتنه حاله بس نبجي مخترعين راح ابوي اخذ شيخ العشيرة والناس اليعرفها وراح البيت الشيخ بس بيت الشيخ طردوهم وكالوا وره الفاتحة مال ابنهم يسوون الكعدة واحنه 3 أيام الفاتحه

لا اكل ولا شرب ولا نوم بس كاعدين ونبجي عدنه عزة بلايه ميت وصدك رابع يوم ابوي لم الناس من جديد وخذاهم ومشى واحنه كاعدين وننخى ونندعي كون ما يكولون لابوي يجلي(يشيل)من المنطقة كون ما يطلبون هواي فلوس كون وكون لمن صار الظهر اجانه ابوي

طب وجه اصفر ولونه مخطوف واخواني واجيين ظلينه مخترعين وبانت على وجوهنا ملامح التساؤل شنو طلبوا بيت الشيخ وكسر حاجز الصمت صوت امي المبحوح وهي تسئل ابوي شنو صار وياهم نزل راسه ابوي وجر تنهيدة طويلة بقهر وحجه

ابو غياث ،، بيت الشيخ يردون فصل 50 مليون و4 فصليات

صدقه ،، بهتنا اني وخواتي وضلينه وحدة تباوع لثانية وامي لطمت على صدرها وحجت بصوت مسيطرة عليه نبرة الالم