العنوان: المكتوب جمعنا وحد مايفرقنا

07

الحلقة 7
راحت توبة للجاميعة دخلت للمدرج حكمت بلاصتها في طاولة الاولى كان عندها كور ريزو بقات تستنى في البروف وهي كانت متعرف حتى طفلة شوية وبدا المدرج يتعمر قعدت قدامها طفلة مام هي متحجبة وزينونة شافت معاها توبة وابتسمت ومن بعد دخل لبروف وبداو يقراو كملو الكور حكات هذيك الطفلة مع توبة : صباح الخير ختي معليش نسقسيك
توبة: صباح النور وي اكيد تفضلي
الطفلة: واش من قروب تقراي
توبة: قروب 3 وانتي
الطفلة: يااا انا ثاني معليش مام في التيدي نقعد معاك بويسك منعرف حتى وحدة هنا
توبة عجبها الحال لان لقات وحدة كي حالتها: ايه معليش انا ثاني منعرف حتى وحدة، انا توبة وانتي
الطفلة: انا رحمة متشرفين ( تشفاولها شكون رحمة هي بنت خالة جود وخطيبة اياد 🤩🤩💖)
توبة: الشرف ليا 😍
راحو مع بعض يقراو تيدي فوتو نهار كامل مع بعض وزادو تعرفو على بعضاهم ملييح وكل وحدة رتاحت لاختها
رحمة: توبة معليش تمديلي نيميروك باه كي نسحق حاجة نعيطلك
توبة: ايه هذا هو 0656......
مركات رحمة النيميرو وعيطاتلها
رحمة هذا هو تاعي انا
توبة: اوك حبيبتي ظرك نسوفڨارديه
جاو خارجين مع بعض مروحين شافت رحمة اياد: توبة انا نخليك بويسك راهو جا خطيبي اياد غدوة ان شاء الله حبيبتي 😘 باي
توبة: اوك ان شاء الله باي😘
روحت توبة لدارهم وهي فرحانة لان ولات عندها صديقة طبطبت فتحتلها امها
نبيلة: كيفاه كان يومك
توبة: كان هايل لان تعرفت على طفلة تهبل 😻
نبيلة: كيفاه عرفتي عليها
توبة: طاحت معايا في نفس لقروب، انا نطلع نبدل قشي ونحبط كاش مناكل راني ميتة بالجوع
نبيلة: هههه اجري مالا اجري
طلعت توبة بدلت قشها وصلات صلاتها وهبطت كلات عمرت كرشها ومن بعد لمت الحالة ورجعت طلعت لشمبرتها تريح شوية دخلت تكسلت فوق السرير فتحت الفيس وبدات تقرا في قصصها كي العادة هي تقرا وتيليفونها يصوني لقات نيميرو جديد مهزتش وكملت تقرا عاود عيطلها: اييه شكون هذا لي راه يعيط خلي نهز ونشوف ريبوندات
.....: الو توبة
توبة: شكون معايا
......: واش معرفتينيش شكون انا
توبة: لالا معرفتكش قولي شكون سينو نكوبي
.......: هههههه اصبري اصبري انا ايمن واش بيك
توبة: ايمن!!! من وين جبت رقمي
ايمن: ماهوش صعيب عليا باه نجيبو ايه واش راكي
توبة: حمد لله وانت
ايمن: كي سمعت صوتك راني بيا
توبة: علاه راك تعيطلي واش بغيت
ايمن: بغيتك انتي
توبة:......
توبة: واش بغيت ايمن احكي خير منكوبي
ايمن: شوفي توبة نورمالمو قالولك بلي خطبتك وانتي رفضتي حاب برك نعرف علاه رفضتي ولا كاش مكاين واحد في حياتك
توبة: مكاين حتى واحد في حياتي وزيد انا عمري مخممت نتزوج بيك انت راك كيما خويا ايمن
ايمن: مانيش خوك 😠فهمتي وزيد غير انا لي نديك وشفاي على هدرتي
توبة: ماشي بسيف انا مابغيتكش انت لي افهم وكوبات عليه بقات تغلي وحدها وهي علبالها مدام وصل وجاب رقمها يعني مستحيل يخطيها وزيد قادر مام اجيها للجامعة