بيوتات اهلنة

البيت الثالث

#بيوتات_اهلنة

( البيت الثالث )  بيت سروبه

كل انسان وعندة صديق يشاركة طفولته وذكرياته

وكل ما يتقدم العمر تبقه الطفولة المرحلة الاولى الي بدينه بيه حياتنه واكيد اول مرحله متنسي لذلك مستحيل ينسي صديق   الطفولة

سروبه مو مجرد صديقه علاقتنه غير شكل اني وياها  انام سوة ونكعد سوة وناكل سوة ونلعب سوة ونداوم سوة ورحلتنه سوة سفرات مدرسيه سوة كلشي تشاركنا اني وياها

جنت ابات عدهم اياااام وهية هم تجي عدنة تبقه ايااااام 

مرة من المرات امهة اجت علينه كالت وينهة هاي المكموعه صار ثلاث ايام ما لافيه علينه ولج دبكتي خوما دبكتي واني ابجي وهية تبجي منقبل نتفارك

سروبه بيتهم بصف بيت ام صلاح وعائلتهم جبيرة وبيتهم مثل مكتلكم كلش جبير  عدهة اخوة وخوات هواااي ههههه مينعدون يمكن ست لو سبع خوات والاخوة هم هواااي  الجبير  اذكر علي قصير بس ابيض وجهة يضحك دوم وكل ما اروح الصبح عليهة حته نطلع للمدرسه هوة يطلعلي ويضحك بوجهي ويكلي هاااا جايه على سروبه انتن شلون راح نكدر نفارگچن

وجانت امه عاجزة من طلباته بختيار الزوجة

يريدهة طويله ورشيقه وبيضه وعيون زرقاء والشعر كون ضفيرته ادك ويه حد الخصر ولازم اصفر

دوم اسمع من امه تشكي الامي تكله خية تعبني هالولد ياهي الي اروح اخطبهة يطلعلهة  الف عيب والله شلون ماشوف راح يوكع وكعه بس الله يستر

ههههه وفعلاً بعد ما فرو بنات العالم فر اخر شي ازوج وحدة مابيه من المواصفات الي يريدهة غير بس ضفيرتهة ادك ويه حد الخصر 

وحملت زوجته باول شهرين من زواجه وبيوم وكفت سيارة اباب بيتهم شايله تابوت وملفوف بالعلم العراقي ودك الباب عليهم الصبح ومن طلعت ام سروبه كللهة السايق حجيه استلمو ابنكم

وراح ذاك الشاب الحلووو ابو وجه الضحوك وترك زوجه شابه حامل

وخلصت شهور العدة وراحت زوجته عد اهلهة ورة فترة كالو جابت بنيه الله يرحمة ما لحك يشوفهة

وعدهة اختهة الجبيرة هم انخطبت الشاب موضف وياهة وقبل الزواج اتوفه بحادث الله يرحمة وبقت حزينه علي وما نزعت الاسود ولا قبلت تزوج ابد

كبرت وهية عازفه عن الزواج وفاء منهة الخطيبهة الراحل چانت صاحبة شخصيه والهة كلمتهة بالبيت كونهة البنت الكبيرة على اخوتهة وكل ما تجي خطابه ترفضهم  ثگيله وكلمتهة وضحكتهة بالمثاقيل الى ان مشة بيهة العمر وكبرت وعبرت الاربعين 
وبيوم سمعنه نخطبت طبعاً مفاجأة بعد كل هاي السنين والشباب الراح هسة اله وافقت تزوج وشلون كدر يقنعهة منعرف المهم عقدت مهر ونعزمنه على حفله الحنه