الحلقة15:
فيرا تحكي:
نفتح فعينيا و نرجع نغلق..بلعقل حتى تفكرت كلش صرا لبارح..تبسمت..خديت نفس طويل وقت شميت ريحتو لي معبية البيت..رميت يدي قدامي..بلاصتو فارغة..فتحت عينيا..رفد يدي نحك فيهم..تقعدت بلعقل..رديت شعري مور ودني..رفدت يدي مترددة حطيتها على مخدتو..نتحسس فيها..فثواني سرحت فيها..تفكرت نظرتو لبارح..و حتى كلامو..كلامو لي للدك يتعاود فودني..«مراكيش وحدك..راني هنا»..تبسمت..
تنفظت على صوت الباب لي تفتح..بعدت يدي نجري..طلعت راصي ليه..طاحت عيني فعينو..عينيا دارو على وجهو كامل..و رجعت تركزت فعينيه..محكا حتى حرف..جيست يشوف معايا..
انا: بونجور
هشام: بونجور..نوضي طمي حوايجك..
عقدت حواجبي..نحاول نستوعب كلامو..وقفت بالزربة..نسأل فيه..
انا: علاه !
قرب للخزانة..فتحها يجبد فحوايجو و يحكي فرد وقت..
هشام: خلاصت مهمتنا هنا..راكي واجدة باش تبداي خدمتك
قلبي خض بالقاوي فصدري..الدنيا دارت بيا..غمضت عينيا بالقاوي..كبست بيديا على طرف الروب.. حسيت كرشي تقلبت..يمكن خوف..و يمكن حاجة وحدوخرا..من الاول كنت عارفة انو هاد الشئ راح يصرا..اصلا بفمي قتلو بلي راني واجدة..اما دك..كي تحطيت قدام الامر الواقع..منعرف بالضبط واش قاعدة نحس..من جيهة خوفي كل مرة يكبر..و من جيهة منعرفش واش حيكون مصيري وقت ننظم ليهم..و الاهم اني بعد اليوم راح نخدم خدمة ياسين..و راح تبدا نبدا نحوس عالهدف تاع ياسين قبل مايموت..
كلش تعدا بين عينيا فثواني..نتنفس بالسيف..قلبي نحسو راح يخرج مبلاصتو..متمنية لوكان نقدر نقولو خلينا هنا و منروحوش..بصح مستحيل..مستحيل نقدر..
فقت على صوتو يحكي معايا..
هشام: اااي راني نحكي
تنفظت..غلقت عينيا و رجعت فتحتهم..
انا: وي ديزولي مسمعتكش
هشام: ممم..هايا معندناش نهار كامل..
هزيتلو براصي ايه بالزربة..تلفت للباب..نمشي بالسيف..خطوة للقدام و عشرة لتالي..وقفت عند الباب..ستندت بيدي عليها..رجعت درت ليه بلعقل..نشوف معاه..يحط فحوايجو فالفاليز..تنهدت و رجعت درت خرجت..يا ريتو يحس بيا..يا ريتو يحس بخوفي..رغم اني تقويت على روحي..بصح الانسان ميقدرش يبدل نفسو و حقيقتو بين نهار و ليلة..منقدرش منخافش..احساس الخوف بالذات منقدرش نتحكم فيه..
دخلت لبيتي..ديراكت لدوش..نزلت نغسل فوجهي و نعاود..طلعت راصي نشوف معا روحي فلمرايا..نحكي معا روحي..
أنت تقرأ
__❄عيون_الجليد❄__
Action#منقولة __❄عيون_الجليد❄__ معروف عن المافيا الايطالية ان تنظيمها بالرُتب..و لكل عضو رتبته الخاصة و من بين اهم قوانين المافيا الايطاليا🔪😱ان العميل اذا مات تتولى مهامه زوجته😈🔥..و تعرف بعدها بإسم عيون_الجليد❄💣✌.. 🌸انطلاقا من ها...
