ومضات من رواية محذوفه "العشق المتمرد"

الومضة الأخيرة

في الكوجينه هي وامها يهدرزوا..
نور:طولة لسان وقلة ادب خالتي معاش قادره عليها مايقدر عليها كان عمي وعماد بس..
نعيمه:خساره راس هالبنت وفسدوها..باهي ومروان شن صار فيه؟
نور:خلاص بيسافر قبل عرض القناة اللي طلباته وبيطلع برا..
نعيمه:هكي خيرله بالذات بعد فسخ خطوبته والمشاكل اللي صارت بعدها..
نور:ايه..سمعتي بأيمن وحدهم قالوا حتى هما بيطلعوا لمصر..
نعيمه:عندهم حق معاد مازال ينعاش فيها هالبلاد..
نور تنهدت وسكتت..
نعيمه:تعرفي مشوبه من المشي في العيد ل*******..
نور:لا امشي وطز فيها لميا هادي بتقطعوا حوش جدي ع خاطرها هي وصغارها!
نعيمه:بعد المشكله اللي صارت لما ضرب عبدو بنتها معاش عندي نيه نمشي ولانشوف عمر بعد اللي قاله..
نور:ع خاطر حناي ياماما..راهو حتى خالاتي زينب وكفايه معاش عندهم نيه في المشي زي زمان بعد كترت المشاكل لكن الله غالب راعو حناي مراة مريضه..
نعيمه ودموعها فعيونها:والله لولاها معاد نمشي..
نور:وخالاتي مسكينات..
نزلوا دموع نعيمه وقالت:كاسرات ظهري حتى هما..راهو حرجانات منكم انتي ورزان ورفقه معاش مشيتوا بكل..
نور:اني بسبب مالك بعد العركه اللي صارت بينه وبين توفيق معاش يبي يمشي..ورفقه منشغله بعيلتها..اما رزان عارفه خيرها ماما..
تنهدت نعيمه وقالت:مش غير انتم حمزة هدا معاش روه بكل قالوا من عرس اخته رانيا..
نور:يجري ع عمره حمزة ياماما راهو..
نعيمه:وسند؟
نور:سند اللي جاه جاه ع البلاد كرهها مرة وحده ع قولة خالتي زينب منين جت تهدرز نهارتها..
نعيمه تنهدت وقالت:مشناها النفوس منين تتغير مع الوقت مش عارفه شن جانا..
نور بحزن:هدا حال الدنيا..
شويه رن تليفون نور..كان مالك..
ناضت سلمت ع امها..
ومشت طلعت ولادها الزوز وخدت صغيرهم في غمرها وطلعت وخوتها وولاد اختها معاهم..
لعند ماسقدوهم للباب..
نور:سلمولي ع بابا..
مجد:يوصل..
وطلعت الصغار ركبوا من الخلف..
ونور ركبت من القدام..
نور:السلام عليكم..
مالك:وعليكم السلام..شن جو..
نور:تمام الحمد لله..
شبحلها مالك شويه بعدين تنهد وتحرك وهو يقول في نفسه..
"غلطه درتها في عمري قاعد نتحمل في نتيجتها لليوم..فقدت ثقتها..وهالشي خلاها ديما شاكه فيا وفي يوم اسأت فهم موقف شافاته..دارت مشكله كبيرة وصلتنا فيها للطلاق..وقعدنا شهور منفصلين وفالشهور كنت نبي نثبتلها ونثبت لأهلها اني صادق وماخنتهاش ولما طلعت بريء قدامهم..رجعتها وممكن سبب رجوعها حملها هداكا الوقت..المهم حاولت وللآن نحاول بكل الطرق نصلح اللي انكسر..بس مع الأسف شكله عمره مايتصلح 💔"
🌺🌺🌺🌺🌺🌺🌺
وبهكي نكون لبيت طلب المتابعه والناس اللي تبي تعرف نهاية الروايه واخر الاخبار...