شوق فيصل

Happy Eid

اهلين ..
بمناسبة العيد حبيت اكتب لكم ون شوت قصير وسريع لعايلة جمعان وفعالياتهم بالعيد ، اتمنى يعجبكم 🌷

الساعه ٢ الظهر - يوم العيد

كانوا مجتمعين بالصاله جمعان جالس بكشخته ثوب وشماغ وساعه جلد والسبحه بيده ، حوريه بفستان بألون صيفيه مسرحه شعرها بشكل بسيط ، لابسه جزمتها وجاهزه للطلعه وعبايتها بحضنها ، فيصل الصغير بثوب وطاقيه ولابس نظارة اكبر من وجهه لأحد شخصيات الأنمي يتفرج عالأيباد ومجمع العيديات بيده ، منيف كاشخ بثوب وجوتي رياضه وجالس عالكنب ويراسل فراس ويتبسم مع نفسه ، وأخيراً سند الي كان متربع عالأرض بسرواله وفانيلته وقاعد ياكل كبده امه مسويتها له مخصوص من خروف العيد

نزل منيف جواله وحطه بجيبه وهو يقول : يبه اصرخ عليه ترى تأخرت على جداني لو ادري الوضع بيصير كذا كان قلت لخالي فيصل يجيني من بدري !
تأفف جمعان وتكلم بصوت عالي : هيه يا ولد وينككك اخرتنا تراك ! سلوم وصمخ !
طلع سالم من غرفته على مهله وهو كاشخ بثوب العيد وشماغه وعقاله بيده وقال وهو متجهم : طيب هذاني جيت ..

جمعان : من اليوم وانت تقول هذاني يالرخمه ! شف الساعه كم ! امك لها ساعه تنتظرك واخوك تأخر وانت متربض لي على مهلك !
منيف وهو يخز سالم : شف كل ذا وحتى شماغه ما لبسه الله يقطع برودك يا شيخ !
سند رفع عينه يطالع بسالم وضحك على شكله ورجع ياكل وهو يقول : اخيراً شفنا الحسناء لابسه ثوب

سالم احتقن وجهه لأنه اصلاً مغصوب يروح لخواله وذول مو مسهلين الموضوع عليه : شف انت وياه ترى ان ما سكتوا عني مب احسن لكم !
قامت حوريه ومشت عند سالم وبدت تلبسه شماغه وهي تقرأ وتمسح عليه : ما عليك منهم يمه غيرانين منك .. بسم الله عليك وش هالزين ؟ الله يحفظك ما شاءالله لا قوة الا بالله

جمعان وقف ومشى يلبس نعاله وهو يقول : اقول اتركي عنك الدجل من زينه عشان يغارون منه ويالله انت البس شماغك واترك عنك المياعه لا ارنك بالعقال اعدل وجهك
تأفف سالم واخذ العقال من يد امه وقام يلبس وهو يقول : شمعنى بس انا الي اروح ؟ ليش سند ما يروح ؟
حوريه : سند عاصي ما يسمع الكلام خلك انت احسن منه وربي بيرضى عليك لأنك تسمع كلامي

سند ولا كنه سمع ظل ياكل بعدم مبالاة وهو يقول : هههههه هطف تلعب عليه بكلمتين
سالم تكتف وقال بقهر : ايه العبي على عقلي بس ! ترى ما راح اقعد معك بس بسلم وبطلع مثل ما اتفقنا والا ترى ماني رايح !
حوريه تنهدت وبتسليك : ايه معليه اقعد شوي مع خوالك خلهم يشوفونك من زمان ما شافوك وبعدها اطلع مع ربعك زي ما تبي

اومأ سالم ومشى قدام المرايه يعدل شماغه وهو مبوز : طيب نشوف
رمى جمعان مفتاح السياره على منيف : قم انت قرب السياره تذكرت اني سافطها عند الدكان
وقف منيف وقال وهو يمشي جهة الباب وهو يتحلطم : عز الله ما وصلت الا المغرب من وراكم لا تتأخرون ترى بضرب هرنات بخلي كل الحي يشتكي عليكم !