ဉာဏ်များလွန်းသော ခင်ပွန်းသည်

အခန်း (၅၈)

Burmese Translation of Fu Jun You Zhe Dian {夫君，悠着点} by Author 苏行乐.

အခန်း (၅၈)

TRANSLATOR - SHARR

--------------------

ဖေ့လန်၏အခန်းအပြင်ဘက်တွင် ဖေ့ကျင်း မတ်တတ်ရပ်နေသည်။

ဖေ့ကျင်းနောက်ကျောတွင် ချွေးပြန်နေသည်။ ဖေ့လန် စိတ်ကစဥ့်ကလျားဖြစ်ကာ သူ့ဘာသာ ဗလုံးဗထွေး ရေရွတ်နေသည်ကို သူ ကြားနေရသည်။ ဖေ့လန် ဘာကြောင့် သည်လိုဖြစ်ရသလဲ ဖေ့ကျင်းလည်း နားမလည်။ ဖေ့လန်က ဉာဏ်အကောင်းလွန်ပြီး ဦးနှောက်ကြောတွေ ပေါက်ထွက်ကုန်တာလား။

ဘယ်သူက ပိုပြီး ရက်စက်သလဲဆိုသည့် ဖေ့လန်၏အမေးကို ဖေ့ကျင်း မဖြေနိုင်။ ရန်ရှီးထင်သေသွားလျှင် ဒုက္ခခံရတာ ပိုနည်းသွားမည်က မှန်နေသလား။ အားလုံးကို ဖေ့လန်လုပ်ပြီးတဲ့နောက်မှာတော့ သူ့ကိုယ်သူ ပျောက်ဆုံးသွားတော့သည်။

ဖေ့ကျင်း စုစီ၏ဆိုင်မှ ထွက်လာခဲ့သည်။ အိမ်အပြန်လမ်းတွင် ဆက်သားတစ်ယောက်သည် စုစီထံမှ ဖေ့လန် ကိုယ့်ကိုယ်ကို သတ်သေသွားသည့် သတင်းစကားကို ဖေ့ကျင်းထံ ပါးလာသည်။ သူက ဖေ့လန်ကို သွယ်ဝိုက်ပြီး သွေးမြေကျစေသည့်အတွက် နောင်တရသလို ခံစားလိုက်ရသည်။

ဖေ့ကျင်း အိမ်နှင့် အဝေးမှာ ရှိနေစဥ် အစေခံတစ်ယောက်သည် ရန်ရှီးနဥ်၏ အိပ်ခန်းဆောင်သို့ အပြေးအလွှားရောက်လာသည်။

"သခင်မ ဟွမ်းကော်အိမ်တော်က အမျိုးသမီးတစ်ချို့ သခင်မနဲ့ တွေ့ဖို့ ရောက်လာပါတယ်" အစေခံက ပြောလိုက်သည်။

အစေခံက သတင်းဆိုးကို သယ်လာချိန်တွင် ရန်ရှီးနဥ်က ဆီးသီးများကို စားနေသည်။ ဟွမ်းကော်က ဘာတွေ အကွက်ချကြံစည်နေလဲ သူမ မသိသော်ငြား သူမနှင့် ဖေ့ကျင်းတို့၏ ကလေးကို ကာကွယ်ရန် ဝတ်စုံပွပွတစ်ထည်ကို ပြောင်းလဲဝတ်ဆင်လိုက်သည်။

အမျိုးသမီးများကို သူမအခန်းထဲသို့ ခေါ်ဆောင်လာရန် အစေခံကို ရန်ရှီးနဥ် အမိန့်ပေးလိုက်သည်။

အစေခံက အမျိုးသမီးများကို ရန်ရှီးနဥ်အခန်းကို ခေါ်လာပြီး လက်ဖက်ရည် ငှဲ့ပေးလိုက်သည်။