ဉာဏ်များလွန်းသော ခင်ပွန်းသည်

အခန်း (၆၆)

Burmese Translation of Fu Jun You Zhe Dian {夫君，悠着点} by Author 苏行乐.

အခန်း (၆၆)

TRANSLATOR - NC

--------------------

"မယ်တော့်မှာ ဘာအစီအစဉ်များရှိပါသလဲ" ဖေ့ကျန်း မေးလိုက်တော့လေသည်။

"ဆောင်းတွင်း အေးစက်စက်ကြီးလဲ ကုန်လွန်ပြီဆိုတော့ သူတို့တွေ မြို့တော်ကို ပြန်လာကြတော့မယ်" မုမိဖုရားက ဆိုလိုက်လေသည်။ "လမိဖုရား နွေဦးကျော်အောင်တောင် အသက်မရှင်နိုင်တော့မဲ့ ကိစ္စလို၊ မင့်ခမည်းတော်ရဲ့ မွေးနေ့စားသောက်ပွဲအခန်းအနားလို အခွင့်အရေးကောင်းတွေ အများကြီး ရှိသေးတယ်"

ဖုန်းကျောင်း စံအိမ်တော်၌ ဖေ့ကျင်း၊ ရန်ရှီးနဉ်နှင့် ကျန်သူများမှာ မိမိတို့ဘာသာ ပျော်ရွှင်မြူးထူးနေကြလေသည်။

တချို့က တံခါးရှေ့မှာ ထိုင်နေကြပြီး သက်သောင့်သက်သာ ဖြေလျှော့နေကြသလို တချို့ကလည်း အမဲလိုက်ရင်း၊ ဆော့ကစားရင်း၊ အိပ်လိုက် စားလိုက် လုပ်နေကြလေသည်။

သူတို့မှာ တစ်နေ့တစ်နေ့ ပျော်ရရွှင်ရအောင် ဘာလုပ်ကြမလဲ၊ ဘယ်လို ကစားရမလဲသာ တွေးစရာ ရှိသည်။ ဖုန်းကျောင်းစံအိမ်တော်၌ အမြဲတမ်းနေခွင့်မရသည်ကိုသာ စိတ်မကောင်းဖြစ်နေကြလေသည်။

လေးလမြောက်၏ ၁၂ ရက်ကို ရောက်သောအခါတွင်မူ ဖုန်းကျောင်းအိမ်တော်သို့ ဝမ်းနည်းစရာ သတင်းတစ်ရပ်ရောက်လာခဲ့လေသည်။ လမိဖုရား ကံတော်ကုန်ပြီတဲ့လေ။

"ဖေ့ကျင်း၊ လမိဖုရားက ဘာလို့ ရုတ်တရက်ကြီး ကံကုန်ရတာတဲ့လဲ..." ရန်ရှီးနဉ် စိတ်မကောင်းကြီးစွာ မေးလိုက်တော့သည်။

ဖေ့ကျင်းလည်း ရန်ရှီးနဉ်ကို ဖက်ထားရင်း နောက်လိုက်နောက်ပါ အစေခံများအားလုံးကို အထုတ်အထည်များ သိမ်းဆည်းထားရန် မှာလိုက်တော့သည်။

ထိုနေ့မှာပင် ဖေ့ကျင်းနှင့် ရန်ရှီးနဉ်တို့ မြို့တော်သို့ ပြန်လာခဲ့လိုက်ကြသည်။

မြင်းလှည်းအတွင်းမှာတော့ ရန်ရှီးနဉ်သည် သူမ၏ ကိုယ်ဝန်ဗိုက်ကို အသာအယာ ပွတ်သပ်နေလေသည်။ "အစ်ကိုကြီး၊ လမိဖုရားက ကျွန်မထက် နှစ်အနည်းငယ်လောက်ပဲ အသက်ပိုကြီးတာနော်..."