Unicode
"စာလာတယ်..."
မှောင်ရီပျိုးစပြုချိန်တွင် ပြန်ရောက်လာသော ဇေရဲက စာကြည့်ခုံတွင် မျက်မှန်တပ်ကာ စာရေးနေသော နွေဦးမောင်၏ခုံပေါ်သို့ပစ်တင်ပေးလိုက်သည်။ညနေခင်းကျောင်းစာတိုက်သို့ အိမ်ကပို့ပေးလာသည့် ကျောင်းလခနှင့်မုန့်ဖိုး ကိုသွားယူစဉ် နွေဦးမောင်နာမည်နှင့်စာနှစ်စောင်ရောက်နေသည်မို့ တစ်ပါတည်းအပါယူလာခြင်းပင်။
မန္တလေးနှင့် ပဲခူး ၊သီးခြား နယ်မြေဆီက စာနှစ်စောင်အား နွေဦးမောင်ယူလိုက်ကာ ချက်ချင်းဖောက်မဖတ်ပါဘဲ စာအုပ်တွေကြားညှပ်လိုက်၏။
"ဟိတ်ကောင် ပေးလေ။ ပို့ခ။"
ဇေရဲကလက်ဖြန့်ကာ စာပို့ခတောင်းတော့ နွေဦးမောင်က လက်ကိုဖြန်းခနဲရိုက်ချလိုက်သည်။
"မင်းကိုဘယ်သူက ယူလာခိုင်းလို့လဲ"
"အောင်မာ အကျင့်ပါတယ်ကွ"
နွေဦးမောင်သည် သူ့စကားနှင့်သူပင်ပြန်ချေပခံနေရသော်ငြား ဇေရဲအားအဖက်မလုပ်တော့ဘဲ စာပြန်ရေးနေ၏။
ဇေရဲကသူ့စားပွဲခုံပေါ်တင်ပါးလွှဲထိုင်လာကာ
"ဟိတ်ကောင် နွေဦးမောင် သီချင်းသွားဆိုရအောင်။ လူစုထားတယ်။ သင်္ချာက ကောင်တွေလည်းပါတယ်။ မာလာဆောင်သွားကြမို့"
"မလိုက်ဘူး"
နွေဦးမောင်က နှစ်ခါမစဉ်းစားဘဲ ငြင်းတော့ ဇေရဲက ခပ်တိုးတိုးညည်းလေသည်။
"မာလာဆောင် မောင်မလာ။ မာလာဆောင်ကို မောင်မလာချင်"
"မလာဘူးကွာ၊ မင်းတို့ကိုယ့်ကိုယ်သွားကြ။ ငါ မအားဘူး"
"နေပေါ့ကွာ။ မောင်မလာချင်ရင်လည်း နရီလေးကတော့လာချင်တယ်တဲ့"
စောနရီ၏နာမည်ပါလာတာမို့ နွေဦးမောင်က မျက်မှန်ကြားထဲကနေ မျက်လုံးပင့်ကြည့်လာသည်။
"နရီက ဘယ်ကိုလာမှာလဲ"
"မာလာဆောင်မှာသီချင်းသွားဆိုဖို့လေ။ အခုပဲသွားခေါ်တော့မို့.."
ဇေရဲကထထွက်ဖို့ပြင်တော့ နွေဦးမောင်ကလှမ်းဆွဲကာ
"ဘာသဘောလဲ"
"ဘာသဘောရမှာလဲ? မိန်းကလေးအဆောင်ရှေ့ သီချင်းသွားဆိုပါတယ်ဆိုမှ လူ ပျို လှည့် တာပေါ့"
လူပျိုလှည့်ဆိုသည့်စကားကို တစ်လုံးချင်းပီပီသသဖိပြောလိုက်တော့ နွေဦးမောင်မျက်နှာကရှုံ့မဲ့သွားသည်။
"လိုက်မယ် ၊ လိုက်ခဲ့မယ်"
YOU ARE READING
အဓိပတိလမ်းမထက်က မောင့်ခြေရာ{အဓိပတိလမ္းမထက္ကေမာင့္ေျခရာ}
Romanceကျွန်တော်လေ...သည်အဓိပတိလမ်းမကြီးကို သိပ်သဘောကျတယ်။အထူးသဖြင့် မောင့်ခြေဖမိုးလေးနဲ့တွဲမြင်ရတာကို ပိုသဘောကျတယ်။ စောနရီ... {ကၽြန္ေတာ္ေလ...သည္အဓိပတိလမ္းမႀကီးကို သိပ္သေဘာက်တယ္။အထူးသျဖင့္ ေမာင့္ေျခဖမိုးေလးနဲ႔တဲြျမင္ရတာကို ပိုသေဘာက်တယ္။ ေစာနရီ...} Start-30...
