ဉာဏ်များလွန်းသော ခင်ပွန်းသည်

အခန်း (၇၇)

Burmese Translation of Fu Jun You Zhe Dian {夫君，悠着点} by Author 苏行乐.

အခန်း (၇၇)

TRANSLATOR - NC
--------------------

မင်းကြီးနှင့် ရဲမက်များမှာ ဖေ့ကျန်း၏ ဝံပုလွေ မလာဘဲ ဝံပုလွေဟု အော်သော အပြုအမူကို မုန်းတီးမိကြလေသည်။

"ဖခမည်းတော် သူ အရူးလုပ်တာကို မခံပါနဲ့" ဖေ့ကျန်း ပြောလိုက်သည်။ "ဖခမည်းတော် သားတော်ကို အထဲဘက်တွေ လိုက်စစ်ဆေးခွင့်ပြုပါ"

"ပြီးရော" မင်းကြီးက အေးတိအေးစက် ပြောလိုက်လေသည်။

ဖေ့ကျန်းက သူ့ကိုယ်ရံတော် ကိုယ်ပိုင်ရဲမက်များကို ဝင်လာစေလိုက်သည်။ ပြီးနောက် ဖေ့ကျင်း အိမ်တော်၏ ချောင်ကြိုချောင်ကြား လှည်းနေမြင်းဇောင်းမကျန် ရှာဖွေစစ်ဆေးမှု ပြုတော့သည်။ သို့သော် မသင်္ကာဖွယ်ရာ ဘာမှ မတွေ့။

"ဘယ်ရောက်သွားတာလဲ" ဖေ့ကျန်း မေးတော့လေသည်။ "လက်နက်တွေ ဘယ်မှာလဲ"

"သတ္တမမင်းသား၊ နဝမမင်းသားအိမ်တော်ထဲကနေ လူတွေ ထွက်သွားတာ ကျွန်တော်မျိုးတို့ မမြင်တွေ့လိုက်ပါဘူး" ရဲမက်က ပြန်ပြောလေသည်။

"အသုံးကို မကျဘူး...!" ဖေ့ကျန်းက အော်တော့သည်။ "လူသူ လက်နက်တွေက လေထဲတင် ဘယ်လို ပျောက်သွားနိုင်မှာလဲ"

သူ၏ ရဲမက်များက လိမ်ညာလှည့်ဖြားရဲမည်မဟုတ်မှန်း ဖေ့ကျန်း သိသည်။ ဖေ့ကျင်းကသာ သူ့ကို ထောင်ချောက်ဆင်ခဲ့ခြင်း ဖြစ်တန်ရာသည်။

"ဖခမည်းတော်က ကျွန်တော့အိမ်တော်ကို ရှာဖွေစစ်ဆေးနေတာ ကျွန်တော်က ပုန်ကန်သူတွေ ဝှက်ထားတယ်လို့ သံသယရှိတာကြောင့်လား" ဖေ့ကျင်း စိတ်မကောင်းကြီးစွာ ​မေးလိုက်လေသည်။

မင်းကြီးလည်း ရှုပ်ထွေးတွေဝေနေသော မျက်ဝန်းများဖြင့် ဖေ့ကျင်းကို ပြန်ကြည့်လိုက်တော့သည်။

"ညီတော် ၉ မင်း လူတွေကို ဘယ်မှာ ဝှက်ထားတာလဲ" ဖေ့ကျန်းက မေးလာသည်။

"အစ်ကိုတော် ၇ ပြောတဲ့ လူတွေဆိုတာ ဘာကို ပြောတာလဲ၊ ဘယ်သူတွေလဲ" ဖေ့ကျင်းကတော့ နားမလည်နိုင်စွာ ပြန်မေးလေသည်။