ဉာဏ်များလွန်းသော ခင်ပွန်းသည်

အခန်း (၇၈)

Burmese Translation of Fu Jun You Zhe Dian {夫君，悠着点} by Author 苏行乐.

အခန်း (၇၈)

TRANSLATOR - NC

--------------------

မင်းကြီး၏ စစ်သည်တော်များက ရန်သူတို့ကို သတ်ဖြတ် နှိမ်နင်းကြတော့သည်။

ဘုရင့်ကိုယ်ရံတော်တပ်များက ဖေ့ကျင်း၏ အိမ်တော်ကို ဝိုင်းရံ ကာကွယ်ထားကြပြီး ဘုရင့်စစ်တပ်က ဖေ့ကျန်း၏ ရဲမက်များကို တိုက်ခိုက်ကြလေသည်။

"အရှင်မင်းကြီး၊ သတ္တမမင်းသားအိမ်တော်ထဲမှာ လုပ်ကြံသူတွေ ဝှက်ထားတာ တွေ့ရပါတယ်" နန်းတွင်းကိုယ်ရံတော်တစ်ဦးက လျှောက်တင်လာသည်။

မင်းကြီး ဖေ့ကျန်း ပါးကို ရိုက်လိုက်တော့သည်။

"မင်းကိုယ် မင်း အပြစ်ကင်းစင်တယ်လို့ ပြောရဲသေးတယ်ပေါ့" မင်းကြီး မေးလိုက်လေသည်။

ဖေ့ကျင်းကို အလစ်အငိုက် ဖမ်း၍ ဝင်တိုက်ခိုက်ခြင်းက မိမိကိုယ်တိုင် စွပ်စွဲချောက်ချခံရသည့်အဖြစ်သို့ ရောက်ရစေမည်မှန်း ဖေ့ကျန်း ထင်မထားခဲ့ပေ။ နယ်ရုပ်ကျားစေ့တစ်ခု ဆုံးရှုံးလိုက်သည်နှင့် သူ ကျားပွဲတစ်ခုလုံး ရှုံးသွားခဲ့သည်။ ဖေ့ကျင်းနှင့် ဖေ့ကျင်း၏ မိသားစုကို သူ မသတ်လိုက်နိုင်။ ဖခမည်းတော်က သူ့ကို မယုံတော့၊ သူ့မှာ အမွေဆက်ခံမည့် သားတော်မရှိသောကြောင့်လည်း တစ်ပန်းရှုံးသေးသည်။ ဖေ့ကျင်း ပုန်ကန်သည်ဟု ချောက်ချခြင်းက သူ့အတွက် နောက်ဆုံး ကျားစေ့ဖြစ်သော်လည်း တန်ပြန်ထိခိုက်လာသည်။ သူ မရှုမလှ ရှုံးနိမ့်ရတော့သည်။

ဖေ့ကျန်းက ရှင်ဘုရင်အား ဖေ့ကျင်း၏ အိမ်တော်သို့ တမင် မျှားခေါ်ထုတ်လာသည်ဟု အားလုံးက ယုံကြည်ကြသည်။ ထို့နောက်တွင်တော့ ဖေ့ကျန်း၏ နောက်လိုက်ဗိုလ်ပါများက ဘုရင်မင်းမြတ်ကို လုပ်ကြံပြီး ဖေ့ကျင်းနှင့် မိသားစုကိုပါ သတ်ပစ်မည်။ တာ့တျန်းတိုင်းပြည်၏ ပြည်သူပြည်သားအပေါင်းကိုမူ ဖေ့ကျင်းက ပုန်ကန်ပြီး မင်းကြီးကို သတ်လိုက်သည်ဟု လှည့်ဖြားလိမ်လည်ကြေညာလိုက်မည်။ ထိုအခါ ပြည်သူလူထုနှင့် ရုံးတော် မှူးမတ်ဝန်ကြီးအပေါင်းက ဖေ့ကျန်းကို ပြည့်ရှင်မင်းအဖြစ် လက်ခံလိုက်ရပေတော့မည်။