ဉာဏ်များလွန်းသော ခင်ပွန်းသည်

အခန်း (၇၉)

Burmese Translation of Fu Jun You Zhe Dian {夫君，悠着点} by Author 苏行乐.

အခန်း (၇၉)

TRANSLATOR - SHARR

--------------------

ဘုရင်မင်းမြတ် သွေးအန်သွားသည်။

ဖေ့ကျန်းက သေပြီ။ ဖေ့ကျင်းက တရားဝင်မဟုတ်သေးသော်လည်း အိမ်ရှေ့စံမင်းသားဖြစ်သည်ကို မပြောဘဲနှင့်တောင် သိနိုင်သည်။

နန်းတွင်းသက်တော်စောင့်များက ဘုရင်မင်းမြတ်ကို နန်းတော်သု့ိ လိုက်ပါပို့ဆောင်ကြသည်။

အခြွေအရံများနှင့် အစေခံများက ဖေ့ကျင်းအိမ်တော်ကို သန့်ရှင်းရေးလုပ်နေကြသည်။ သို့သော် ဖေ့ကျန်း၏သွေးများကြောင့် သူတို့ အော့အန်ချင်လာကြသည်။

ဖေ့ကျင်းအိပ်ဆောင်တွင် ရန်ရှီးနဥ်သည် ဖေ့ကျင်းကို ဖက်လိုက်၏။ သူမနှလုံးသားလေးက စိတ်သက်သာရာရပြီး ပျော်ရွှင်မှုတို့ဖြင့် လွှမ်းမိုးနေသည်။ သူမမိသားစုလေးက အန္တရာယ်ရှိသောညမှာ အသက်ရှင်နိုင်ခဲ့၍ စိတ်သက်သာရာရပြီး သူမ ပျော်ရွှင်နေသည်။

"ဖေ့ကျင်း ကျွန်မတို့ နိုင်ခဲ့တာလား" ရန်ရှီးနဥ်က မေးလိုက်သည်။

"အင်း" ဖေ့ကျင်းက ပြောလိုက်သည်။

"ဖေ့ကျင်း ခမည်းတော်ရဲ့ အမိန့်စာက ဘယ်အချိန် ရောက်လာလိမ့်မယ်လို့ထင်လဲ" ရန်ရှီးနဥ်က မေးလိုက်၏။ "သူက ရှင့်ကို ဘယ်တုန်းကမှ အိမ်ရှေ့စံဖြစ်စေချင်ခဲ့တာ မဟုတ်ဘူး၊ အမိန့်စာ လက်ခံရလိမ့်မယ်လို့ ကျွန်မတော့ မထင်ဘူး"

ဖေ့ကျင်း နိုင်ခဲ့သော်လည်း ထူးထူးခြားခြားအောင်နိုင်တယ်လို့ မခံစားရပေ။ သူ ပြတင်းပေါက်အပြင်ဘက်သို့ ကြည့်လိုက်ပြီးအတိတ်ကို ပြန်ပြောင်းအောက်မေ့မိသည်။ သူ ဘယ်အချိန်တုန်းကများ ထီးနန်းပလ္လင်ကို ဂရုစိုက်ခဲ့ဖူးသလဲ သိချင်မိသည်။ သူ့ဦးရီးတော် သက်တော်ထင်ရှားရှိစဥ်ကာလကလား၊ သို့မဟုတ် ဟွမ်းကော်၏ ဆက်တိုက်ဖျောင်းဖျနေတုန်းကလား။

ဖေ့ကျင်း အတိတ်အကြောင်း အများကြီး တွေးမိလိုက်သည်။ သူ့အင်အားကို တိတ်တဆိတ် ကူညီတည်ထောင်ပေးခဲ့ကြသောလူများကို သူ တကယ် ကျေးဇူးတင်သည်။ နှစ်ပေါင်းများစွာ သူ့ကိုယ်သူ ပုန်းကွယ်နေထိုင်ခဲ့သည်။ သူ့ခမည်းတော် သို့မဟုတ် ညီ/အစ်ကိုတော်များက သူ့ပုံစံအစစ်အမှန်ကို ရှာတွေ့သွားလျှင် သူနှင့် သူတို့ကြားတွင် ပထမဆုံးသေရမည့်လူမှာ သူသာဖြစ်သည်။