دارت الدنيا لتدق طبول قلبي

البارت السابع والأربعون

كل احاديث القلب عابرة
الأ احاديثك فأنها بوتين القلب عالقة

وتين القلب

____________

ناهد : هذا صدك يحجي راح يكعد هنا؟

ملاك : وشنو يعني غير بيته..

التفتت علية عاكدة حاجبها..

ناهد : اي عيني شو عادي عندج صعب يجاورنا..

ملاك : شنو تريدين اسوي اطلع اتعارك وياه لو امنعه لو ادخله واسويله عشا ونتعلل سوه ..

ناهد :تقلدين حضرتج؟

ملاك : ماما تره حيرتيني اني شكو جاورنا جاور جهنم شعليه..

عفتها وكمت صعدت فوك اتصلت على ادهم يرن ويفصل وماكو اتصلت على سيلين ماترد اخر شي دست على نفسي وكلت اتصل على ضيغم كل ظني راح يرد بسبب سيلين ومنها اكدر احجي وياه فرصة نتصالح..

طلعت اسمه وكلت بسم الله واتصلت ، رن لحدما فصل ثاني مرة هم خلصت الرنه وماجاوبني الثالثة صار مشغول عرفته حظرني صدك حزت بكلبي وانقهرت يعني مهما يكون اني ام ابنك ليش تقاطعني بيناتنا ولد اذا مو لخاطري لخاطره هو شنو ذنبه ينشأ بوسط عائلة مفككة...

من حلاة روحي اريد واحد يطمني على سيلين اتصلت على تبارك حجيت وياها كالت ماعندي علم عندها ولادة طلبت منها تتصل على ضيغم وترجع تبلغني راحت ورة عشر دقائق اتصلت جاوبتها كالت

تبارك : خابرته يكول بعدها بغرفة الولادة.

ملاك : هو جاوبج؟

تبارك : اي

ملاك : بسرعة جاوب لو تأخر.

تبارك : لا من اول مرة ليش؟

ملاك : هيج مجرد سؤال.

تبارك : ملوكة لا تنقهرين هو الخسران..

ملاك :اخوج ذلني هواي..

تبارك : مو قصده خاف انتِ تحسستي زايد..

ملاك : لا تحسس شنو  توسلت بيه مايعوفني وطلكني ورجعني لهنا ورجع طلكني محكمة رغم هذا حاولت اتواصل وياه ،،ادزله مسجات يقراهن ومايرد اتصل نفس الشي هسه كلت بلكت بسبب سيلين يصير تواصل بس للأسف حظرني.

تبارك : ضيغم طبعه صعب عنودي وخشمه يابس وفوك هذا غيور لدرجة الخبال ولاتنسين وضعه الصحي وخسارته ، وصدكيني هذا مو هسه يصحى على نفسه اصبري عليه شوية وشوفي شلون يتغير.

ملاك : تعبت لشوكت انتظر ، صارلي اشهر اعاني من هجر واهمال وتجريح وتاليها نفاني.

تبارك : ماتعرفين الحكمة من هالشي شنو كلشي يصيرلنا اكو وراه درس نتعلمه ويمكن اختبار وان شاءالله تنجحين بيه وتجتازيه بأقل الخسائر.

ملاك : ان شاءالله تبوكه لا تنسين تبلغيني اي خبر تعرفيه عن سيلين..

تبارك : صار تدللين ..