JUST ANOTHER BOY [ Completed ]

VIII. ( Unicode )

နားထဲမှာ လှိုင်းပုတ်သံသဲ့သဲ့ကြားယောင်မိသလိုရှိတာကြောင့် ပင်လယ်ကြီးကိုသဘောကျတဲ့ရှောင်းကျန့်က ပြုံးမိသွားတယ်။

မျက်လုံးတွေတော့မဖွင့်ချင်သေးဘူး။ ညကအိမ်မက်လည်းကောင်းတယ်။ ဝမ်ရိပေါ်နဲ့သူက သူငယ်ချင်းတွေဖြစ်သွားပြီတဲ့။ ရှောင်းကျန့်က ရင်ဘတ်နားကစောင်ကိုမေးစေ့နားထိဆွဲလိုက်ရင်း ထပ်ပြုံးလိုက်မိတယ်။

ခေါင်းတွေကတော့ သိပ်မကြည်သလို။ အိပ်ရေးမဝလို့ထင်တယ်။ ထပ်အိပ်လိုက်ဦးမယ်။ ဒီလိုမနက်ခင်းတွေကို သိပ်သဘောကျတာပဲ။ စောစောလည်းထစရာမလိုဘူး။ 

ခန္ဓာကိုယ်ကိုတစ်ဖက်စောင်းလို့ ပိုကွေးပြီးအိပ်ဖို့ပြင်လိုက်တယ်။ လူကတစ်ဖက်ကိုလှည့်ပြီးတာနဲ့ စူးရှရှအလင်းရောင်က မျက်နှာတည့်တည့်ကိုကျတယ်။

မှိတ်ထားတဲ့မျက်ခွံပေါ်ထိ စူးရှနေတဲ့နေရောင်ကြောင့်။ မဖွင့်ရသေးတဲ့ မျက်လုံးတွေကိုဖိမှိတ်ကာ မျက်ခုံးတွေကိုကြုတ်လိုက်တယ်။

အာ...စိတ်ရှုပ်စရာပဲ

ဒါပေမဲ့ အနှောင့်အယှက်ပေးနေတဲ့နေရောင်ကခဏတာလေးပဲဖြစ်တယ်။ အိပ်မရအောင် ထိုးနေတဲ့နေရောင်က ရှောင်းကျန့့်ဆီက ခွာသွားတယ်။

စူးရှနေတဲ့အလင်းရောင်ပျောက်သွားတာကြောင့် ရှောင်းကျန့့်ရဲ့မျက်နှာမှာ ကျေနပ်ရိပ်ကလေးပေါ်လာတယ်။

အင်း...သဘောကျတယ်

ရှောင်းကျန့်က မှိတ်ထားတဲ့မျက်ခွံတွေကို ဖြည်းဖြည်းချင်းဖွင့်လိုက်တယ်။ မျက်စိရှေ့မှာ လိုက်ကာပိတ်ဆွဲထားတဲ့မှန်တံခါးရှိနေတယ်။ တစ်ဖက်ကုတင်ကိုကြည့်တော့ လူမရှိဘူး။ ထပ်ပြီးအကြည့်တွေဝေ့ဝဲကြည့်လိုက်တော့ ကုတင်ခြေရင်းက အဝတ်အိတ်နားကခုံမှာဝမ်ရိပေါ်ကိုတွေ့လိုက်ရတယ်။

ဝမ်ရိပေါ်က တဘက်အဖြူကိုပုခုံးပေါ်တင်လို့ ထိုင်ရာကထလာတယ်။ ဘာလို့မှန်းမသိ ဝမ်ရိပေါ်က သူ့ကို အစောင့်အရှောက်နတ်သားလေးလိုမျိုး စောင့်ကြည့်ပေးနေတယ်လို့ ခံစားရတယ်။

"မောနင်း ရှောင်းကျန့်"

ရှောင်းကျန့်ကို ကြည့်ကာထိုတစ်ခွန်းပြောလို့ ရေချိုးခန်းထဲဝင်သွားတယ်။ ဒါပေမဲ့ ရှောင်းကျန့်က ဝမ်ရိပေါ်ရဲ့မျက်နှာပေါ်က အပြုံးနုနုကို မြင်လိုက်သေးတယ်။