#خذني_بعيدا
#الكاتبةورودالخالدي
البارت١٠
اسمهان:::
نزلتني السيارة بكراج الكاظمية القريب من سوك للسربادي القديم هذا السوك اعرفة لان من جنت زغيره بابا جابني لهناولان اني ما اطلع من زمان فما اندل وما اعرف اي طريق اروح بيه للامام وسألت مريه شايلة طفل:
خالة منين اروح للامام
صعدي تكسي ..اذا مستعجلة..واذا ممستعجلة تره موبعيد روحي مشي
ها شكرا .بس خاله اني مو كولش اندل يعني منين افوت اذا اريد اروح مشي..
خاله هذا السوك هنا نهايته اليم الكراج طلعي بالسوك طول من تخلصي يعني توصلين لبداية السوك وبس توصلين هناك الامام يصير كبالج مباشرة!
مشكوره خاله
وفعلا مشيت بشارع السوك .. وقبل ما اخلص السوك دك تليفوني طلعته من الجنطة شفت رقم اكرم..يربي شكوله....لا ما ارد عليه ..وفعلا بقيت امشي الى ان خلصت الرنه...وصلت يم محل يبيع سبح وعبي ..هم دك مرة ثانيه فكرت انطي رفض واغلق الجهاز بس منطاني كلبي وكفت يم المحل لان مجان عليه احد والمكان اهدأ من بقيه شارع السوك فرديت عليه
الو
اول مسمع صوتي كال بعصبيه:
اسمهان ..لوين تردين توصلين بتصرفاتج هاي يعني البارحة كلبتي البضاعة وخربطتي المجمع ورحتى وغصبا عليه كعد ارتب ٣ساعات وراج والعصر مجيتي عفتيني لايص وحدي ويه الزبونات..وهسه الساعة فوك العشره وانتي ماكو..شنو ادورين حجج حتى تبطلين من الشغل وحتى اذا ادورين حجج فهاي متفيدج اذا متجين هسه للشغل ..معندي مانع اجيج للبيت واجيبج كوه
من سمعت صوته متحملت اضم عليه فكتلة
اكرم اني..مو بالبيت!!
مو بالبيت؟..لعد وين؟؟
اني..اني انهزمت..من بيت اهلي..!
شنو..شكلتي!؟
انهزمت!!
لج تتشاقين لو تحجين صدك؟؟
والله انهزمت..
حسيته اختنك وميكدر يرد بس هو كال بصوت متقطع ومبين حيل معصب:
ش..شوكت ..شوكت انهزمتي..يعني من البارحة اسمهان من البارحة انتي طالعة..واذا من البارحة وين خلصتي الليل..!!؟؟
اكرم
انعل صفحة ابو اكرم لج احجي وين بايته..او ..وين انتي هسه
اني..هسه بالسوك بس اني ..مطلعت من البارحة يعني مبايته بره ..اهده اكرم..
مبايته بره؟؟!!
اي والله اكرم..صارلي اقل الساعة من طلعت من اهلي
.الحمد لله..وين انتي هسه احجي بيا سوك؟؟
