Unicode
Killing The Love I Hate Chapter 6
ထို့နေ့က မိုးသားကားပေါ်မှဆင်းသွားပြီးနောက် ညဘက်အတော်လေးနောက်ကျမှသာအိမ်ကိုပြန်ရောက်လာခဲ့သည်။ ကြီးကြီးမေက သူ့အပေါ်မယုံကြည်သည်ကို စိတ်ဆိုးနေသောကြောင့် မိုးသားမည်သူ့ကိုမှစကားမပြော။ အိမ်ပြန်ရောက်သည်နှင့် ထမင်းလည်းမစားဘဲ သူ့အခန်းထဲဝင်၍သာအောင်းနေသည်။ ညဘက် နှင်းရည်အေးက ထမင်းသွားပို့ပေးသည့်တိုင် မိုးသားက တံခါးကိုပိတ်ထားသောကြောင့် သည်အတိုင်းသာလှည့်ပြန်ခဲ့ရသည်။
ငွေယံ ကတော့ စာအုပ်တစ်ဖက် မုန့်တစ်ဖက်နှင့် စာလုပ်နေပြီး စာလုပ်ပြီးသည့်တိုင် ဗိုက်ကဆာနေသေးသောကြောင့် ဝက်သားဟင်းနှင့် ထမင်းသုံးပန်းကန်လောက်ဆွဲလိုက်သေးသည်။ ထို့နောက်မှအိပ်ခါနီး ပြတင်းပေါက်ပိတ်ရင်းအပေါ်ကိုမော့ကြည့်လိုက်တော့ မိုးသားအခန်းက မီးမှောင်ချထားသည်ကိုမြင်လိုက်ရသည်။ အပေါ်ကိုမော့ကြည့်နေရင်း ရုတ်တရက်လိုက်ကာစ က လှုပ်သွားသောကြောင့် ငွေယံ ပြူးပြဲကြည့်နေသော်လည်း မှောင်နေပြီမို့ ဘာကိုမှသဲသဲကွဲကွဲမမြင်ရဘဲရှိလေသည်။
သို့ကြောင့် ငွေယံမှာ တံခါးကိုပိတ်ကာအိပ်လိုက်ချေတော့၏။
နောက်နေ့မနက်ရောက်တော့ ငွေယံသည် ယမန်နေ့က မိုးသားကျန်ရစ်ခဲ့သော လွယ်အိတ်ကိုပိုက်ကာ မိုးသားတို့အိမ်ထဲဝင်လာသည်။
"ယံယံ..."
အိမ်ကိုဧည့်သည်ရောက်နေသောကြောင့် နှင်းရည်အေးက ငွေယံ့ကို ခပ်တိုးတိုးခေါ်လိုက်သောအခါ ငွေယံသည် အသာလေးဧည့်ခန်းကိုကျော်၍ထမင်းစားခန်းဆီလျှောက်လာသည်။ ဧည့်ခန်းဘက်လှည့်ကြည့်လိုက်စဥ်က ကြီးကြီးမေနှင့်စကားပြောနေသည့် သူတို့ကျောင်းမှ ကျောင်းအုပ်ဆရာကြီးကိုမြင်ခဲ့ရသည်။ ရုံးခန်းထဲတွင်သာတွေ့ရလေ့ရှိသော ကျောင်းအုပ်ကြီးသည် ယခုတော့ မိုးသားတို့အိမ်ကိုစောစောစီးစီးရောက်နေသည်။ ထိုဆရာကြီးရောက်နေခြင်းမှာ အခြားကြောင့်မဟုတ်ဘဲ မိုးသားကိစ္စကြောင့်သာဖြစ်ကြောင်း ငွေယံ သိလိုက်၏။ မိုးသားကမည်သို့ပင်မလုပ်ဘူးဟုဆိုစေကာမူ မိုးသားဖြစ်ခဲ့သောကိစ္စသည် သေးငယ်သောကိစ္စမဟုတ်ပါ၍ လွယ်လင့်တကူကျော်လွှားသွားနိုင်မည်မဟုတ်ကြောင်းလည်း ငွေယံခန့်မှန်းမိလိုက်သည်။
YOU ARE READING
Killing The Love I Hate (BL OC) COMPLETE
Romance"ငါက ဘာမှမဟုတ်ပါဘူးယံယံ.....ဘာမှမဟုတ်ပါဘူး...ဒီအတိုင်း....မင်းမျက်နှာပေါ်ကိုကျနေတဲ့နေရောင်ခြည်လေးတွေကအစ မင်းကိုင်သောက်တဲ့ဝက်ဝံရုပ်ရေသန့်ဘူးလေးအထိ မနာလိုလိုက်ဖြစ်နေမိတဲ့အရူးတစ်ယောက်ပါပဲ...ငါကဘာမှမဟုတ်ပါဘူး....ဒီအတိုင်း မင်းကို မချစ်ဘဲ ဂရုမစိုက်ဘဲမနေန...