" ١٢:١٣ ┊ -تتفكري في هديكـا الليلة الهادية بتاريخ أكتوبـري ، تحت ضي القمر اللي لما شافـك أندس ورا الغيوم وخلا المكان ليك مِن حيرتـه كيف تكون ليلة فيها قمرين ، في الشرفـة اللي إنـارتها خفيفة ومعبية بـ زريعات الريحان والأقحوان والنعناع الفواح ، كرسين كـانوا يطلوّا على بعض ، روحي وروحك ، أنتِ وجمالـك اللي ساندتيه بكفـة يدك وتتأملي في النجوم وتحكيلي قداش ما هُما حلوين وقداش ما يعجبوا فيك ، وأنـا اللي مقدرتش نعدهم معاك لأن عيوني مش راضيين يخلوك ثواني على بعضهم مِن غير ما يتعبوا بـيك ، عُمري ما حننسى نظرتك ليـا اللي رميتيني بـيها ومعاها ضحكة منك تـاخد العقل وخلوا قلبي يخش في حالـة إغماء لثواني لما سألتيني عليش سارح فيا هكِ؟ صدقيني أنـا بروحي منعرفش الجواب.. ممكن لأنـك حلوه فوق مِن اللزوم؟ ولا ممكن لأن عندك عيون شبحه منهم تنسي حتى الهوية؟ ومرات لأن عندك مخزون مِـن الرقة واللطف طاغية على العالـم كُـلا؟ ولا نقولـك فوتي الأسباب هادم كلهم عندي سبب أقوى.. لأني نحبـك !"
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
