#part ١ ,
الكاتبة فاطمـَه آل كريـَم ،
...... 😔 قدري بلا رحمة 💔 ......
بـــــارت قـــــصير كـ بداية وتعريف للقصه ❤️
___
سنة الـ ٢٠٠٣ شهر الـ ٣ بغداد :
كعدت الصبح على صوت مشاكل وعياط تعودت كل يوم اصبح على هالصوت
كمت اشوف منو وشصاير من مشكله جديده
شافتني امي صاحت رحت بأتجاه
- روح جيب شكر من فوك
رحت جبت اله ورجعت اسمع ابويه يصيح وي امي
- ماكو روحه مو بكيفج
امي كاعد تسوي بالاكل
ضلت ساكته من حجه هيج ابويه
جان يوم جمعه ما عندي مدرسه
شافتني امي كالت
- كوم ادرس
- اي حاضر
ضليت اقره لوقت طويل صارت دنيا ليل واسمع ابويه يعيط
- كم مره كتلج لا تروحييييين لبيت اهلي كم مرررررره
- ليش مو همه نفس اهلي
- مااااكو روحه ما دام اني ما احجي وياهم انتييييي همم
اباوع على امي سكتت ودنكت
ضجت اشوف ابويه شلون يعيط على امي بس مكدرت احجي وياه لأن عصبي وجان عمري هنا 12 سنة
......
سلام عليكم ،
اسمي زين العابدين من مواليد 1991 اني الوسطاني لأهلي عندي اخت اسمها قمر من مواليد 1988
واخويه علي من مواليد 1997
......
دخلت قمر جانت طالعه عد بيت جدو شافها ابويه هجم عليها وضل يضرب بيها رأساً ركضت ادافع لأختي واخلصها من ضرب ابويه جان قوي واضخم مني مكدرت اسحبها منه ومن الزم ايده يكلي :
- وخرررر معليككك
ضليت احاول افكها من ايده وسحبتها حيل من شافني هيج عاف اختي واجه عليه ضربني
مشكلة ابويه وي اهله
جان يكفر ويعيط على بيبيتي الي هيه امه ضل يكرر هالاشي لحد مطردها من البيت امي جانت كلش تحب بيبيتي
فـ امي من شافت ابويه طرد بيبي زعلت واخذتنا وراحت لبيت اهلها
بعد فتره رجعت امي لأن ما بيدها حل غير تتحمل ابويه
ضل ابويه صياحه ومشاكله يومية حيل اضوج وانقهر من اشوفه يصيح على امي ويوميه اسمع امي تبجي وما بيدي شي عليها
وهذا احد الاسباب الي جانت تخليني اصير قاسي وي الكل
.......
امي اسمه نعمة من مواليد 1951
مديرة مدرسه
ابويه اسمه طلال من مواليد 1950
ممرض بالمستشفى
.......
كعدنه ثاني يوم دوام وكالعادة ابويه وصياحه ومناكر من الصبح
صبحت على امي
- صباح الخير يوم
- صباح النور
حجه ابوي :
- لازم احنه منعجب وصبح علينه
باوعتله بطارف عيني بتذمر
شافني هيج اباوعله كام وضربني راشدي
من شافته امي ضربني اجت ضلت تصيح
ضربها ابويه
اجت قمر حضنتيني وتبجي
- الله عليك اسكت لا تحجي
طبطبت عليها وبستها من راسها وسكتت ما اريد اضوجه اكثر
بدلت قمر وامي وطلعنا للمدرسه اني من جهة وقمر من جهة وامي بنصنا رحنا لمدارسنا قمر متوسطه مدرستها بصفنه فـ نروح سوه ونرجع سوه
خلص اليوم من دروس وتعب
رجعنا للبيت وبدلت حضرت امي الغده كعدنه ناكل حجه ابوي
- قمر صارت جبيره بعد ماكو دوام
جاوبت امي
- لا تريد تكمل هذا مستقبلها وحلمها تريد تصير مهندسة معمارية
- لا بابا اريد اكمل واريد احقق حلمي
ضل يصيح ابويه
- كاافي كلت ما داوم يعني ما داوم لا تناقشوني بهذا الموضوع
وكام من على صينية
ضلت تبجي قمر واني ضليت اهدي بيها
- اسكتي لا تبجين معليج اني اقنعه
- مو خاف ما يقبل
- خليها يمي
كمت من يمها ورحت على ابويه
- يابه انته ليش تريد تبطلها خطيه هذا مستقبلها وتريد تحقق حلمها لتكسر بخاطره
- ما عدنه بنيه تكمل دراسه
- بلي بابا تكمل
- ابن الكلب شنوووو تكسررر كلمتي
بعصبية وعياط
- لا بابا بس خطيه وانت شنو شايف عليها !
- افكر بالموضوع
- يابه يعني داوم
- - - - - - - - - - - - - - - - - - -
يتبع ....
رئيكم بأول بارت للقصه ؟
تصويتكم للقصه 🤍.
كلمات البارت :
٥٣٨ كلمة
YOU ARE READING
قدري بلا رحمة
Mystery / Thrillerاولاً القصه حقيقية ، تتكلم عن رجل ثلاثيني دكتور جراح ، وعى على مشاكل من صغرهُ ، تبدأ قصتهُ وهوَ في الثانية عشر من عمره ، عندما تركه والده وبقي مع امه وإخوانه ، تحداه والده ومن هنا بدأت معاناتة ، في مكان آخر حبه لـ بنت خالته ، وفي مكان اخر حُب اخته...
