"ကိုယ်တော့် ဝမ်ကို အပစ်ပုံရအောင်ထိ မယ်မင်းက သိပ်ကိုအတင့်ရဲနေပါရောလား...."
စစ်ဆေးရာနေရာအထိ လိုက်လာတဲ့ ရှောင်းဘုရင်ကြောင့် အခန်းတွင်းရှိသူအကုန် ထိတ်လန့်ကြောက်ရွံ့နေရသလို မိဘုရားခေါင်ကြီး ယန်လီမှာလဲ အံ့ဩစိတ်တို့ဖြစ်နေရသည်။
"မောင်တော်..."
ယန်လီခပ်တိုးတိုးခေါ်လိုက်တော့
"အမတော် အသာနေ...."
အခုလိုအော်ဟစ်ဖို့ဝေးစွ။လေသံမာမာနဲ့တောင်မဆိုခဲ့ဘူးတဲ့ မောင်တော်မင်းကြီးကြောင့် ယန်လီဝမ်းနည်းစိတ်တို့ ဖိတ်လျှံလာရ၏။
"မှန်ရာကိုဖြေမလား....အသက်အသေခံမလား...."
လက်သုံးတော်ဓါးကို ဆွဲထုတ်ကာ နန်းတွင်းသူလေးရဲ့လည်ပင်းပေါ်တင်လို့ မေးမြန်းနေတဲ့ မောင်တော့်အား ယန်လီမမြင်ဖူးသူတယောက်လိုသာ ငေးကြည့်နေမိသည်။
"စိုး...စိုးရွံ့လှပါတယ်....အရှင်....အသက်...အသက်ချမ်းသာပေးပါ...."
ရှောင်းဘုရင်ရဲ့ အမျက်ဒေါသကြောင့် တုန်တုန်ယင်ယင်နဲ့ အသက်ဘေးလွတ်ဖို့ရာသာ တောင်းပန်ခယနေသူ အပျိုတော်အား
"ဖြေစမ်း....ဘယ်သူပြောခိုင်း လုပ်ခိုင်းတာ...."
တခွန်းမေးလိုက်တိုင်း လည်တိုင်မှာတချက်နစ်ဝင်သွားတဲ့ဓါးချက်ကြောင့်ရော ရေမြေ့သခင်ရဲ့ ပြင်းရှလှတဲ့ အာဏာစက်ကြောင့် သေခါမှ သေရောဆိုတဲ့စကားရပ်ကို နှလုံးမူလို့
"မြောက်ဆောင်တော်မယ်မယ်ပြောခိုင်းလို့ပါ....ကျနော်မျိုးမကိုအသက်ချမ်းသာပေးပါ....သေလောက်တဲ့ ပစ်မှုကြီး ကျူးလွန်မိပါတယ် အရှင်မင်းကြီးဘုရား...."
နန်းတွင်းသူလေးရဲ့ စကားသံအဆုံး စူးရှလှတဲ့ ရှောင်းအရှင်ရဲ့ ဒေါသမျက်ဝန်းတို့က ယန်လီနောက်မှာ ရပ်နေတဲ့ ရွှင်လီထံဆိုက်ရောက်လာသည်။ ကာယကံရှင်ရွှင်လီ မဆိုထားနဲ့ ဒီအရေးနဲ့ဘာမှမသက်ဆိုင်တဲ့ နန်းမတော်ကြီး ယန်လီပင် ရှောင်းဘုရင်ရဲ့ စူးရဲလှတဲ့ မျက်ဝန်းများကြောင့် ထိတ်လန့်တုန်လှုပ်သွားရသည်။ ရွှင်လီမှာမူ ပြောဖွယ်ရာမရှိ။အလန့်ကြီးလန့်သွားရကာ နန်းမတော်ကြီးနောက်ကို ကွယ်လိုက်မိသည်။
YOU ARE READING
ချစ်သူ့ရွှေစင် သူ့ရုပ်သွင်ကို(ခ်စ္သူ႕ေ႐ႊစင္ သူ႕႐ုပ္သြင္ကို)
Historical Fictionကျွန်မတို့ ရာဇဝင်ဘက်ကို တစ်ခါေလာက်အတူသွားကြရအောင်လား။ကြၽန္မတို႔ ရာဇဝင္ဘက္ကို တစ္ခါေလာက္အတူသြားၾကရေအာင္လား။
