مجموعة اسكربيتات

ام. البنات

يلا عيني ياحرام دول بنات وملهمش أخ ولد ياخد باله منهم ويكون سند ليهم!!
!
- الحقيقة طظ في كل واحد بيقول الجملة دي .. عارفين ليه؟
- ببساطة لإن أيام المدارس العربيات الصبح بتبقى كلها أمهات بيوصلوا ولادهم المدارس🏢 ..
- المستشفيات والعيادات 🏨 كلها أمهات مستنية مع ولادها علشان التطعيم أو الكشف ..
- السوبر ماركت مليان ستات بتجيب طلبات البيت ..
- فى العادى .. النوادي مليانة أمهات مطحونة في تمارين ولادها وأمهات تانية خلصت تمارين وقاعدة بتذاكر لاولادها وتحل معاهم الواجب ..
- المدارس مليانة أمهات بتتابع ولادها وتروح تقابل المدرس اللي بيشتكي من مستوي ولادها وتسأل ع الرحلة إمتى والمنهج هيخلص إزاي 💁‍♀️؟ ..

وبعد دة كلة تلاقي الست اللي عملت كل ده ناجحة في شغلها وفى بيتها ..

حضرتك البنات هى اللي بتخلي بالها من أخوها ومن أبوها وأمها ومن ولادها وجنب كل ده بتخلي بالها من نفسها ..

البنات اللي بتشيل أمها وأبوها في تعب السن الكبير وفي مرضهم وتستنى معاهم في العيادة بالساعات وتقعد جنبهم في المستشفي بالأيام و من غير أوف واحدة حتى من جواها ..

البنات هي اللي بتحافظ على العيلة والبيت..

البنات هي اللي بتستحمل وتصون وتعدي عشان الحياة تفضل قايمة وماشية ويفضلوا ولادهم وسط أب و أم .. ولما البيت بيتهد والأب بيمشي بتفضل مكملة لوحدها وتستحمل وتربي وتكبر من غير شكوي ولا ملل ..
- البنات اللي بتعمل كل و أي حاجة حواليكم ..

الأخوات الولاد اللي ملهمش أخت بنت هما اللي يستحقوا جملة "يا عيني دة ملهمش أخت بنت" ..
لان بإختصار وبكل صراحة البنت هي الحماية والظهر والسند لكل اللي حواليها ... البنت هي الحياه بكل تفاصيلها ..

تحية لكل بنت و سيدة ✋💕

حكايتى هتبدا من هنا انا ام لتلت بنات انا اتحوزت وخلفت تلاته  هما قرة عينى هما روحى اللى بتنفس بيها عندى
ملك 22 سنه فى كلية التجاره
واسماء 20سنه فى كلية الهندسة

امل ودى بقى اخرة صبرى حته من قلبى فى تالته اعدادى

اه وانا اسمى حنان
زوجى اسمه عبدالرحمن رجل طيب بيحب بناته اوووى ونفسه يوصلهم للبرالامان ويطمن عليهم بس للاسف القدر مااملهوش لده وتوفى مع ولادة امل وكل الناس وشها وحش على وبذات جدتها من باباها وعمتها انا علشان بنتى نفسبتها متتعبش سيبتلهم الشقه بتاعتى وروحت سكنت بره لانهم قالولى انتى هنا قاعده مالكيش حاجه علشان جوزك مات وابوه عايش طبعا انا علشان مش بحب المشاكل خدتها من قصيرها ومشيت واخدت شقه بعيد عنهم وعن بقيت العيله وقلت اربى بناتى نزلت اشتغل ولان ربنا هبانى هوايه الخياطه اشتغلت فى مصنع للملابس وبفضل الله اخدت مكانه كويسه وعرفت ناس فى المصنع كويسين وطبعا كل اللى يعرف ان انا معايا بنات بس يقوليلى ياعينى ياحبيبتى ربنا يعينك يامخلفه البنات ياشايله الهم للممات انا ارد عليهم اقولهم يامخلفه البنات ياواكله الخلويات يام القشطات ياللى مش هتشيلى هم الممات هتلاقى اللى هيشيلك ويطبطب عليكى وكان ليا زميله فى المصنع مصره تنادى عليا باسم جوزى عبدالرحمن وتقولى ياام عبدالرحمن
انا اقولها لا ياحبيبتي انا ام ملك وام اسماء وامل