جئت اليك لا أدري

البارت الثاني

(وجئت اليك لاادري)

         الكاتبات : نور وزينب

             البارت الثاني
*********
ما زلت يا امى اخشى الحزن ان يستل سيفا وسط الظلام و أرى دماء العمر تبكى حظها وسط الزحام فلتذكرينى كلما همست عيونك بالدعاء ألا يعود العمر منى للوراء
ألا أرى قلبى مع الاشياء شيئا من شقاء واضيع فى الزمن الحزين
واعود ابحث عن رفيق العمر بين العاشقين واقول .. كان الحب يوماً
كانت الاشواق كان .. لنا حنين .
*********

فتحت الباب وجان اشوف جيران جدد حطوا مقابيلنا البيت متروك من زمان لان اهله مسافرين بس جان بيت حلوو يجنن من خارج جنه قصر بي ثلاث طوابق  وبعد الله اعلم من داخل شنو..

درت وجهي وجان اشوف باتمان قصدي صبيحه صدك جنها مجدايه من شكلها وعبايتها الي واصله لركب رجلها ومزرفه ....

اووف والله دومها مفشلتنا .. ونوبه شفتها وكفت وصفنت على بيت جيران الي حطوا جدد حقها تصفن اغراضهم مال بيتهم جنها ذهب ودخلت قبل لا تشوفني ومالي خلكها ...

رحت للمغسله اتوضى ودخلت صبيحه  وشافتني كالت هاا  وذن  ....

كتلها اي أذن بدون مااباوعلها ... اجت وكفت للمغسله تريد تتوضى ضحكت بكلبي تصلي وتصوم وتاكل فلوس يتيم الك الله ياليتيم

كالتلي شفتي الناس الي حطوا جدد مبين طاكين وعدهم فلوس واصلين للستار ...

باوعتلها بطرف عيني كتلها الله يرزقهم ..

كالت ويرزقنا ، بس ردت باجر ترحينهم وتشوفين خاف يردون عامله تنظف بيت ...

ردت ابجي وكتلها بعصبيه ماعندي وكت ترى اطلع من ساعه ٨ وارجع ساعه ٣ انظف خمس بيوت .. لو ترديني اشتغل بالليل

باوعتلي كالت خوش فكره ليش ماتشتغلين بليل بيت مقابيلنا شمره حجاره وتوصلين  وهم نزيد الراتب ...

ردت انفجر بوجهه ونوبه سكتت تريد تشغلني بليل كتلها توضي بيبي وادعي بلكي الله يدخلج الجنه ورحت عنهاا . ...

يارب افرجها والله تعبت عمري ١٨ سنه وخلصت  خمس سنوات من عمري وانا انظف بالبيوت والله حتى استحي من بنات من اشوفهن بالشارع رايحات للمدرسه وانا رايحه انظف ...

وماايقهرني ويضوجني من اشتغل بالبيوت وبنات بكدي يباوعلي من طرف عينهن ويتأمرن علي بس اكول الحمدلله على اقل عايشه ومستوره .....

صليت ورحت اسوي عشه وتعشينه ونمت وخيالي راح لأبن جيران ابو تسريحه ديج اسمه تيسير يشتغل سايق تاكسي لمدرسه مال بنات ، ابدد مايباوع لوجهي لان يعرفني اشتغل منظفه بلبيوت بس اشوفه دائمن يضحك ويا بنات ،، بس ابو مشاكل دومه يعارك بالشارع مره سمعت بيبيتي تكول عوينجي وموزين بس انا اشوفه ثكيل ،، يمكن بس عليه ثكيل ضحكت طبعا ثكيل عليج جا تردينه يباوعلج لو يزوجج وانتي من بيت لبيت تنهدت  ونمت...

كعدت صبح صليت وتريكت  ولبست عبايتي والبركع ..حتى من اشتغل ماانزع البركع مالتي اذا اهل بيت موجودين ورحت اشتغل ورجعت لبيت وسويت غده تغديت .. وخليت لصبيحه قصدي بيبيتي من تجي تتغده ورحت سبحت وطلعت و ذبيت روحي بالفراش ونمت نومه طويله لان احس ظهري متكسر من شغل...

نمت وكعدت بوكت الاذان مغرب ولكيت صبيحه بعدهي ماراجعه رحت توضيت وصليت وماسويت عشه لان اكل بقى من غده نتعشى بي ...

سمعت باب يدك وطلعت وضليت وره باب كلت منو ...

سمعت صوت ولد خشن كال موجوده ام بيت كتله لا بالشغل ضحكت على روحي ياشغل رايحه اله هي كلها خلك مجدايه ...

كال اذا اجت كليلها بيت جيران جدد مقابيلكم يريدج بشغله ... صفنت كتله ان شاء الله وراح

فتحت باب شويه واشوف واحد طويل بس طوله متوسط واشكر ... كلت بكلبي روحي ياصبيحه الناس شكر تسأل عليج ضحكت  وسديت باب ودخلت  ...

بيت وحشه وحدي  مكابله حيطان وكاعده حتى صبيحه اشوفها مرات وكت الاكل مرات اتعجب على روحي شعجب ماصار بيه توحد لو حاله نفسيه اريد احجي اريد اضحك بس ويامن وياصبيحه الي ماتريد تكابل وجهي  ...

لاعندي صديقه ولااعرف احد تنهدت واتذكر قبل من ابوي عايش مايخليني اشتغل او طبخ  جان مدللني ، مع علم جان عمري ١٠ سنوات بس اشوفه من يجي من شغل تعبان ويسوي الاكل اتمنى اسوي بداله بس يخاف علي احترك من طباخ  ...

مسحت دمعتي من سمعت باب ينفتح ودخلت صبيحه هي وعبايتها الي جنها برموده  ...

باوعتلي من طرف عينها كالت اليوم تستلمين راتب اطوج كتلها ايي...

كالت روحي جيبيهن لفلوس ... كتلها ترى ماطايرات فلوس روحي بدلي اتوضي وصلي واتعشي واطيج ... كالت بعصبيه وانا انتظر كل هاي علمود اجيبين لفلوس غير اغص بلكمه قبل لااشوفهن .....

تنهدت وكلت بكلبي رجلج واصله بالكبر ادري شنو سوين بلفلوس تشترين جفن لوتابوت لو كبر  ....

رحت جبتهن لفلوس وكعدت مددت تحسب بيهن  خاف ناقص ربع منهن ..... حسبتهن وخلصت وراحت لمخزن لان تضم فلوس بلمخزن ...

مخزن صاير جوه درج وصغيرر كلشش ومفتاح مخزن عدها...

طلعت من مخزن ، وراحت اتوضت وصلت وكالت روحي صبي عشه ، رحت صبيت عشه وكعدنا نتعشى..

واتذكرت ابن جيران اشكر ... وكتلها ابن جيران جدد حطوا مقابيلنا اجو وسالوني عنج كتلهم مو هنا كال بس تجي كليلها محتاجينها بشغله ...

غصت بلكمه وكلت راح تموت اطيتلها ماي اخذته وشربت ..

كالت بس لايطلبون منا طحين لوشكر لو تمن او شي كليلهم ماعدنا  ....

كلبت عيني من فوك كلتها مااعتقد لان ماطلب مني ...

سكتت ورجعت تاكل كالت باجر مااروح لشغل  اشوفهم شنو يردون  ، ورحت سويت جاي وصبيت جاي ورحت غسلت ماعين ، ورحت مددت فراشي وصفنت ماعندي هواية او ولاتلفزيون بالبيت ولاتلفون  اكعد اتونس بيهن كلش ضايجه اريد اعرف وين تنتهي حياتي وشنو يصير بعدين قريت الفاتحه لأم بنين ونمت  وتحلمت بأبوي صافن بوجهي ويبتسم الي ....               
❤
❤
❤ 
تفاااااعلجن بنااات 😘❤