أتصدمت وللمره المليون في نفس اليوم ..دا حقيقي ؟فارس أنت ازاي عملت كدا ، أزاي قدرت تجيب أمي بجد ؟!
بصيتله وأنا مصدومه كليا ، أزاي قدر يجيب كل دول من مصر وأبويا معرفش إن هما جايين ليا ؟ بعد ما أعلن خبر موتي ؟ وبقيت في نظرهم ميته ؟ يعني أنا فعلا عايشه بالنسبالهم ؟ أنا مش فاهمه اي حاجه
لقيت فارس بينفذني من كل الحيره اللي أنا فيها لما قال
فارس :" ياسمين حبيبي ، سيبك من كل حاجه ومتفكريش غير في الفرح وبس ، متخليش أي حاجه تزعلك في اليوم دا بالذات ، اليوم دا اللي هنبدأ فيه حياتنا ، عايز نبدأها وأنتي مبسوطه ، وعارف كمان ان كل حاجه جت بسرعه وانك متلغبطه ، بس أنا حاولت قدر المستطاع اني أجيب عيلتك عشان متحسيش بنقص ..
ياسمين :" طب وشهد ، أنت مش هتكون جنبها ازاي ؟
فارس :" شهد وسط اصحابها ونص ساعه بالكتير وهتسافر امريكا مع باسم يقضوا شهر العسل هناك يعني خلاص البيت هيفضي علينا يا جميل ..
لقيته بيغمزلي في الآخر ، وحسيت بحراره هتنفجر من وشي ، اي دا ؟ هو أنا بتكسف ؟ دا الشمس بتتكسف وأنا لأ ، معقول جه الوقت اللي أتكسف فيه ، احم ايه دا حط ايده في وسطي آه يا قليل الادب ..
لقيت ماما جايه بتحضني وهي بتعيط ، ولقيتها بتقول لفارس :" أنا مش هزعقلها عشان أنت حلفتني إني مزعلهاش في يوم زي دا علي عملتها السودا ، بس علي أد ما أنا زعلانه منها علي عملتها علي قد ما أنا مبسوطه أنها عرفت تختارك ، أنت سيد الرجاله كلهم يا فارس ، راجل بمعني الكلمه ، أنا هرجع مصر بعد ساعات واحتمال مشوفهاش تاني ، أنا أمنتك علي بنتي يا ابني فـ خلي بالك منها وحطها في عنيك ..
لقيت فارس عمل حاجه متوقعتهاش بصراحه ، لقيته باس راس أمي ووطي علي ايديها وباسها وقالها :" متقلقيش يا أمي ، ياسمين في العين دي قبل العين دي ، هحطها في قلبي وهقفل عليها مش في عيني ، وانتي عارفه ان قلب الراجل لما بيدخله واحده ست مش بتخرج منه أبدا ..
هو أنا قولتلكم اني بحبه اوي ، لقيته بيبصلي وبيمسح دموعي اللي غرقت وشي وبيوس راسي وبيقولي :" الحمد لله انك متقلتيش في الميكب عشان لما تعيطي بالشكل دا مخفش منك ، اصل المثل بيقول ايه ، امسح ميكاج صاحبتك تلاقي سيد ابن عمتك ..
ضربته علي صدره جامد فضحك ، وضحكته خطفت قلبي لقيته قالي بكل حنان الدنيا :"
فارس:" بهزر معاكي ، أنا بحبك يا ياسمين بحبك اوي فمتزعليش مني لو زعلتك قبل كدا ..ومش عايزك تندمي انك اتختارتيني .
ياسمين :" أنا عمري ما زعلت منك أبدا يا فارس . وكنت هندم بجد لو مجتش معاك ، أنا مش ندمانه ابدا يا فارس ..ولا هندم في المستقبل ان شاء الله ..
لقيت أمي حضنتنا احنا الاتنين وباركتلنا وراحت قعدت ولقيت رفعت أخويا جاي وهو شايل نونته وبيوريهالي وبيقولي :" اتفضلي ياعمتو شوفي بنت اخوكي ياسمين ..
