خطايا القلوب

'الحلقة الرابعة'

#خطايا_القلوب
عنوان الحلقه :  'بداية مُعتمة'

﴿ وَآمَنَهُم مِّنْ خَوْفٍ ﴾.
يمكن هالاية تكون رسالة قلوبكم الجميلة،، ربنا ما يترك بشر، ابد ما يترك بشر يلتجئ اله، اي خوف و اي ألم بداخلك اذا طلعته كدام بشر هتتاذى ضعف في يوم ما و في موقف اي شي يخوفك ياذيك احجيه اله .. وحده، هو يعرف بكلشي بس من تعوف كل البشر و تحجي اله و تطلب منه؟
هنا راح تُجبر جبر يتعجب له اهل السموات و الارض
راح تفتخر بروحك و الأهم مراح تترك نقطة ضعف الك يم غيره

امسح الحذاء و بالي يم عابس ليش هشكل جان يحجي ...
مو من عادته يجي هيج وقت ..

غِفار : درة انا رايحه ويه عمتي ام سامر انتي ضلي ويه خاله سهاد تعبانه خطيه متكدر تروح وياي

: بالسلامه حبيبتي
باوعت عليه بحزن و كسرة
سوده عليه حبيبتي غفورة بابا ظلمها هواي بس مو بكدي ...
استغفر الله واتوب اليه
نكثت ايدي و رفعتها للسما يا أمي الحنون يا فاطمة الزهراء يا بنت النبي انتي تعرفين قهرة اليتم و اليتيمه ادعي لغِفار احنا ما عدنا ام و خاله سهاد مريضه كوني وياهه و سانديهه بالمرحلة المهمه من حياتها
احلفج بخاطر السيده زينب عليها السلام الي تيتمت و هي صغيرة مثلنا تدعيلها و تسانديها

مسحت وجهي بكتف بلوزي و رجعت للحذاء الثاني أجلكم الله

استغربت من وجود ورقة بداخل هذا الحذاء
عقدت حواجبي و طلعتها جان مكتوب بيها باللون الازرق بخط مرتب يجنن ...
'انتبهي، بغرفة والدج اكو خزنة الرمز مالها 19984 اكو أوراق صغيرة و ضرف اخذي و حطيهن بداخل هذا الحذاء و حطي الحذاء و هدوم لعابس بجنطته السوداء مال السفر'

اخذت الورقه و رحت اركض ركزت زين و حفظت الي بيها و ضميتها بصدري

طلعت خالتي دخلت للحمام رحت لغرفة ابويه ركض و اني ارجف اول مرا بحياتي اجازف هالمجازفه

فتحت الكنتور جانت الخزنه بداخله،
اخذت الأوراق و الظرف و حطيتهن جوه هدومي،
خوف، تردد و رهبة ... لوهله حسيت الي دا اسويه خطأ ...

دا أخون ابويه بس اهمشي حياة الناس بس ما ادري ضياع دموعي تعلكت برموشي، مسحتها و صعدت لغرفتي ركض..

اخذتهن و سويت الي كاتبه و الرساله حطيتها وياهم..

نزلت ليجوه و اني بعدني ارجف
باوعت عليه خاله و عقدت حاجبها،
و حجت بتساؤل : درة؟ ليش هشكل شفافج بيض و اديج جاي ترجف اكو شي؟

همست : لا لا شكو قابل؟؟؟

هزت راسهه ممقتنعه و كالت : متأكده محابه تحجيلي شي يمه؟

نزلت دموعي ويه كلمة ال 'يمه'

هي انصدمت : يا يا يا شبيج درة شبيج أمي انتِ ؟ يوجعج شي ؟