قصص رعب حقيقية قصيرة من واقع حياتي الشخصية ( متجددة)

رجعت بيتي اللي كان مليان جاااان😔

صباح الخير
النهاردة مش هاحكي قصة لحد لا هاحكي حاجة أنا عايشاها بجد
كان بقالي فترة كبيرة سايبه بيتي اللي دارت فيه كل أحداث قصص اشباح في بيتي ورجعت بعد طول سفر وبعد ما رجعت بقيت بحلم تاني بحاجات كتير بعد ما كنت ما بحلم نهائي ولو حلمت ما بفتكرش حلمت بأيه ولكن المرة دي حلمت بالأموات ودي هاحكي ليكم عنها في يوم تاني لكن النهاردة يوم مختلف عارفين ليه لاني رجعت لاساس كل كتاباتي برغم صلاتي وقرآني ووردي اليومي لكن تفضل نقطة فاصلة جدا العالم الخفي مازال موجود وها يفضلوا معانا ليوم الدين في منهم الطيب والمسلم وفي منهم الكافر والملحد وفي منهم اللي بيرشدني عن طريق التخاطر وبيقولي على الحاجة قبل ما تحصل وكمان بيقولي الناس عايزة مني ايه أول ما ابص في وشهم وعارفة ان في ناس مش ها تصدقني ولكن الله على ما اقوله شهيد ولو كنت بفكر في كلامهم ليه كنت اتجننت من زمان وعشان ما بركزش معاهم خلاص بقيت عايشة ومتعايشة وبعدي الأيام ويمكن بحكم السن اللي كان بيبهرني زمان خلاص انبهاره راح واللي بيخوفني بردوا خلاص مبقتش اركز خوف يا بابا براحتك ها يحصل ايه يعني مفيش حاجة ممكن تحصل للانسان الا بإرادة ربنا ما علينا
ندخل في المضمون كالعادة بنزل ولادي للمدرسة وبرجع أنام شوية
لكن كُنت معتمدة على زوجي يقفل على حلة الرز اللي على النار لان من عادتي زي ما انتوا عارفين بطبخ بعد الفجر واخلص وادخل أنام الكام ساعة دول بتوع الصبح وخصوصا كلنا طالعين من رمضان بنسهر واليوم مقلوب وفعلا طبخت الاكل والرز كان لسه ما استواش ولسوء الحظ زوجي نسي يقفل على الحلة وخصوصا اني قولت له اقفل عليه مش قادرة عايزة انام وللاسف نزل وأنا نايمة لاقيت حد بيقولي قومي اقفلي على حلة الرز لسه النار شغالة وأنا ما اهتمتش وقولت اكيد الصوت دة غلط ونمت
رجعت بعد فترة مش عارفة وقت اد ايه الصوت يقولي قومي اقفلي على حلة الرز النار شغالة وسمعت صوت حلل بتقع في المطبخ وكركبة رهيبة ولكن أنا رجعتها ان القطط هي السبب لان قططي ماشاء الله كتير وأنا سايبة المطبخ بابه مفتوح 😔
ونمت ، صحيت على صوت ابني الصغير بيقولي ماما
قومت على صوته في ايه يا حبيبي
قالي انتِ نايمة ازاي كدة ؟؟؟
يعني ايه نايمة انت عارف أنا نايمة الصبح عايز ايه
النار شغالة في المطبخ على حلة الرز
قومت اتنفضت وقولت احلف بالله
والله يا ماما الحلة شغال عليها النار بقالها حوالي ست سبع ساعات
جريت اشوف الدنيا ايه وازاي مفيش دخان وما حستش ولا قومت والبيت ما ولعش
لاقيت الرز بقى عبارة عن قرص ناشف ودة من ستر ربنا عليه ان الحلة جرانيت ونوعها نضيف والعين بتاعه البوتجاز كانت على الهادي خالص واصغر عين ولو كانت حلة تانية كان زمان البيت ولع
وقولت ما كنت قومت وسمعت الصوت اللي قالي الحلة ع النار والا هي عند وخلاص عشان بعد كدة ابقى اسمع الكلام 😩
واللي كان شاغلني اليومين اللي فاتوا وش الراجل اللي شفته اول ما غمضت عيوني وكان لابس ماسك راجل عجوز وبيبص ليه وشه في وشي قال ايه عشان بيخوفني ودي حكاية هاحكيهالكم المرة الجاية اذا كان في العُمر باقي بإذن المولى عشان تعرفوا مين دة وعايز مني ايه وبيخوفني ليه وللعلم كنت صاحية مش نايمة
ودائما ما الحديث بقية
يتبع ......
رحاب نبيل