Isiah's POV
"We ave d man dem up pon d east and d north a watch how the police bwoy dem a move and d rat inna d force a gi we info." One a mi Dawgs dem seh.
"When d shipment fi land?" Mi ask him and light mi spliff.
"It fi reach yah tonight still, no later dan tomorrow morning." Yap seh.
"Ah, nuh seh a word." Mi tek a draw offa d spliff and draw d curtain and look outside, yuh cyah be too careful.
D police ave it out fi mi, of course mi gi dem a reason, but still, mi affi protect mi 3.
Dem nave no proof seh mi do ntn still cause by right, mi nuh really do a ting, mi jus gi d orders yuh zeet.
"Yuh phone a ring Uzi." Mi snap outta mi zone and tek mi phone from one a d likkle ute dem wah work fi mi.
"Yo."
"We ave some stuff a come in fi yuh, mi need yuh fi come and verify some tings, how soon yuh can reach?" Damion ask mi.
Damion deal wid all a mi shipment dem, mi only trust him fi handle my 'equipments', mi order some laptop and dem ting deh fi some a my boy dem fi do some slight chopping so I guess a dat mi need fi dealid.
"Ah my G, gimme a hour or so."
"Yap and Jungle, get d car, we a guh link Damion." Mi seh and out d spliff. Mi wait till mi hear d car a beep outside before mi guh out deh cause as mi seh, mi affi look out fi mi self.
Mi step outside and tek in some a d fresh breeze and look up pon mi 3 story mansion.
Mi work hard fi dis, and no likkle pussyole police naah tek it from mi, especially waste man Bennett.
Mi Benz stop a mi foot and mi jump inna d back a mi car. The window dem tint up suh mi good.
We a drive guh deal wid business and Yap, who did a drive, did a play some old RnB.
"So Uzi, when we a go guh fi Peanut and him bredda, word pon d street a dem rob two a we bwoy dem last week enuh." Jungle seh.
"Peanut and him people dem good, right now a my ting dem mi a sort out." Mi seh to him.
Mi start look through the window and dem smt deh and we a drive pass the UWI campus. Regular mi store my drugs and dem ting deh ova deh.
Wah most people nuh understand is, gun man cyah be gun man without nuff a dem major corporations and businesses a back dem.
Mi feel d car a slow down and mi a look fi see wahmu.
"Nuh worry yuh head man, Issa gyal mi a mek cross d road cause she stand up desso from how long like she cyah cross road." Yap seh and laugh.
Mi watch the girl a walk cross the road and she wave to the car most likely fi seh thanks.
She ave on one likkle crop top and ripped jeans weh hug up har batty. Woulda love fi bend har ova still but a business time.
Mi tek mi eye dem offa har and back pon d road.
We finally reach infront a Damion warehouse and ting suh we guh in guh sort out business.
Serena's POV
"Daddy yuh can drop mi up a school today?" Mi nuh know why mi always ask him and mi know him a guh seh no.
"Rena mi cyah do dat to deh, yuh know Mi ave work." Him seh and put on him hat.
Mi kiss mi teeth and guh back inna mi room.
"A suh you gwaan when yuh cyah get yuh way enuh, yah soon 21, grow up." Him seh and mi hear the door slam.
"That's why yuh head back roll up." Mi seh lowly.
Mi bade and put on mi clothes and walk guh look bus.
Mi phone start ring and mi and mi see seh a mi best fren Amelia.
"Wahmu girl." Mi seh and guh inna one bus weh stop a mi foot.
"Yuh naah go a Kareem day party? Or brunch or whatever." She ask mi. Kareem a har long time boyfriend and I hate him like a dose a poison.
"Girl no."
"Fawud nuh or at least come inna d night, yuh know a whole day smt." She beg mi. Mi know mi naah guh get rid a har cause she been a ask mi from last month and mi keep on a tell har no. And pon top a dat d party a Tomorrow and mi cyah badda wid Amelia a dry vex wid mi.
"Fine whatever, jus mek sure unuh pick mi up and drop mi off." Mi seh and hang up mi phone.
Mi sidung inna d buss and when it reach my stop mi come off.
Car jus a fly dung d road and deven a slow down fi gi mi a chance fi cross, after however long Mi cross the road and guh inna d school guh collect some documents.
Mi meet up wid Amelia and we gah Starbucks.
"Kareem seh if yah come a d party yuh fi mek sure yuh look good and him claim seh him naah guh sidung and wait pon yuh." She seh and laugh.
"Mek him nuh wait and see." Mi seh and drink Mi milkshake.
"Oh him seh him ave one fren fi yuh." She seh and wiggle har eyebrow.
"Mi tell unuh mi waah man? Right now man a d least a my problem." Mi laugh and seh.
"Him rich enuh. Him name Warren."
Why him ave old man name? Dat naah guh cut it.
Mi skin up Mi face and look pon har
"Girl wah yah guh do? Wait pon Levy fi come dung?" She ask mi.
"Well yes. Nuh dat mi always do?" Mi ask har.
"Yah man duppy. Levy a wait pon you? A once a year fi two weeks d bwoy come dung fah, live yuh life."
She nuh wrong enuh and pon top a dat me and Levy deven deh, we jus do things when him come dung.
But who waah di start over back wid somebody wah a guh jus gi dem bun in the end? Cause a dat relationships come to nowadays.
"Yuh right, but mi nuh waah Warren."
We sidung and chat till Mi decide fi guh home, we'll not really, har man come fi har and dem drop mi home.
Mi guh inna d cold,empty house and decide fi run a boat and sidung and eat.
Daddy him naah come home till afta eleven or so and well, mommy dead.
Mi nave nuh bredda nor nuh sista suh mi really lonely, Amelia a d closest thing Mi have to a sister dats why mi love har suh.
Mi guh inna mi room guh eat and and a listen music then it pause and mi phone start ring.
Levy did a facetime mi.
Mi ansa d phone and prop it up someweh and sidung back.
"What's up sexy?" Him ask.
"Nothing." Mi seh and a eat.
"You know I'm coming down for December right?" Him seh and scratch him head.
"When yuh come mek mk suh mi can free up mi schedule." Mi tell him.
"Yeah yaffi do dat cause you're gonna be staying with me fi real dis time."
Mi shrug mi shoulder and him smile.
"Stand up mek mi see wah yah wear." Him seh.
Mi laugh and stand up and him start smile.
"Cyah wait fi come dung to all a dat." Him seh and lick him lips.
"LEVY COME OPEN THE DOOR." One girl shout.
"Hear yuh oman a call yuh deh, later bubs." Mi seh and hang up mi phone.
Levy live wid him whitey and as Amelia seh, him cole dung from time to time.
Mi finish eat and guh wrap up and sleep.
____________________________________
First chapter, starting off slow😂
Hope you guys like this one🥲
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
