قطعة من الجنة

فلا سطرٍ يصفه ، ولا روايةٍ تكفيه💜💜🖇

قطعة من الجنة💜

(الثاني عشر💜) والأخير

    .. صلوا على النبي.....

بقلم/سبأ النيل💜

مسكو من قميصو قلت ليهو أدهم فكو ما كدة.. عاين ليهو مسافة وفكاهو.. قال ليهو عايز شنو انت يا زول.. الولد قاليهو عايز اتكلم معاها...انا ياداب اتاكدت انو الولد دة عوير وعينو قوية بالذات لمن كنا قبيل في العربية كان شابكني انتي اسمك منو قلتي لي.. في حين انو كان سايق بسرعة كبيرة لكن بسأل أسألة ما ليها اي داعي..ادهم ختا يدو في وشو وقال استغفرالله العظيم يا رب.. اقوليك من الأخر كدة انا ما عايزك تتكلم معاها اطلع برة واقفل الباب وراك.. قاليهو بكل جراءة.. والله دة شي يخصها هي لو عايزة تتكلم معاي ولالا.. عاد أدهم هنا ما بلومو لو قتلو.. انفعل كدة لمن عرق رقبتو ظهر... كان بحاول يهدي في نفسو عشان ما يرتكب في جريمة.. ختا يدو في كتف الولد وقاليهو اسمعني امشي اطلع برة تمام.. الولد نزل يد أدهم وعاين لي وكان جاي علي وقالي انتي عايزة نتكلم ولا لا... قبل ما يتخطى أدهم بخطواتو أدهم مسكو من ياقة قميصو بورا وجراهو مسح بيهو الأرض.. كان منفعل شديد وشراينو دي ظهرت لمن الجرح نزف.. قلت ليو أدهم أدهم روق اتفاهم معاهو بس.. لكن لا حياة لمن تنادي.. رفعو بي يد واحدة ولزاهو على طربيزة الأدوية جا واقع هو والطربيزة والستارة... انا اتخلعت صراحة ما حصل شفتو متنرفز كدة الا مرة واحدة من بعيد.. جريت عليهو مسكتو من يدو قلت ليهو أدهم خلاص خليهو دا واحد مريض بس.. كان بعاين ليهو وزهجان شديد.. حاولت اهديهو قلت ليهو.. تتذكر الآية (والكاظمين الغيظ والعافين عن الناس والله يحب المحسنين) هنا ياداب عاين لي.. أخد شهيق وزفير وقال ونعم بالله.. جو الدكاترة داخلين قالو في شنو الحاصل شنو.. عاين للجوطة وللولد.. الدكتور فجأة قال إسماعيل؟ الجابك هنا شنو.. أشر للدكاترة يجو يمسكوهو.. جو مسكوهو وهو بدافر فيهم.. قاليهم اتصلوا للمستشفى خليهم يجو يسوقوهو.. وطلعو.. أدهم قاليهو دة شنو الحاصل شنو.. الدكتور قاليهو دة مريض نفسي كان في مستشفى الأمراض النفسية.. موضوعو طويل لكن علاجو ماشي كويس وعشان أمس غيرو ليهو الدكتور الهو متعود عليهو شرد من المستشفى... أدهم عاين لي وتاني عاين للدكتور وقاليهو خير ربنا يشفيهو ما كنت عارف وانفعلت فيهو.. الدكتور قاليهو ولا يهمك بس الخسائر دي.. قاطعو قاليهو بدفعها .. قلت ليهو كدي أسي خلينا من دة شوف يا دكتور يدو دي بتنزف... الدكتور قاليهو انت شافع يا ولدي كل شوية فاتح الجرح.. قلت ليهو اي وريهو يا دكتور.. انسان مهمل.. ضحك كدة ولفاها ليهو تاني.. مشينا البيت امي استلمتنا من الباب... وووب علي مالكم دة شنو يا ولدي يدك مالها.. قالها جرح بسيط يا خالتي.. قلت ليها كذاب يا أمي اتجرح جرحة كبيرة بقزازة... قالت لينا خشو خشو كدي واقفين كدة سجم خشمي.. دخلنا وطوالي مشيت على المطبخ عملت ليهو عصير ليمون وجبتو ليهو.. فرح بطريقة حسستني اني جبت ليهو ساعة روليكس مرصعة بالالماس.. قالي تسلم يدك.. وبقا بشرب فيهو بي مزاج.. جيت شلتو منو.. قالي اديني عصيري يا زولة.. قلت ليهو لا كفاك ح اشرب الباقي.. قالي انتي عملتيهو لي ولا عملتيهو لنفسك... قلت ليهو ما شغلتي.. وشربتو.. ضحك وقالي ينفعك.. لقيت امي وراي ادتني ليك حلاة شكلة.. قعدت وبقت تتكلم معاهو وانا تاني سرحت.. عاينت في يدو لقيتو كل شوية بتحسس اصابعو عشان يسبح بلقا المسبح مافيشة.. لغاية ما بقا بسبح باصابعو... اتكيفت شديد والله بدون سبب ما عارفة لشنو.. بعد شوية قال بعدة اتوكل... أمي اتكلمت معاهو كتير لكن في النهاية قالت خير.. طلع وأمي دخلت المطبخ.. دق لي تلفون قالي تعالي نسيتي تلفونك في العربية.. قلت ليهو كويس.. عن كمية الغباء الوقع فيني في اللحظة دة ما كان غباء عادي دة كان غباء مركز اُس تلاتة.. طلعت ليهو برة لقيتو واقف جنب العربية قلت ليهو وينو التلفون وهو الابتسامة عايزة تشق وشو.. قلت ليهو ما تديني التلفون يا راجل.. ضحك ضحكة قوية وانا بقيت مقهية وما فاهمة حاجة وكل ما يحاول يسكت تاني يرجع يضحك.. قلت ليهو أدهم انت جنيت ولا حاجة.. ختا يدو في راسي وقالي لالا انتي الجنيتي انا دقيت ليك في تلفونك يا هبلة... ياداب استوعبت الموقف الغبي.. قلت ليهو على فكرة انا اصلا عارفة بس حبيت اجي اودعك.. قالي يا شيخة؟ قلت ليهو اي.. قالي خير وسكت.. قلت ليهو ناديتني لشنو طيب.. قالي نفسي اقرا ليك قرآن ساي كدة.. ابتسمت وقلت ليهو سامعاك..قرأ لي الآيات (فذكر إن نفعت الذكرى() سيذكر من يخشى ويتجنبها الأشقى اللذي يصلى النار الكبرى ثم لا يموت فيها ولا يحيى)... ابتسمت وقلت ليهو صدق الله العظيم.. قالي أثبتي يا وعد وكافحي في دينك واتقربي من ربك واذكريهو كتير.. وذكر فإن الذكرى تنفع المؤمنين.. انا عايز نكون سوا دنيا وآخرة... ما تحرمني نفسك من نعيم الجنة.. انا عايزك تكوني دايما كويسة وفي رعاية الله... انتي لمن تكوني قريبة من ربك انا بكون متطمن عليكي لانو ح يكون حافظك.. خليكي دايما في امان الله... مسكت يدو شديد وقلت ليهو حاضر انشاء الله.. بأس يدي وقالي ربنا يثبتك ويثبت قلبك.. يلا في امان الله... بقيت بعاين في اثرو..بحسو زي نسمة الهواء.. لمن يجي يقيف قدامي أو يتكلم أو يضحك.. بحسو كامل والكمال لله.. هيبتو.. صوتو وايمانو.. صلواتو.. وأهم حاجة تسبيحو..تصرفاتو وردات فعلو.. حبو للجنة.. تلاوتو للقرآن..بحسو ريح هبت من الجنة.. لا.. دة نعمة وقطعة من الجنة.. حسسني اني مقصرة شديد في حق ربي ورغم دة الله لطيف رحيم.. رسلو لي عشان يقربني منو.. حسيت اني ما بقدر ارد فضل رب العالمين علي وبقيت مواظبة على صلاتي وذكري واي حاجة بتقربني ليهو عشان بس اكسب رضاهو واكسب الجنة وما يحرمني من نعمتو دي.. كنت عميا لكن صحيت من غفلتي... عدا الشهر دة بكل تفاصيلو.. اتغيرت للأحسن بي الف مرة.. محظوظة شديد عشان يكون في حياتي قطعة من الجنة اتهنى بيها في الدنيا قبل الآخرة.. تم الزفاف بحمد الله... حياتي كانت في حفظ الله مليانة بالرضا والصبر والإيمان.. أدهم خلاني احب ابوي واحب اليوم العقد لي عليهو بدون رضاي واحب الله سبحانه وتعالى لأنو رغم تقصيري من ناحيتو ما نسا مكافحتي في إني التزم في ديني ورسل لي أدهم سحبني من جهلي.. خلاني احب نفسي لاني ما فرطت فيهو واتمسكت بيهو وما افتريت ولا اتكبرت.. سكتنا بقت مستقيمة وكان  مكتفي بي جدا.. بعد سنتين اتضح اني حامل.. في فترة السنتين دي لو ما هو كنت دخلت في نفسيات.. حملي اتأخر وافتكرت اني ما بنجب... صبر علي شديد واتحملني في أسوأ أوقاتي وخلاني اتأكد انو اختيارات ربنا دايما صاح..كنا قاعدين بنحضر وهو حاضني ومركز مع التلفزيون.. كنت ماسكة اصابعو وبعد بيهم.. قالي انتي شافعة والله وضحك.. عديت بيهم لغاية تسعة وقلت ليهو التسعة دي شنو.. قالي تسعة كبابي عصير ليمون.. قلت ليهو لا... قالي طيب تسعة صواني بسبوسة قلت ليهو لا ياخ هو اي حاجة اكل.. ضحك وقالي اها شنو.. قلت ليهو تسعة شهور.. عاين لي باستغراب وقالي اشمعنى.. قلت ليهو بعد تسعة شهور ح يجيك بيبي صغيروني ...لمن قلت ليهو كدة لمن اتعدل سكت مسافة وقالي جادة انتي.. هزيت ليهو راسي بي اي... عن كمية الفرحة الشفتها في عيونو.. لمن دمع.. فرح شديد وشالني وداني الوضاية وقالي اتوضي ارح نصلي.. بقيت بضحك وهو بقولي اسرعي عايز اتوضى... صلينا وخلصنا... كل يوم بقولي نفسك في شنو.. لسة ما اتوحمتي.. بصحيني الساعة 12 بليل ويقولي اها ما عايزة حاجة.. قلت ليهو انت مستعجل على الوحم دة كدة مالك.. ولمن اتوحمت طلعت عينو لكن كان فرحان شديد... الله دة كريم ياخ... والحمد لله ولدت وجبت ولد.. سميناهو طارق... كان أجمل منظر لمن اشوفهم الاتنين كل جمعة لابسين جلاليبهم وماشين صلاة الجمعة.. طارق كان حلاتو بالجلابية.. ابوهو لمن يكون ماسكو بس نسخة منو.. وهم طالعين للصلاة طارق قالي يلا يا ماما في امان الله... وادهم قالي يلا حبيبتي في امان الله...
وانا امنتهم لي الله وامانتي ما خابت...

وكل حياة دون الله ممات💜... وكل توكل على الله ثبات💜
إن كنت له مسلما طوق النجاة💜... تيقن انه انبتك خير نبات💜 ....
(خواطري )

                            النهاية 💜💜✨
كل الحب
(سبأ النيل 💜✨)