👨💼🌧عريس من المطر 🌧👨💼
الحلقة 17:
مرو اليامات كانهم مالبرق كل يوم نزيد نتعلق بيه ونشوف فيه جانب جديد يخليه يكبر في عيني اكثر ..رجعنا لدارنا مريت لدار عجوزتي سلمت عليهم و قعدت شويا بعدها طلعت لداري ..لقبتو خرج مالدوش ..بقيت نشوف فيه
علاء: شبيك ههههه صفا؟
سمر،:قاعدة نحمد في ربي اني ما رفضتكش
علاء: والله؟
سمر: ايه نتا كنت حجرة شكون يعرف انك هكذا داير(قرب مني)
علاء: كيفاش داير؟
سمر: تهبل تهبل يا بو غمازة يا الطويل ههههههه
علاء: نتي لي قصيرة بصح معليش هكذا عاجبتني...انا نروح نصلي قبل ما يبدا مخي يضرب شرق غرب
سمر: انا ثاني نتوضا ونلحقك. (صلينا وقعدنا حتى دق الباب جات ماما و خالتي واهلو...رحبت بيهم وهو سلم عليهم وخرج ...ضيفتهم وقعدنا نقصرو ونضحكو مر الوقت بلخف
نوال:هذاك هو نروحو راه الوقت
سمر: زيدو شويا
نوال: راهي الشتا بلخف يظلام الحال ماشي كيما يمات الصيف
زوبيدة: اقعدو باتو الدار داركم
نوال: ياخاه ياطيك الصحة ختي زوبيدة كون ماشي الوحش لي جابني مانجيش مانحبش نثقل
سمر: لا ماما واش تثقلي راكي ماما
نوال وهي قايمة: انا نخليكم ان شاء الله نتلاقاو فالخير ا ختي زوبيدة و غير فالخير ان شاء الله(خرجو و عجوزتي هبطت..عيطتلو مارفدتش خليتلو ميساج بلي راحو الضياف..فرزت الحالة و طيبت العشا...هزيت لعجوزتي شويا ورجعت نستنى فيه ومرة مرة نشوف فالتيليفون مي والو...طليت مالتاقة كيفكيف طوموبيلتو ماكانش تحت ...وليت تعشيت وحدي و دخلت للشومبرة بدلت و رتبت روحي ...شفت فالساعة لقيتها 11 وهو ماجاش زدت عيطتلو هز عليا
علاء: ويي
سمر: وينك تقلقت عليك؟
علاء: راني مع صحابي مازال شويا باش نجي ارقدي ما تستناينيش..(حسيت بخيبة امل اما اتداركت الامر لانو عندو مدة غايب يكون توحش الجو مع صحابو...دخلت فراشي نقلب فالفايسبوك حتى هزني النوم...فقت على صوت الباب يتفتح قمت من بلاصتي...لقيتو ينحي في باسكاتو.
سمر: على سلامتك
علاء،:يسلمك علاش مازلتي قاعدة؟
سمر: لا فقت مع صوت الباب كي اتفتحت
علاء:اااه ديزولي ماشي بلعاني
سمر: عادي كيفاش جازت السهرة؟
علاء: لباس
سمر:تتعشى؟
علاء:لا كليت برا ...ارجعي لفراشك ترقدي ضوك نلحقك(هزيتلو راصي وي و رحت بقيت نستنى حتى جا دخل لبلاصتو اترميت عليه حضنتو )
علاء: شبيها مرتي طولت عليك؟
سمر:اممم توحشتك بزاف انا
علاء: حتى انا ..واش رايك نرقدو؟
سمر: وي تعبانة.
علاء: نعرف(مد يدو لشعري يلعب بيه قداش والفت لمستو...حنى اني نظن حبيتو ولو فالوقت القصير هذا ...حبيت اهتمامو تفهمو...نظرتو ليا كلامو معايا ضحكتو ومزاحو...كلشي يعملو معايا ولا مع اي شخص يعجبني مش مصدقة انو مثالي للدرجة هاذي...ديما نحب نسالو اذا عندو ماضي اما نتراجع ..لانو حتى لو كان موجود انا هي حاضرو ومستقبلو وراح نسعى جاهدة باش نخليه يحبني كيف ما نحبو ...ونهتم بيه كيف ما هو يعمل وأكثر....لانو العلاقة فالزواج علاقة اخذ وعطاء لو كان العطاء من جهة وحدة راح يختفي يالتدريج حتى ينعدم وانا محال نقبل بشي هكذا يصير
