#ليُحيا_بك_قلبي12
بقلم: ميامن أحمد
لحظة سمعت صوتو وهو بقول كدا التلفون من الخلعة لمن أترمى مني في الارض، رفعتو سرعة سرعة وقلت ليهو نع..نعم ويديني كانو برجفو لانو لو عرف أنا بعمل في شنو متاكدة ح يمنعني هو أساسا ما راضي بفكرة أني أتكلم مع البت، قال لي بسأل فيك بتعملي في شنو! قلت ليهو ولا ولا شي قال لي خلاص واقفة هنا ليه! قلت ليها ع..عشان شيماء مشت تجيب أكل ووقفتني بدلها قال لي طيب يدينك مالم برجفو! قلت ليهو ساااي بس، عاين لي بنظرة كدا بعرفها براهو وقال لي بتمنى ما يكون البفكر فيهو صح لانو وقتها حتقعي في ورطة قلت ليهو لا أطمئن ماف شي من البتفكر فيهو قال لي أن شاء الله ما تكوني بتكذبي علي، كنت عاوزة ارد ليهو بس الست هبة جات وقالت ليهو بييب كنتا وين بفتش ليك من قبيل قال ليها كان عندي شغل مع شيماء لكن ما لقيتها قالت ليهو عملت ليك القهوة الطلبتها قال ليها حبييبي تسلمي ياااه قالت ليهو العفواً يا قلبي، وعاينت لي من فوق لتحت ومشو مع بعض، في قلبي قلت نفسي أعرف دكتور يحيى داً جايب طولت البال وقوة الاستحمال دي من وين عشان يستحمل الانسانة الاسمها هبة دي واااااي بس تجيب الجلطة .. رنيت على براءة نظام أنا أنتهيت شوية وهم جوا، خلينا شيماء في مكانها ومشينا لي الاء، قالت لينا أها بشرو حصل معاكم شنو؟! قلت ليها الخطة نجحت يا عبقرية قالت لي يس💃❤️ قلت ليهم لكن دكتور يحيى شاكي في أني عملت حاجة ما ياها طبعا قرب يشكفني لو ما ربنا ستر قالت لي بكون عايز ينبهك عشان ما تعملي غلط قلت ليها أمممم ما شغالة بيهو كتتتير الاء قالت لي بس أنا حاسة أنو مفروض نسمع كلامو وما تخاطري يا ميامن قلت ليها الاء يااخ أنتو عارفني عنيدة وما ح أقتنع فاحسن تقفلو الموضوع قالت لي خلاص سكتنا.....
اليوم البعديهو قريب لي الظهر ضربت في رقم نسيبة، في الاول ما ردت بس المرة التانية جاني صوت بت، قلت ليها السلام عليكم قالت لي وعليكم السلام قلت ليها إنتي الأستاذة نسيبة عبدالرحمن؟! قالت لي لالا أنا أختها أبتهاج قلت ليها طيب الاستاذة نسيبة عندها هدية من مجهول ممكن توصفي لينا البيت عشان نجي نسلمها الهدية قالت لي بعدم أستيعاب ااا؟! قلت ليها وصفي لي البيت عشان الهدية تصلها قالت لي جد الكلام دا ولا بتمقلبو فينا قلت ليها لالا جد وأنا بنفسي ح أوصل ليها الهدية بعد شوية قالت لي طيب بيتنا في أم درمان الشهداء... قلت ليها تمام شوية وبكون عندكم، قفلت منها وأقرب محل هدايا دخلتو شلت لي هدية وختيتها في كيس عشان أمها وأختها ما يشكو في حاجة وركبت المواصلات حقت الشهداء، بعد وصلت المكان الوصفتو لي ضربتها ليها تاني عشان توصف لي أدق، وصفت لي البيت بقيت حايمة لحد ما لقيتو دقيت الباب فتحت لي شافعة صغيرة قلت ليها يا حلوة دا بيت ناس نسيبة عبدالرحمن! قبل ما ترد لي جات أختها الكبيرة وقالت لي أهلين يا أخت عاوزة منو قلت ليها نسيبة قاعدة! قالت لي إيوة قلت ليها أنا قبل شوية أتكلمت معاك وقلت ليك عندنا هدية لي الاستاذة قالت لي أيي عرفتك من الصوت قلت ليها ممكن تنادي لي الاستاذة عشان أسلمها الهدية بيدي وتوقع لي قالت لي خشي لي جوا، أترددت في الاول بس بعدين دخلت بيتهم كان بسيط وحلو جداً وباين أنهم ناس على قدر حالهم، قعدتني في الصالة وقالت لي ح أمشي أنادي ننو من الغرفة وأجي قلت ليها طيب، مشت هي وأنا كنت بعاين في البيت لحد ما جات نسيبة قالت لي السلام عليكم قلت ليها وعليكم السلام قالت لي إنتي منو ما عرفتك قلت ليها أنا شغالة في محل هدية من مجهول وإنتي عندك هدية جيت أوصلها ليك قالت لي أممم بكون دا منو يا ربي، وقالت لي أختها أمي وين؟!، أختها قالت ليها فاتت الجيران قالت ليها أمشي جيبي موية لي الضيفة دي، أختها قالت ليها سمح ومشت، أديت نسيبة الكيس وقلت ليها وقعي لي هنا شالت الدفتر مني ووقعت، قلت ليها عايني أسمعيني كويس، البت في الاول أتخلعت من طريقة كلامي بس بعدها قالت لي أتفضلي قلت ليها بصراحة كدا أنا ما من هدية من مجهول ولا حاجة أنا اسمي ميامن أحمد ممرضة قبل كم يوم جابوك لينا في المستشفى وأنا كان مسكت حالتك وحتى قعدنا اتكلمنا مع بعض ووقتها راجلك جا داخل الغرفة وضربك قالت لي أها عرفتك بس جاية هنا لشنو؟! قلت ليها عشان أساعدك قالت لي ما فهمتك قلت ليها أنا حابة أساعدك في أنك تطلقي من راجلك لاني متأكدة مليون في المية أنك ما مرتاحة معاهو قالت لي شنو؟! كيف يعني أطلق من راجلي وبعدين إنتي العرفك شنو إني ما مرتاحة؟! قلت ليها لاني عشت نفس الانتي حاليا قاعدة تعيشهو لا إسوء منو كمان، وعارفة قدر شنو الزواج الزي دا بكون مؤذي💔أتخلعت زيادة وقالت لي أنا ما فاهمة شي قلت ليها ح أحكي ليك قصتي وأحكمي بعدها وشوفي أنا لي مصرة أساعدك، أكتفت بي أنها تهز رأسها بس، حكيت ليها القصة كلها من البداية لي النهاية بعد خلصت لقيتها بتبكي، قالت لي أتحملتي كل دا؟! قلت ليها كنت متضرة أتحمل لانو ماف شي كان بنقذني وقتها بس إنتي هسي عندك الفرصة وكويس لاقية زول يساعدك، شوفي أنا أكتر زول عافرت عشان أكون معاهو هو أكتر زول أذاني وعذبني💔قالت لي بس أنا لو أطلقت بخاف من المجمتع وكلامو مش كفاية أنو هو قبل أسبوع عرس فيني، أتخيلي أمو قالت ليهو عرس فيها دي واحدة عاقر بس وهسي لو أتطلقت حيقعدو يتكلمو فيني ويقولو عرس فيها وطلقها😭💔قلت ليها طبيعي دا يحصل من راجل باطل زيو وبعدين كلام الناس لا بودي ولا بجيب هسي إنتي بترضي أنك تعيشي عيشة زي دي مع واحد ما مقدرك يااخي داً حتى وإنتي عيانة كان بضربك، همو أنك تجيبي عيال بس ما مهم الطريقة حتى ولو كانت بتمثل خطر عليك، دة كلو بس عشان ما تسمعي كلام من الناس! إنتي ليه ترضي أنك تتذلي وتتهاني في حين أنو انتي ممكن تعيشي مكرمة معززة لمن تتطلقي! طيب بتعتقدي أنو راجلك دا ممكن يغير طريقة تعاملو معاك! لو عندك شوية أمل فيهو فانا هنا ممكن أقول تديهو فرصة قالت لي لا ما عندي ولا ذرة أمل، اذا أنا هنت عليهو في كل الاوقات أكيد ح أهون عليه دايما، بجي راجع سكران بدقني وما بيقيف الا لمن يفتر بيخليني أشتغل وأتعذب بس عشان أجيب ليهو قروش يسكر بيها ويوم الما أجيبهم بشوف نجوم الظهر💔 قلت ليها طب ليه ما تتخلصي من الوجع دا كلو؟! قالت لي طيب أنا عايزة أطلق لكن كيف! هو ما حيرضي يطلقني قلت ليها دي خليها علي أنا المهم مصلحتك وراحتك قالت لي أنا عاوزة أكون قوية زيك كدة وما أفكر أنتحر، كلام الناس ح أتجاهلو الطلاق ما عيب والطلاق حلال في حالتي السيئة دي قلت ليها ح أوقف معاك خطوة بخطوة لحد ما أشوفك مرتاحة لاني حقيقي بقيت ما عايزة زول يمر بنفس تجربتي القاسية، قالت لي إنتي عظيمة شددديد لانو نفسك ما سمحت ليك تخيليني في الوضع الصعب دا رغم إنو مافي بينا سابق معرفة قلت ليها مافي زول بحس بوجع التاني الا لمن يكون مجربو وأنا حاسة بي الانتي حاسة بيهو معاهو و..، ما تميت كلامي سمعنا صوت أمها وهي بتقول لي بتحرضي في بتي عشان تخرب بيتها وتتطلق؟! أتلفتنا عليها الاتنين بهجمة، قلت ليها أنا بس.. قالت لي أسكتي ما تقولي ولا حرف وأطلعي من بيتي وتاني ما تجي هنا وبتي ما ح تتطلق من راجلها دايرة الناس يقولو عليها مطلقة يا خرابة البيوت! قلت ليها أسمعيني أنا ما دايرة ألا مصلحتها قالت لي كذابة سمعتك بي أضاني دي بتقولي ليها أتطلقي منو هسي مصلحتها وين في الطلاق غير أنها ح تجيب لي نفسها كلام! دايرة حريم الحلة يتكلمو بيها في الجمعيات ويقولو بت أسيا طلقوها عشان عاقر! ودايرة الناس تقطع لحمنا بي الكلام!أمرقي لي برة قلت ليها الطلاق ما حرام وأنا عاوزاها تتطلق لانها ما عايشة مرتاحة معاهو قالت لي ما تتدخلي في حاجة ما بتخصك قلت ليها لكن أنا شفتك في المستشفى بتبكي وبتتحسبني علي راجلها الغير رايك شنو! قالت لي أيوة بتي ما تحمل عشان ما تموت لكن ما تتطلق من راجلها هو أكيد ح يوعى لي البعمل فيهو ويرجع زي ما كان قلت ليها يعني هسي إنتي برضيك أنو بتك تنضرب كل يوم وتشتغل وتعاني بس ما يرضيك أنها تتطلق وترتاح! ليه ما عايزاها ترتاح من الحاجات دي؟! قالت لي إنتي عايزة تصلي لشنو يا بت الناس؟! قلت ليها لي أنها تتحرر من الخنقة اللي هي عايشة فيها، المرة سكتت وما ردت علي، قلت ليها مش أحسن ليها أنها تعيش معززة مكرمة قاعدة جنبك مرتاحة ماف زول بهبشها ويجبرها أنها تشتغل عشان القروش حقت تعبها دا يروحها في حاجات حرام، بتك دي لمن تتطلق ممكن ترجع تكمل قرايتها لو وقفتها ولو كلمتها ح تشتغل وترفع راسك وتصرف عليك يعني شنو لو أتطلقت؟! هل الطلاق عيب؟! الناس الخايفين من أنهم يتكلمو فيها ديل هل هم عاشو معاها المعاناة اللي هي عاشتها! أتعذبو معاها! أتوجعو زيها! لا صح فبس أي زول تسمعي غلط في حق بتك طوالي أقيفي في وشو وقولي ليهو أنت ما عارف هي شافت شنو عشان تتطلق فاسكت، الناس لو ما وقفتيهم عند حدهم ح يتمادو دايما، ليه هي تخسر راحتها في سبيل أنها ما تسمع كلام من الناس! معقولة في أم بترضى أنو بتها المن لحمها ودمها تتعذب كدا وتصر عليها انها تسكت وتضحي عشان ناس؟! لا دقيقة هما الناس ديل زاتهم منو عشان تعملو كل دا عشانهم! خالتو فكري في القلتو دا كويس وعايني لي بتك المظلومة دي وشوفيها أتعذبت كيف! ولو وافقتي أنا مستعدة اقيف معاها لحد ما تتطلق وكمان متبرعة أني أفتش ليها شغل وبعد كدا القرار قرارك أنتي وهي+رقمي عندكم في التلفون لو أحتجتو، شلت شنطتي وطلعت منهم وأنا متاملة أنو أمها تحاول تفهم القلتو وتعرف مصلحة بتها.....
لمن قربتا أصل بيتنا المطرة صبت وزنقتني فبقيت جارية في الشارع بسرعة وبعطس، في قلبي قلت الليله الالتهاب ح يزيد علي وأسرعت في الجري، وأنا جارية كدا الطين زحلقني ورب جيت واقعة في الارض، ياااخي وقعت وقعة😅قمتا أتنفضت سريع سريع وعاينت في الشارع وكنت بتلفت يمين وشمال وبدعي أنو ماف زول يكون شافني واقعة بس للاسف سمعت صوت ضحكة دكتور يحيى وهو بقول لي يا ساتر على دي وقعة🤣قلت ليهو هسي في شنو بضحك😑! قال لي يعني ما شايفة نفسك وقعتي كيف! ولا شايفة شكلك؟! أقسم بالله ضحكتيني
ضحك قلت ليهو أننننن ما تضحك قال لي خلاص خلاص، بس سكت ثانية واحدة وتاني رجع يضحك قال لي حاولت لكن ما قادر والله العظيم🤣💔قلت ليهو يستحسن أمش من هنا قبل ما أنفعل فيك قال لي أستني أستني قبل ما تمشي أديني رقم أمك، أستغربت داير بيهو شنو وقلت ليهو رقم أمي أنا! قال لي أي لانو أمي عاوزاهو أمبارح تلفوناتها هي وأفاق أتسرقو في السوق وريان عند أهلها وكان عندها حاجة ضرورية دايرة توري بيها أمك لكن ما لقت الرقم حقها ولا حقك عندي، قلت ليهو والله أنا ما حافظة لا رقمي ولا رقم أمي وتلفوني لو طلعتو الموية حق المطرة ح تخربو لي، قال لي خلاص ح أحفظك رقمي وبعدين رسلي لي فيهو الرقم قلت ليهو طيب، بداً يقول فيهو وأنا كنت بحفظ وكررتو ليهو كم مرة حتى بعدها دخلت بيتنا، مشيت أستحميت وجيت رسلت ليه الرقم ودردشنا شوية ونص الكلام كان عبارة عن شكل وحتى قال لي ح أسيفك بي أنسة مزاجيات🤣، أما أنا ما سجلت رقمو بس كنت حافظاهو في راسي ....
بعد أسبوع من الحصل في يوم جاني أتصال من نسيبة في قلبي قلت بكون أقنعت أمها بالفكرة ودايرة توريني، رديت عليها وقلت ليها أهلين يا نسيبة فجاة سمعت صوتها وهي بتصرخ وبتقول لي ميااامن ألحقيني، الحقينيي بسرررعه ح أمووت......
______
_أعرف تمامًا ماذا يعنى الخُذلان من ذلك الشخص الذى وعدك گثيراً بأن يبقى معك دائمًا، أعرف ما هو الانطفاء بعد گل هذا التوهج، أعرف الهُجران بعد گل هذا الحب، أعرف مرارة الكلمة بعد أن گانت ضمادًا، أعرف ما معنى أن يُصبح غريبًا بعد ما گان مألوفًا .. أعرف كثيرًا💔!...
أشوفكم....
