انا هبلغ عن عمي دي جريمه ولازم يتحاسب عليها
سعاد: ياحبيبي دا عمك هتبلغ عنو ازاي بس يرضيك يتسجن يعني
بحر: ايوا يرضيني ازاي يفكر يجوز موج وهي في السن دا دا بيحط حياتها بين ايدين راجل اد ابوها وبيقولو اتفضل بنتي اهي موتها وانا مسامح
سعاد: اهدي بس كدا متحسسنيش بالذنب اني قولتلك
بحر بغضب: يا امي انا عاوز افهم انتو بتفكرو ازاي انا كنت فاكر ان العاده المتخلفه دي انتهت وخلصنا منها انا كنت فاكر ان الناس اتقدمت انا كنت فاكر اني هرجع الاقي البلد حالها مختلف متوقعتش ابدا اني هاجي الاقي نفس الموال بتاع زمان
سعاد: الكل بيعمل كدا يا بحر الكل بيجوز عيالو في سن صغير
بحر: انتي عارفه اي مخاطر الجواز المبكر انتي عارفه ان ممكن البنت تموت فيها عارفه ان اي غلطه بحياتها عارفه ان ممكن طفله تحمل والحمل دا يؤدي لفقدان حياتها دي طفله يجماعه ازااي بس تسرقو منها طفولتها بالشكل البشع دا
سعاد: يووه متكبرش الموضوع كدا ما ياما بنات اتجوزت في سن صغير وعايشين زي الفل اهو
بحر: عرفتي منين انهم زي الفل دخلتي قلب كل واحده فيهم وعرفتي حاسين ب ايه عرفتي الضغوطات الي هما حاسين بيها مفيش طفله هتتجوز وهتبقا فرحانه ومبسوطه بالجواز البنات دي هيعيشو عمرهم كلو يلعنو في اهلهم ويلعنو في اجوازتهم البنات دي هتعيش دايما فاكره ان الجواز ماهو الا اكبر مصيبه في العالم حرام عليكم والله حرام عليكم ربنا ينتقم من كل شخص بيدمر حياه بنتو بالشكل دا
خرجت من بيتنا وانا حاسس بجبل فوق قلبي جوايا ندم كبير بإني رجعت من كندا كنت عايش هناك مرتاح كنت فخور بالثقافه والتقدم الي بشوفو هناك وكنت فاكر ان بلدي كمان بتتقدم كنت فاكر اني هرجع ومش هلاقي اي فرق بين هنا وهناك لكن كنت غلط النهارده اتصدمت صدمه عمري وإن بنت عمي الطفله البريئه الي متتعداش ال 14 سنه هتتجوز ومن شخص ميقلش عن 40 سنه ازاي بس هيقدرو يضحو بيها كدا دا انا كنت جايبلها عروسه لعبه معايا وكنت مستني اديهالها علشان اشوف فرحتها بيها بس الي حصل انهم كسرو فرحتها وسلبو منها طفولتها منهم لله...
سعاد: بحر انا رايحه عند عمك علشان تحضيرات الفرح شويه كدا وابقا تعالا علشان تبارك لعمك ومرات عمك ومتنساش بكره الفرح ولازم تكون موجود وتقعد وسط الرجاله وافتخر بإبني الدكتور قدام الكل ماشي ياحبيبي
هزيت راسي بهدوء وانا مش قادر استوعب الي بيحصل
في بيت حسن الرشيدي عم بحر
سعاد: الف الف مبروك يا أم موج وعقبال الليله الكبيره
عزه: الله يبارك فيكي يا ام الدكتور امال هو فين مجاش معاكي ليه
سعاد: هيجي كمان شويه
حسن: بس انا زعلان منو يعني جه من يومين ومسئلش عننا ولا حتي سلم مش من عادتنا يا ام بحر
سعاد: معلش يا حاج هو بس كان تعبان شويه من السفر ومقدرش يخرج بس هيجي متقلقش.
لبست هدومي وبصيت في المرايه شوفت حزن وكأبه ظاهرين علي وشي اول مره يظهرو بالشكل دا انا طول عمري ضد الجواز المبكر ضد جواز الاطفال كنت بشوف الناس بتجوز عيالهم وببقا حزين عليهم واقول الحمدلله ان الموضوع دا بعيد عننا بس النهارده الموضوع قريب كل القرب مني..
