ﺭﻭﺍﻳﻪ
#ﺍﺣﺒﺘﺖ _ﺫﺍﻙ_ ﺍﻻﺳﻢﺭ
ﺍﻟﺤﻠﻘﺔ 5
ﻟﻠﻜﺎﺗﺒﺔ ﺭﻭﺍﺳﻲ ﺑﺤﺮ ﺍﻟﺪﻳﻦ
ﻧﻮﺭﻫﺎﻥ؛ ﺗﻲ ﻟﻴﺶ ﻗﻠﺘﻲ ﻫﻜﻲ
ﺧﻮﻟﺔ : ﺍﻋﺘﺮﻓﻲ ﻳﺎﺑﻨﺖ ﻋﺎﺟﺒﻚ ﻭﻻ
ﻧﻮﺭﻫﺎﻥ : ﺑﻼﺵ ﻗﻄﺎﻑ
ﺧﻮﻟﺔ : ﺍﺣﻤﻤﻢ
ﺳﺠﻰ : ﻛﺎﻧﺖ ﻭﺭﺍﻫﻦ ، ﻣﻦ ﻳﻠﻲ ﻋﺎﺟﺒﻚ ﻳﺎﺣﻤﺎﺗﻲ
ﻧﻮﺭﻫﺎﻥ : ﺭﻓﻌﺖ ﺣﺎﺟﺒﻬﺎ ،
ﺧﻮﻟﺔ :ﺳﺠﻰ ﻣﺶ ﻭﻗﺘﻚ ﺗﺮﺍ ، ﻭ ﻣﻦ ﻳﻠﻲ ﺣﻤﺎﺗﻚ
ﺳﺠﻰ : ﻣﺎﻧﺤﻜﻴﺶ ﻣﻌﺎﻙ ، ﻧﺤﻜﻲ ﻣﻊ ﺣﻤﺎﺗﻲ ﻧﻮﺭﻫﺎﻥ
ﻧﻮﺭﻫﺎﻥ : ﺳﺠﻰ ﻣﺶ ﻓﺎﺿﻴﺔ ﻟﻘﻄﺎﻓﻚ ﺗﺮﺍ ﺍﺧﻄﻴﻨﻲ
ﺳﺠﻰ؛ ﻓﺘﺤﺖ ﺷﻨﻄﺘﻬﺎ ﻭ ﻃﻠﻌﺖ ﻣﻨﻬﺎ ﺗﻠﻔﻮﻥ ﺍﻳﻔﻮﻥ +7
ﺍﻟﻴﻮﻡ ﺧﻮﻙ ﺟﺎﺑﻠﻲ ﺍﻳﻔﻮﻥ ﻭ ﻏﺪﻭﺍ ﺍﻟﺪﺑﻠﻪ ﻭ ﻳﻠﻲ ﺑﻌﺪﻫﺎ ﺣﻲ ﺣﻨﻜﻮﻥ ﻣﺮﺕ
ﺧﻮﻙ
ﻧﻮﺭﻫﺎﻥ؛ﻫﻬﻬﻪ ﻣﺴﻜﻴﻨﻪ ﻣﺼﺪﻗﺔ ﺭﻭﺣﻚ ، ﺗﻲ ﺧﻮﻳﺎ ﻋﺎﺭﻓﺘﻪ ﻳﻌﺮﻑ ﺑﻨﺎﺕ ﺍﻛﺜﺮ
ﻣﻦ ﺷﻌﺮ ﺭﺍﺳﻪ
ﻭ ﺍﻧﺘﻲ ﻣﻦ ﺍﻟﻨﻮﻉ ﻳﻠﻲ ﻳﺸﻮﻑ ﻓﻴﻚ ﺯﻱ ﺍﻟﻤﻼﺑﺲ ، ﺷﻬﺮ ﺍﻭ ﺷﻬﺮﻳﻦ ﻭ ﻳﺎﺧﺬ
ﺣﺎﺟﺘﻪ ﻣﻨﻚ ﻭ ﻳﺒﻴﺪﻙ ﻭ ﻟﻤﺎ ﺗﻄﻠﻊ ﺑﻨﺘﻚ ﻳﻠﻮﺣﻚ
ﺳﺠﻰ : ﻋﻼﻣﺎﺕ ﺍﻟﻐﻀﺐ ﻉ ﻭﺟﻬﺎ ، ﻏﻴﺮﻱ ﺩﻳﺮﻱ ﺑﺎﻟﻚ ﻳﻠﻲ ﻋﺎﺟﺒﻚ ﻳﺸﻢ ﻋﻠﻴﻚ
ﺷﻲ ﻭ ﻳﺨﻠﻴﻚ
ﻧﻮﺭﻫﺎﻥ : ﻻ ﻳﺎﺣﺒﻴﺒﺘﻲ ﺍﻧﺎ ﻳﻠﻲ ﻋﺎﺟﺒﻨﻲ ﺭﺍﺟﻞ ﻣﺎﻳﻤﻴﺸﻲ ﺑﺨﺸﻤﻪ
ﻭ ﻓﻲ ﺍﻟﻨﻬﺎﻳﺔ ﻧﺤﻦ ﻣﺎﻧﻘﻌﺪﻭﺵ ﺍﻟﻄﻠﺐ ﻋﻠﻴﺎ ﺑﺎﻟﻬﻠﺒﺎ ﺍﻣﺜﺎﻟﻚ ﻳﻠﻲ ﻳﻘﻌﺪﻭ
ﺧﻮﻟﺔ : ﺟﺒﺘﻲ ﻟﻬﺰﻳﺒﺔ ﻟﺮﻭﺣﻚ ﻫﻴﺎ ﺑﺮﺭﻱ ﺍﻟﻌﺒﻲ ﺑﻌﻴﺪ
ﺳﺠﻰ : ﻣﺸﺖ ﻭ ﺍﻟﺪﺧﺎﻥ ﻳﻄﻠﻊ ﻣﻦ ﻭﺫﺍﻧﻬﺎ ﻉ ﺍﺷﻮﻱ ﻛﺎﻧﺖ ﺣﺘﻨﻔﺠﺮ
ﻭ ﺑﺪﺕ ﺍﻟﻤﺤﺎﺿﺮﺓ ﺍﻟﺜﺎﻧﻴﺔ ﻳﻠﻲ ﻛﺎﻧﺖ ﻟﻠﺪﻛﺘﻮﺭ ﻣﺤﻤﺪ
ﻭ ﺍﻟﺠﻮ ﻓﻲ ﺍﻟﻤﺤﺎﺿﺮﺓ ﻛﺎﻥ ؛
ﺍﻟﺪﻛﺘﻮﺭ ﻣﺤﻤﺪ ﻳﺸﺮﺡ ﺑﺲ ﻣﺮﺓ ﻣﺮﺓ ﻳﺎﺧﺬ ﻓﻲ ﻧﻈﺮﺍﺕ ﻟﻨﻮﺭﻫﺎﻥ ﻭ ﻫﻠﺒﺎ ﻻﺣﻈﻮ
ﺍﻟﺸﻲ ﻫﺬﺍ
ﺳﺠﻰ ﻣﺤﺮﻭﻭﻭﻭﻗﺔ ﻣﻦ ﻧﻮﺭﻫﺎﻥ
ﺧﻮﻟﺔ ﻻﺣﻈﺖ ﻧﻈﺮﺍﺕ ﻧﻮﺭﻫﺎﻥ ﻭ ﻣﺤﻤﺪ ﻟﺒﻌﺾ ﺧﺎﺻﺘﺎ ﻭﻗﺖ ﺍﻃﻴﺢ ﻋﻴﻨﻬﻢ ﻉ
ﺑﻌﺾ
ﻭ ﻓﻲ ﻧﻬﺎﻳﺔ ﺍﻟﻤﺤﺎﺿﺮﺓ
ﺧﺒﺮﻫﻢ ﻣﺤﻤﺪ ﺍﻧﻪ ﻳﻮﻡ ﺍﻟﺴﺒﺖ ﻋﻨﺪﻫﻢ ﺍﻣﺘﺤﺎﻥ
ﻭ ﻃﻠﻌﻮ ﺍﻟﻄﻠﺒﺔ
_ ﻧﻮﺭﻫﺎﻥ ﻭ ﺧﻮﻟﺔ ﻛﺎﻥ ﻣﻘﻌﻤﺰﺍﺕ ﻉ ﺍﻟﻜﺮﺳﻲ ﻓﻲ ﺟﻨﺎﻥ ﺍﻟﻜﻠﻴﺔ
ﻛﺎﻥ ﻣﻘﺎﺑﻠﻬﻢ ﺯﻣﻴﻠﻬﻢ ﺍﻟﻌﺒﻴﻂ ﺗﻮﻓﻴﻖ
ﻭ ﻫﻠﺒﺖ ﻋﻠﻴﻬﻢ ﺳﺠﻰ ، ﻭ ﻛﺎﻟﻌﺎﺩﺓ ﺷﻌﺮ ﺍﺣﻤﺮ ﻭ ﻣﻜﻴﺎﺝ ﺍﻭﻓﺮ ﻭ ﻋﺪﺳﺎﺕ
ﺧﻀﺮ ، ﻣﺰﻳﺘﻪ ﻳﻌﻨﻲ
ﺷﺎﻓﻠﻬﺎ ﺗﻮﻓﻴﻖ ﻣﻦ ﻓﻮﻕ ﻟﻠﻮﻃﻲ : ﺍﺳﻤﻊ ﻳﺎ ﺍﺣﻤﺪ
ﺍﺣﻤﺪ : ﻫﺎ
ﺗﻮﻓﻴﻖ : ﻓﻲ ﻃﻠﺘﻚ ﻳﺎﻏﺎﻟﻲ ﻭﻳﻦ ﻧﻮﻟﻮﻭ
ﺍﺣﻤﺪ : ﻧﻮﻟﻮ
ﺗﻮﻓﻴﻖ : ﻟﻮﻥ ﻋﻴﻮﻧﻚ ﺯﻱ ﻟﻮﻥ ﺍﻟﺰﻗﺮﻟﻮ
ﺍﺣﻤﺪ :
ﻃﺒﻌﺎ ﺗﻮﻓﻴﻖ ﻛﺎﻥ ﻓﻲ ﻋﻼﻗﺔ ﻣﻊ ﺳﺠﻰ ﺑﺲ ﻫﻲ ﺳﻴﺒﺎﺗﻪ ﻟﺬﺍﻟﻚ ﺩﻳﻤﺎ ﻳﺘﻨﺒﺸﻠﻬﺎ
ﺍﻻﺛﻨﺎﺀ ﻫﺬﻱ ﻧﻮﺭﻫﺎﻥ ﻛﺎﻧﺖ ﺗﻀﺤﻚ ﻉ ﻗﻄﺎﻑ ﺗﻮﻓﻴﻖ ﻉ ﺳﺠﻰ ﻭ ﻣﺤﻤﺪ ﺷﺎﻓﻬﺎ
ﻣﺤﻤﺪ : ﺗﻮﻓﻴﻖ ﺗﻌﺎﻝ ﻫﻨﺎ
ﺗﻮﻓﻴﻖ؛ ﺷﻨﻮ ﻳﺎ ﺩﻛﺘﻮﺭ ؟؟
ﻣﺤﻤﺪ : ﺍﻟﺠﻮ ﻫﺬﺍ ﻣﻌﺎﺵ ﺗﻌﺎﻭﺩﻩ ﻣﻊ ﺍﻟﻄﺎﻟﺒﺎﺕ
ﺗﻮﻓﻴﻖ؛ ﻭﺍﻧﺖ ﺷﻦ ﻳﻠﻲ ﻣﻀﺎﻳﻘﻜﻚ ؟؟
ﻣﺤﻤﺪ : ﺍﻧﺖ ﺗﺤﻜﻲ ﻣﻊ ﺍﻟﺪﻛﺘﻮﺭ ﻳﻠﻲ ﻳﻘﺮﻱ ﻓﻴﻚ ﺍﺣﺘﺮﻡ ﻧﻔﺴﻚ ، ﻭ ﺟﺎﻱ ﺑﺘﻘﺮﺍ
ﻭﻻ ﺗﻐﻨﻲ ﻋﻦ ﺍﻟﺰﻗﺮﻟﻮ ؟؟
ﻧﻮﺭﻫﺎﻥ :ﺗﺸﻮﻓﻠﻬﻢ ﻭ ﺗﻀﺤﻚ
ﺳﺠﻰ : ﺗﺤﺴﺎﺏ ﻣﺤﻤﺪ ﻏﺎﺭ ﻋﻠﻴﻬﺎ
ﺧﻮﻟﺔ : ﻟﻴﺶ ﺍﻟﺪﻛﺘﻮﺭ ﻳﺪﺍﻓﻊ ﻋﻦ ﺳﺠﻰ
ﻧﻮﺭﻫﺎﻥ : ﺍﺧﺘﻔﺖ ﺍﻻﺑﺘﺴﺎﻡ ﻣﻦ ﻉ ﻭﺟﻬﺎ ، ﻋﺎﺩﻱ ﻣﺎﻫﻢ ﻳﺤﺒﻮ ﻟﺨﻮﻳﻤﺮﺍﺕ ﺍﻛﻴﺪﻩ
ﻋﺠﺒﺎﺗﻪ ﺣﺘﻲ ﻫﻮ
ﺧﻮﻟﺔ : ﺿﺤﻜﺖ ﻉ ﺟﻨﺐ ﻟﻤﺎ ﻧﻮﺭﻫﺎﻥ ﻏﺎﺭﺕ
ﻭ ﺟﺎ ﺯﻳﺪﺍﻥ ﻭﺭﻭﺡ ﺑﻨﻮﺭﻫﺎﻥ ،
ﺧﺸﺖ ﻧﻮﺭﻫﺎﻥ ﻭ ﻫﻲ ﻣﺘﻌﺼﺒﺔ ﻟﻴﺶ ﻳﺪﺍﻓﻊ ﻋﻦ ﺳﺠﻰ ؟؟
ﺯﻳﺪﺍﻥ ﺧﺶ ﻣﻌﺎﻫﺎ : ﺍﻟﺴﻼﻡ ﻋﻠﻴﻜﻢ
ﻛﻮﺛﺮ؛ ﻋﻠﻴﻜﻢ ﺍﻟﺴﻼﻡ
ﻣﺤﻤﻮﺩ : ﻋﻠﻴﻜﻢ ﺍﻟﺴﻼﻡ ، ﻭﻳﻦ ﻫﻨﺎﺀ
ﺯﻳﺪﺍﻥ؛ ﻗﺘﻠﻲ ﻣﺮﻭﺣﻪ ﻣﻊ ﺻﺎﺣﺒﺘﻬﺎ ﺍﻟﻴﻮﻡ
ﻣﺤﻤﻮﺩ : ﻭﺍﻧﺖ ﻋﺎﺩ ﻣﺼﺪﻕ ﺗﺨﻠﻰ ﺍﺧﺘﻚ ﺗﺮﻭﺡ ﻣﻊ ﺍﻱ ﺣﺪ
ﺯﻳﺪﺍﻥ : ﺍﻭﻭﻭﻭﻑ ﺗﻲ ﻻ ﻳﺎﺑﺎﺗﻲ ، ﺑﺲ ﻗﺎﻟﺖ ﺑﺘﻜﻲ ﻉ ﺣﻮﺷﻬﺎ ﺗﺒﻲ ﺗﺎﺧﺬ ﻣﻨﻬﺎ
ﺣﻞ ﺗﻤﺎﺭﻳﻦ ﻭﻻ ﻣﺶ ﻋﺎﺭﻑ ﺷﻦ
ﻧﻮﺭﻫﺎﻥ : ﺍﻱ ﺣﻖ ﻫﻨﺎﺀ ﻋﻨﺪﻫﺎ ﺍﻣﺘﺤﺎﻥ ﻳﻮﻡ ﺍﻻﺣﺪ ﺍﺣﻴﺎﺀ ﻭﺗﺒﻲ ﻣﺪﺭﺳﺔ
ﻛﻮﺛﺮ : ﺍﺗﺼﻠﻲ ﺑﺈﻳﻤﺎﻥ
ﻧﻮﺭﻫﺎﻥ : ﻛﻠﻤﺘﻬﺎ ﺑﺲ ﻗﺎﻟﺖ ﻣﺎﺗﻼﻳﻢ ، ﻓﻲ ﺩﻛﺘﻮﺭ ﻳﻘﺪﺭ ﻳﻘﺮﻳﻬﺎ ﻟﻮ ﻋﺎﺩﻱ ﺍﺗﺼﻞ
ﺑﻌﻤﻲ ﺑﻮﺑﻜﺮ ﻳﺮﺩ ﻋﻠﻴﺔ
ﺯﻳﺪﺍﻥ : ﻣﻦ ﺍﻟﺪﻛﺘﻮﺭ ﻫﺬﺍ
ﻧﻮﺭﻫﺎﻥ : ﺍﻟﺪﻛﺘﻮﺭ ﻣﺤﻤﺪ
ﻣﺤﻤﻮﺩ : ﻣﺎﻓﻲ ﻣﺸﻜﻠﺔ ﺗﻮﺍ ﻧﻜﻠﻤﻪ
ﺯﻳﺪﺍﻥ؛ ﻫﺬﺍ ﺍﻻﺳﻤﺮ ؟؟
ﻣﺤﻤﻮﺩ : ﻫﻮ ﺑﻴﻘﺮﻱ ﺍﺧﺘﻚ ﻣﺶ ﺣﻴﺠﻲ ﻳﻄﻠﺐ ﻳﺪﻫﺎ ،
ﻧﻮﺭﻫﺎﻥ : ﺧﻄﺮﻫﺎ ﻉ ﺍﻻﺳﻤﺮ ، ﺗﺴﻠﻢ ﻋﻠﻴﻚ ﺍﻡ ﺷﻌﺮ ﺍﺣﻤﺮ ﻭ ﺍﻻﻳﻔﻮﻥ +7
ﻳﺎﺯﻳﺪﺍﻥ ﻭ ﻏﻤﺰﺗﻠﻪ
ﺯﻳﺪﺍﻥ : ﻭﺍﻟﻠﻪ ﺍﻧﻮﺽ ﺍﻧﻜﻔﺨﻚ ﺭﺍﻩ
ﻣﺤﻤﻮﺩ : ﻋﻴﺐ ﻳﺎ ﻧﻮﺭ ، ﻭﺍﻧﺖ ﺍﺧﺘﻚ ﺗﺤﺸﻢ
ﻧﻮﺭﻫﺎﻥ : ﻣﺎﻗﻠﻨﺎ ﺷﻲ ، ﻭ ﻫﻲ ﺑﻨﺮﻗﻰ ﺍﻧﻲ
ﺭﻗﺖ ﻧﻮﺭﻫﺎﻥ ﻭ ﻃﻠﻌﺖ ﺗﻠﻔﻮﻥ ﺍﺧﺘﻬﺎ ﻭﻟﻘﺖ
ﻃﻠﻌﺘﻲ ﺧﻄﻴﺮﺓ ﺑﺲ ﺻﺪﻗﻴﻨﻲ ﻣﻦ ﺑﻴﻦ 6 ﺍﻭ 7 ﺑﻨﺎﺕ ﻋﺮﻓﺘﻚ
ﻧﻮﺭﻫﺎﻥ : ﺿﺤﻜﺖ ﻭ ﺑﻌﺘﺘﻠﻪ
ﺑﺎﻫﻲ ﺍﻳﻦ ﻭﺣﺪﻩ ﺍﻧﺎ ؟؟
ﻭ ﻋﺪﺕ ﻏﺴﻠﺖ ﻭ ﻏﻴﺮﺕ ﺩﺑﺸﻬﺎ ﻭ ﺻﻠﺖ
ﻭ ﻟﻘﺎﺗﻪ ﺑﺎﻋﺖ :
_ ﺍﻧﺘﻲ ﺍﺟﻤﻠﻬﻦ ، ﺻﺢ ﻣﺶ ﻣﺘﺎﻛﺪ ﻣﺰﺍﻝ ﺑﺲ ﻳﻮﻡ ﻧﺘﺎﻛﺪ ﺣﻨﻘﻮﻟﻚ
ﺍﻧﺘﻲ ﻫﻲ ﻭﺟﻪ ﻟﻮﺟﻪ ﻣﺶ ﺭﺳﺎﺋﻞ
ﻧﻮﺭﻫﺎﻥ : ﻛﺎﻥ ﺷﻌﻮﺭﻫﺎ ﻣﺨﻠﻂ ﺑﻴﻦ ﻓﺮﺡ ﺑﺎﻧﻬﺎ ﺗﺤﻜﻲ ﻣﻌﺎﻩ ﻭ ﻋﺎﺟﺒﻬﺎ ، ﻭ ﺑﻴﻦ
ﺧﻮﻑ ﻟﻮ ﺻﺎﺡ ﻳﻌﺮﻓﻬﺎ ﺷﻦ ﻣﻮﻗﻔﻬﺎ ﻣﻌﺎﻩ؟؟
ﻫﻨﺎﺀ : ﻧﻮﺭ
ﻧﻮﺭﻫﺎﻥ : ﺣﻄﺖ ﺍﻟﺘﻠﻔﻮﻥ
ﻫﻨﺎﺀ : ﺭﻳﺘﻚ ﻉ ﺗﻠﻔﻮﻧﻲ ﺭﺍﻩ ، ﺍﻟﻤﻬﻢ ﻗﺎﻟﻲ ﺑﻮﻳﺎ ﺣﺼﻠﺘﻲ ﺍﺳﺘﺎﺫ ﻳﻘﺮﻳﻨﻲ
ﻧﻮﺭﻫﺎﻥ : ﺍﻳﻪ ﻧﻔﺴﻪ ﺍﻟﺪﻛﺘﻮﺭ ﻣﺤﻤﺪ
ﻫﻨﺎﺀ : ﺣﻴﻴﻲ ﺑﻴﺠﻲ ﻟﻠﺤﻮﺵ
ﻧﻮﺭﻫﺎﻥ : ﻟﻴﺶ ﺍﻟﺤﻲ ﻫﺬﻱ 🐽
ﻫﻨﺎﺀ : ﻻﻻ ﻏﻴﺮ ﺧﺎﻃﺮﻱ ﻧﺘﻌﺮﻑ ﻋﻠﻴﻪ
ﻧﻮﺭﻫﺎﻥ : ﺑﻴﺠﻲ ﺍﻟﺴﺒﺖ ﻫﻮ ، ﺑﺎﻟﻬﻲ ﺭﺍﺟﻌﻲ ﺍﺷﻮﻱ
ﻫﻨﺎﺀ : ﻣﺎﺗﺨﺎﻓﻲ ﻣﺶ ﺣﻨﺤﺸﻤﻚ ﻣﻌﺎﻙ
ﻧﻮﺭﻫﺎﻥ : ﻻ ﺣﻮﻝ ﺍﻟﻠﻪ ﺷﻦ ﺩﺧﻠﻨﻲ ﺗﻮﺍ😏
ﻫﻨﺎﺀ : ﺍﺣﻤﻤﻢ
_ ﺯﻳﺪﺍﻥ : ﻳﺎﺳﺠﻰ ﻣﺶ ﻗﺘﻠﻚ ﻣﺎﺗﺨﺒﺮﻱ ﻧﻮﺭ
ﺳﺠﻰ : ﺗﻲ ﻣﺎﺧﺒﺮﺗﻬﺎ ﺑﺸﻲ ، ﻫﻲ ﺑﺮﻭﺣﻬﺎ ﺟﺖ ﻟﻘﺘﻨﻲ ﻧﻔﺘﺢ ﻓﻴﻪ ،
ﺯﻳﺪﺍﻥ : ﺑﺎﻫﻲ ﻛﻴﻒ ﻋﺮﻓﺖ ﺍﻧﻪ ﻣﻨﻪ
ﺳﺠﻰ : ﻫﻲ ﻋﺎﺭﻓﺘﻨﻲ ﺍﻧﻲ ﻣﺮﺗﺒﻄﺔ ، ﻭﻣﺶ ﻗﺘﻠﻲ ﺷﺎﻛﻪ ﻓﻴﺎ ، ﺧﻼﺹ ﺍﻛﻴﺪﺓ
ﺭﺑﻄﺖ ﺍﻻﺣﺪﺍﺙ ﺑﺒﻌﻀﻬﺎ
ﺯﻳﺪﺍﻥ؛ ﺑﻌﺪﻱ ﻋﻨﻬﺎ ﺍﻧﺘﻲ ﺑﺲ
ﺳﺠﻰ : ﺑﺲ ﻫﻲ ﺑﻤﻦ ﻣﺮﺗﺒﻄﺔ ؟؟
ﺯﻳﺪﺍﻥ : ﻓﻴﺶ ﺗﺨﺮﻓﻲ ﺍﻧﺘﻲ
ﺳﺠﻰ : ﺍﺧﺘﻚ ﻣﺮﺗﺒﻄﻪ ﺭﺍﻩ ﻫﻜﻲ ﻳﺪﻝ ﻛﻼﻣﻬﺎ ﻭ ﺍﻟﻮﺍﺿﺢ ﺗﺤﻜﻲ ﻣﻊ ﺷﺐ
😐
ﺯﻳﺪﺍﻥ : ﺍﺧﺘﻲ ﻣﺶ &$$$ ﻣﺶ ﺗﺮﺗﺒﻂ ﻭ ﺗﺤﻜﻲ ﻣﻊ ﺷﺒﺎﺏ ﻓﻲ ﻧﺺ ﺍﻟﻠﻴﻞ
ﺳﺠﻰ : ﺍﻭﻭﻭﻭﻭ ﻳﺎﺯﻳﺪﺍﻥ ﺻﺎﺭ ﺍﻧﺎ &&$$$ ﻻﻧﻲ ﺣﺘﻲ ﻓﻲ ﺍﻟﻠﻴﻞ ﻧﺤﻜﻲ ﻣﻌﺎﻙ
... ﻭ ﻓﺼﻠﺖ ﺍﻟﺨﻂ
ﺯﻳﺪﺍﻥ : ﺍﻟﺰﺡ ﻧﺴﻴﺖ ﺭﻭﺣﻲ ﻓﻴﺶ ﻧﺤﻜﻲ ، ﻣﺎﻋﻠﻴﺎ ﺗﻮﺍ ﺑﺮﻭﺣﻬﺎ ﺗﺮﺩ ﺯﻱ ﺍﻟﻜﻠﺒﺔ
ﻭ ﻋﺪﺍ ﺍﻟﻴﻮﻡ ﻫﺬﺍ ﻋﺎﺩﻱ ﻟﻌﻨﺪ ﺍﻟﻌﺸﻴﺔ
ﻋﻨﺪ ﻣﺤﻤﺪ -:
ﻛﺎﻥ ﻳﺤﻀﺮ ﻓﻲ ﻧﻔﺴﻪ ﻋﺸﺎﻥ ﻳﻘﺮﻳﻬﺎ ﻳﻌﻨﻲ ﻣﻌﻠﻮﻣﺎﺕ ﻋﺎﻣﺔ ﻋﻦ ﺍﻻﺣﻴﺎﺀ
ﻓﺠﺄﺓ ﺗﻠﻔﻮﻧﻪ ﻳﺮﻥ
ﺗﺮﻥ ﺗﺮﻥ ﺗﺮﻥ
ﻣﺤﻤﺪ : ﺍﻳﻮﻭﻭﻩ
ﻣﺤﻤﻮﺩ؛ﺍﻟﺴﻼﻡ ﻋﻠﻴﻜﻢ
ﻣﺤﻤﺪ : ﻭﻋﻠﻴﻜﻢ ﺍﻟﺴﻼﻡ ﺧﻮﻳﺎ ﺗﻔﻀﻞ
ﻣﺤﻤﻮﺩ : ﺍﻧﺎ ﻣﺤﻤﻮﺩ ﺍﻝ*** ﺧﻮ ﺍﻻﺳﺘﺎﺫ ﺑﻮﺑﻜﺮ
ﻣﺤﻤﺪ : ﻳﺎﻣﺮﺣﺒﺎ ﺑﻴﻚ ﻳﺎﺧﻮﻳﺎ ﺗﺸﺮﻓﻨﺎ
ﻣﺤﻤﻮﺩ :ﻟﻴﺎ ﺍﻟﺸﺮﻑ ، ﻗﺘﻠﻚ ﺷﻦ ﺻﺎﺭ ﺧﻼﺹ ﻧﻌﺒﻮ ﻋﻠﻴﻚ ﺗﻘﺮﻱ ﺍﻟﺒﻨﺖ
ﻣﺤﻤﺪ : ﺍﻟﻌﺒﻰ ﻉ ﺍﻟﻠﻪ ﻭ ﺗﻢ ﺑﺈﺫﻥ ﺍﻟﻠﻪ ، ﺍﻣﺘﻲ ﻧﺠﻲ
ﻣﺤﻤﻮﺩ : ﻓﻲ ﺍﻟﻌﺸﻴﺔ ﻳﻮﻡ ﺍﻟﺴﺒﺖ
ﻣﺤﻤﺪ؛ ﻫﻲ ﺳﻨﻪ ﻛﻢ ﺗﻘﺮﺍ ؟؟
ﻣﺤﻤﻮﺩ : ﺛﺎﻧﻴﺔ
ﻣﺤﻤﺪ : ﺧﻼﺹ ﺗﻢ ﻳﺎﺣﺎﺝ
ﻣﺤﻤﻮﺩ؛ ﺑﺎﺭﻙ ﺍﻟﻠﻪ ﻓﻴﻚ
ﻣﺤﻤﺪ؛ ﻭ ﻓﻴﻚ ﺑﺎﺭﻙ ﺍﻟﻠﻪ ✨💕
_ ﻣﺤﻤﺪ ﺟﻬﺰ ﻧﻔﺴﻪ ﻭ ﺍﺣﺴﻦ ﺷﻲ ﻋﺮﻑ ﻫﻲ ﺳﻨﻪ ﻛﻢ ﺍﻟﺸﻲ ﻫﺬﺍ ﺳﻬﻞ ﻋﻠﻴﻪ
ﻳﻄﻠﻊ ﻉ ﺍﻟﻤﻨﻬﺞ ﻻﻧﻪ ﻳﻌﺮﻑ ﺷﺨﺺ ﻋﻨﺪﻩ ﻭﻟﺪ ﻳﻘﺮﺍ ﺛﺎﻧﻴﺔ ﻋﻠﻤﻲ ، ﻭ ﻳﺒﻲ
ﻳﺴﺘﺮ ﺭﻭﺣﻪ ﻣﻊ ﻧﻮﺭﻫﺎﻥ ﻭ ﺍﻫﻠﻬﺎ
ﻧﻮﺭﻫﺎﻥ ﺣﺘﻲ ﻫﻲ ﺗﺠﻬﺰ ﻓﻲ ﺭﻭﺣﻬﺎ ﻋﻨﺪﻫﺎ ﺍﻣﺘﺤﺎﻥ ﻳﻮﻡ ﺍﻟﺴﺒﺖ ﻭ ﻓﻲ ﻣﺎﺩﺓ
ﺍﻻﺳﺘﺎﺫ ﻣﺤﻤﺪ
ﺑﺲ ﻣﺶ ﻋﺎﺭﻓﺔ ﺷﻦ ﻭﺭﺍﻫﺎ ﻣﻌﺎﻩ 😹🔥🔥
ﻭ ﻣﺮ ﺍﻟﻴﻮﻡ .... ﻭ ﻣﺮ .... ﻟﻌﻨﺪ ﺍﻟﻠﻴﻞ
ﺗﺮﻥ ﺗﺮﻥ 📲📲
ﻫﻨﺎﺀ : ﻧﻮﺭﻫﺎﻥ ﻫﺬﺍ ﻣﺤﻤﺪ
ﻧﻮﺭﻫﺎﻥ : ﻛﺎﻧﺖ ﻣﻘﻌﻤﺰﺓ ﺗﺘﻔﺮﺝ ﻉ ﻓﻴﻠﻢ ، ﺷﻦ ﺗﻘﻮﻟﻲ ؟
ﻫﻨﺎﺀ : ﻣﺤﻤﺪ ﻳﺮﻥ
ﻧﻮﺭﻫﺎﻥ : ﺟﻴﺒﻲ ﺍﻟﺴﻤﺎﻋﺔ ﻭﺭﺩﻱ ﻋﻠﻴﻪ
ﻫﻨﺎﺀ : ﺷﻨﻮﻭﻭ ؟؟؟
ﻧﻮﺭﻫﺎﻥ : ﺩﻳﺮﻱ ﺯﻱ ﻣﺎﻧﻘﻮﻟﻚ ﺑﺲ
ﻧﺎﺿﺖ ﻫﻨﺎﺀ ﺑﺴﺮﻋﺔ ﺟﺎﺑﺖ ﺍﻟﺴﻤﺎﻋﺔ ﻭ ﺭﺩﺕ
ﻣﺤﻤﺪ : ﺍﻟﺴﻼﻡ ﻋﻠﻴﻜﻢ
ﻫﻨﺎﺀ : ﻭﻭﻭ ﻋﻠﻴﻜﻢ ﺍﺍﺍﻟﺴﻼﻡ
ﻣﺤﻤﺪ -: ﻣﺶ ﺻﻮﺕ ﻧﻮﺭ ﻫﺬﺍ !!! : ﻛﻴﻒ ﺣﺎﻟﻚ
ﻫﻨﺎﺀ :ﺑﺨﻴﺮ ﻭﺍﻧﺖ
ﻣﺤﻤﺪ : ﺣﻤﺪﻟﻠﻪ ،
ﻧﻮﺭﻫﺎﻥ : ﺣﺎﻃﺔ ﺳﻤﻌﺔ ﻓﻲ ﻭﺫﻧﻬﺎ ﻭ ﺍﻟﺜﺎﻧﻴﺔ ﻋﻨﺪ ﻫﻨﺎﺀ، ﻗﻮﻟﻴﻠﻪ ﺷﻦ ﺗﺒﻲ ؟؟
ﻫﻨﺎﺀ : ﻟﻴﺶ ﺭﺍﻥ ﺷﻦ ﺗﺒﻲ ؟؟
ﻣﺤﻤﺪ : ﺍﻣﻤﻢ ﻧﺒﻲ ﻧﻘﻮﻟﻚ ﻳﺎ ﺍﻧﺴﺔ ﻣﺠﻬﻮﻟﺔ ﺍﻻﻳﺎﻡ ﺍﻟﺠﺎﻳﺔ ﺣﻨﻌﺮﻑ ﺍﻧﺘﻲ ﻣﻦ
ﻧﻮﺭﻫﺎﻥ : ﻗﻮﻟﻴﻠﺔ ﻛﻴﻒ ؟؟
ﻫﻨﺎﺀ : ﺷﻦ ﺗﻘﻮﻝ ! ﻛﻴﻒ ﺣﺘﻌﺮﻑ 😕
ﻣﺤﻤﺪ : ﻣﺶ ﺿﺮﻭﺭﻱ ﺗﻌﺮﻓﻲ ، ﺍﻟﻤﻬﻢ ﺳﻤﻌﺖ ﺻﻮﺗﻚ ﻉ ﺍﻟﺘﻠﻔﻮﻥ ﻭ ﺗﺎﻛﺪﺕ ﻣﻦ
ﺍﻟﺒﻨﺖ، ﻭ ﻟﻤﺎ ﻧﺘﻼﻗﻮ ﻭﺟﻪ ﻟﻮﺟﻬﻪ ﺣﻨﻘﻮﻟﻚ ﻫﺬﻱ ﺍﻧﺘﻲ
ﻧﻮﺭﻫﺎﻥ : ﺍﻓﺼﻠﻲ ﺍﻟﺨﻂ
ﻫﻨﺎﺀ : ﻓﺼﻠﺖ
ﻣﺤﻤﺪ؛ ﻣﻦ ﺟﻴﻬﻪ ﻳﻀﺤﻚ ﻻﻧﻬﺎ ﺧﺎﻓﺖ ، ﻭ ﻣﻦ ﺟﻴﻪ ﺣﺰﻳﻦ ﻻﻧﻬﺎ ﻣﺶ ﻧﻮﺭﻫﺎﻥ
ﻫﺬﺍ ﻣﺶ ﺻﻮﺗﻬﺎ
ﻫﻨﺎﺀ : ﺣﻲ ﻋﻠﻴﻚ ﻳﺎﻧﻮﺭ ﺷﻦ ﺩﺭﺗﻲ ، ﻭ ﺑﺮﻗﻤﻲ ﻣﻌﺎﻫﺎ
ﻧﻮﺭﻫﺎﻥ : ﺍﺳﻜﺘﻲ
ﻫﻨﺎﺀ : ﺗﻲ ﺷﻦ ﻧﺴﻜﺖ ، ﻭﺍﻟﻠﻪ ﺯﻳﺪﺍﻥ ﺣﻴﻌﻄﻴﻨﻪ ﻃﺮﻳﺤﺔ ﺭﺑﺎﺵ ﻟﻘﺒﻮﺭ ﻭ
ﺣﺘﺸﻮﻓﻲ
ﻧﻮﺭﻫﺎﻥ : ﻧﺸﺎﺀﺍﻟﻠﻪ ﻳﺮﺑﺸﻮ ﻗﺒﺮﻙ ﺍﺳﻜﺘﻲ
_ ﻃﺒﻌﺎ ﺯﻱ ﻧﻮﺭﻫﺎﻥ ﺯﻱ ﻫﻨﺎﺀ ﻣﺎﻋﻤﺮﻫﻦ ﻛﻠﻤﻦ ﻭﻟﺪ ﺍﻭ ﺩﺍﺭﻥ ﻋﻼﻗﺔ ﺟﺪﻳﻪ ﻫﻨﺎﺀ
ﻛﺎﻥ ﺧﻄﺮﻫﺎ ﺑﺲ ﺗﺨﺎﻑ ﻣﻦ ﺑﻮﻫﺎ ﻭ ﺧﻮﻫﺎ ﺯﻳﺪﺍﻥ ، ﺍﻣﺎ ﻧﻮﺭﻫﺎﻥ ﻣﺰﺍﻝ ﻣﺎﺟﺎ
ﻳﻠﻲ ﻳﻌﺠﺒﻬﺎ ♀路
ﻧﻮﺭﻫﺎﻥ : ﻭﺭﺑﻲ ﺇﻻ ﻣﻀﺎﺣﻚ ﺍﻧﺎ ﻭﺍﻧﺘﻲ
ﻫﻨﺎﺀ : ﺷﻦ ﺗﺨﺮﻓﻲ ﻳﺎ ﺍﺧﺘﻲ ﻭﻻ ﺍﻟﺨﻮﻑ ﺍﺛﺮ ﻉ ﻋﻘﻠﻚ
ﻧﻮﺭﻫﺎﻥ : ﻳﺎﺍﺍﺍﺍﻏﺒﻴﺔ ﻫﻮ ﻗﺎﻝ ﺗﺎﻛﺪﺕ ﻣﻦ ﺻﻮﺗﻚ ، ﻫﻮ ﻋﻤﺮﻩ ﻣﺎﺳﻤﻌﺖ ﺻﻮﺗﻚ
ﺍﻧﺘﻲ ﻳﻌﻨﻲ ﻳﺒﻲ ﻳﻌﺮﻑ ﻣﻦ ﺗﻜﻮﻥ ﺍﻟﺒﻨﺖ ﻳﻠﻲ ﺗﺮﺍﺳﻞ ﻓﻴﻪ ﺑﺲ
ﻫﻨﺎﺀ : ﻳﺎﻧﺎ ﻫﻬﻬﻬﻬﻬﻪ ﺣﻖ 😂😂
ﻧﻮﺭﻫﺎﻥ : ﺛﺎﺭﻳﺘﻪ ﻣﺶ ﺳﺎﻫﻞ ،
ﻫﻨﺎﺀ : ﻧﻮﺭﻫﺎﻥ 🐽
ﻧﻮﺭﻫﺎﻥ : ﺷﻨﻮ ؟
ﻫﻨﺎﺀ : ﻳﺎ ﺗﺎﻓﻬﻪ ﺑﻌﺪ ﻏﺪﻭﺍ ﺣﻴﺴﻤﻊ ﺻﻮﺗﻲ 😠😠😠
ﻧﻮﺭﻫﺎﻥ : ﺣﻲ ﻧﺴﻴﺖ 😯😯😯😯
ﻫﻨﺎﺀ : ﻭﺭﻃﻴﻨﻲ 😭😭😭😭😭 ﻭ ﺑﺪﺕ ﺗﺒﻜﻲ ، ﻭﺍﻟﻠﻪ ﺯﻳﺪﺍﻥ
ﺣﻴﻘﺘﻠﻨﻲ 😭😭
ﻧﻮﺭﻫﺎﻥ : ﺗﻲ ﺍﺳﻜﺘﻲ ﺍﻟﺰﻑ،
ﻫﻨﺎﺀ : ﺷﻦ ﺑﻴﺼﻴﺮ ﻓﻴﻨﺎ ﺑﺲ ﻟﻮ ﺧﺒﺮﻫﻢ
ﻧﻮﺭﻫﺎﻥ : ﺍﺳﻤﻌﻲ ﻣﺶ ﻋﺎﺭﻓﺔ ﺑﺲ ﻗﻠﺒﻲ ﻣﻄﻤﻦ ﺍﻧﻪ ﻣﺶ ﺣﻴﻘﻮﻝ ﺷﻲ ﻟﻮ ﻋﺮﻑ
ﻭﺍﻧﺘﻲ ﺣﺎﻭﻟﻲ ﺗﻐﻴﺮﻱ ﺻﻮﺗﻚ ﻭ ﺧﻠﻴﻪ ﻫﻮ ﻳﺪﻭﻱ ﻭﻳﺸﺮﺡ ﻣﺎﺗﺸﺎﺭﻛﻲ ﺍﻧﺘﻲ ﺇﻻ
ﺍﺫﺍ ﻋﻨﺪﻙ ﺳﻮﺍﻝ ، ﻭﻳﺎ ﻏﻠﻀﻲ ﺻﻮﺗﻚ ﻳﺎ ﺍﺟﻌﻮﻧﻲ
ﻫﻨﺎﺀ : ﻣﺶ ﺑﺎﺭﻋﺔ ﻓﻴﻬﻦ ﺑﺲ ﺑﺎﻫﻲ ، ﻭﺍﻟﻠﻪ ﺑﻄﻨﻲ 😣😣 ﺗﻌﺮﻓﻲ ﻣﻦ
ﺍﻟﺨﻮﻑ ﺑﻨﺨﺶ ﻟﻠﺤﻤﺎﻡ 😹 ( ﻳﻜﺮﻣﻜﻢ ﺍﻟﻠﻪ )
ﻧﻮﺭﻫﺎﻥ : ﻓﺎﺗﺖ ﺍﻟﻤﻮﺿﻮﻉ ﻭﻃﻠﻌﺖ ﺷﻦ ﺑﺘﻠﺒﺲ ﻟﺒﻜﺮﺍ
ﺍﻣﺎ ﻫﻨﺎﺀ ﻓﺎﻋﻘﻠﻬﺎ ﻛﻠﻪ ﺷﻦ ﺑﻴﺼﻴﺮ ﻳﻮﻡ ﺍﻟﺴﺒﺖ ﻟﻤﺎ ﺑﺘﺘﻼﻗﻰ ﻣﻊ ﻣﺤﻤﺪ
ﻭ ﻣﺮ ﺍﻟﻴﻮﻡ ﻫﺬﺍ .... ✨🌙
ﻃﺒﻌﺎ ﻳﻮﻡ ﺍﻟﺠﻤﻌﺔ ﺍﻟﺒﻨﺎﺕ ﻭ ﺍﻣﻬﻦ ﻳﻌﺪﻭ ﻟﺤﻮﺵ ﺟﺪﻫﻢ ﻭ ﻳﺘﻼﻗﻦ ﺑﻨﺎﺕ
ﺍﻟﺨﺎﻟﺔ
ﻧﻮﺭﻫﺎﻥ ﻏﺎﻟﺒﺎ ﺗﻘﻌﻤﺰ ﻣﻊ ﺑﻌﻴﺪﻩ ﻋﻨﻬﻦ ﻣﺎﻋﻨﺪﻫﺎﺵ ﻉ ﺑﻨﺎﺕ ﺧﺎﻟﺘﻬﺎ ﻭﺍﺟﺪ 🌚
ﺍﻣﺎ ﻫﻨﺎﺀ ﻓﻜﺎﻧﺖ ﻣﺴﺮﺓ ﺑﻨﺖ ﺧﺎﻟﺘﻬﺎ ﻓﺎﻃﻤﺔ ﺻﺪﻳﻘﺘﻬﺎ ﺍﻟﻤﻘﺮﺑﺔ ﻭ ﻫﻲ ﻋﻨﺪﻫﺎ
ﺧﺒﺮ ﻓﻲ ﺍﻟﺸﺒﺎﺏ ﻭ ﺍﻟﻌﻼﻗﺎﺕ 😐😐 ﻣﺶ ﺳﺎﻫﻠﻪ 💃😬
ﻫﻨﺎﺀ :ﻋﻠﻤﻴﻨﻲ ﻳﺎﻣﺴﺮﺓ ﻛﻴﻒ ﻧﺮﻗﻖ ﻭﻻ ﻧﻐﻠﺾ ﺻﻮﺗﻲ 😭
ﻣﺴﺮﺓ : ﺷﻦ ﺗﻐﻀﻠﻲ ﺗﺤﺴﺎﺑﻲ ﺭﻭﺣﻚ ﺭﺍﺟﻞ ﺑﻴﺒﻠﻎ 😕 ؟؟؟ ﻭ ﺻﻮﺗﻚ ﺳﻤﺢ
ﺍﻧﺘﻲ 😐
ﻫﻨﺎﺀ : ﻏﻴﺮ ﻣﺶ ﺷﻮﺭﻙ ﻋﻠﻤﻴﻨﻲ ﺯﻱ ﻟﻤﺎ ﺗﺸﻠﻄﻲ ﻣﻊ ﺍﺑﺮﺍﻫﻴﻢ 😹
ﻣﺴﺮﺓ : ﻗﻮﻟﻲ ﻫﻜﻲ ﺗﺒﻲ ﺗﺸﻠﻄﻲ
ﻫﻨﺎﺀ : ﻻ ﻣﺶ ﻫﻜﻲ
ﻣﺴﺮﺓ : ﺍﻳﺤﺢ ﻏﻴﺮ ﺍﺳﻜﺘﻲ ﻭ ﺍﺳﻤﻌﻲ ، ﻟﻤﺎ ﺑﺘﺤﻜﻲ ﺧﻠﻲ ﺻﻮﺗﻚ ﻫﺎﺩﻱ ﻭ
ﻭﺍﻃﻲ ﻣﺎﺗﻌﻴﻄﻲ ﺗﺨﺴﺮﻱ ﺍﻧﻮﺛﺘﻚ
ﻭ ﺭﻗﻘﻲ ﺍﻟﺤﺮﻭﻑ ﺑﺲ ﻫﺬﺍ ﺳﺮ ﺍﻟﺼﻮﺕ ﺍﻟﻨﺎﻋﻢ ﺭﺍﻩ
ﻧﻮﺭﻫﺎﻥ : ﻛﺎﻧﺖ ﺗﺴﻤﻊ ﻭ ﺗﻔﻜﺮ ﻏﺪﻭﺍ ﻟﻮ ﺻﺎﺭ ﻭ ﻣﺤﻤﺪ ﻋﺮﻑ ﺻﻮﺕ ﻫﻨﺎﺀ ﺷﻦ
ﺣﻴﺼﻴﺮ
ﻭ ﻣﺮ ﺍﻟﻮﻗﺖ ....
ﻭ ﻣﺮ ....
ﻭ ﺟﺎ ﺍﻟﻤﻐﺮﺏ ﻭ ﺭﻭﺣﻦ ﺍﻟﺒﻨﺎﺕ ﻟﻠﺤﻮﺵ ، ﻭ ﻃﺎﺣﻦ ﻉ ﻭﺟﻬﻦ ﻭﺭﻗﺪﻥ ﻃﻮﻭﻭﻝ
😴😴😴
ﻭ ﺻﺒﺎﺡ ﻳﻮﻡ ﺟﺪﻳﺪ 🌤 ﻭ ﺍﻟﻴﻮﻡ ﻫﻮ ﺍﻟﻤﻨﺘﻈﺮ ﺍﻟﺴﺒﺖ
ﻫﻨﺎﺀ ﻛﺎﻧﺖ ﺧﺎﻳﻔﺔ ﻣﻦ ﻳﻠﻲ ﺑﻴﺼﻴﺮ ﻭ ﻧﺎﺿﺖ ﺑﺪﺭﻱ ﺭﻏﻢ ﻣﺎﻓﻴﺶ ﺛﺎﻧﻮﻳﺔ ﺑﺲ
ﻗﻠﺒﻬﺎ ﻳﺪﻕ ﺧﻮﻓﺎ ﻣﻦ ﻣﺤﻤﺪ ﻟﺪﺭﺟﻪ ﻗﻌﺪﺕ ﺗﻔﻜﺮ ﺍﻧﻪ ﺗﻘﻮﻝ ﻟﺒﻮﻫﺎ ﻣﻌﺎﺵ ﺗﺒﻲ
ﺗﻘﺮﺍ ، ﺑﺲ ﺍﻣﺘﺤﺎﻥ ﺟﺰﺉ ﻣﺶ ﺣﺘﺠﺎﻭﺏ ﻫﻜﻲ 💔
ﻧﻮﺭﻫﺎﻥ ﻧﺎﺿﺖ ﻟﺒﺴﺖ ﻭ ﺷﺎﻟﻬﺎ ﺑﻮﻫﺎ ﻟﻠﻜﻠﻴﺔ ، ﻭ ﺍﻟﻴﻮﻡ ﺍﻻﻣﺘﺤﺎﻥ
ﻓﻲ ﻗﺎﻋﺔ ﺍﻻﻣﺘﺤﺎﻥ -:
ﺍﻟﺼﺪﻣﻪ ﺍﻧﻪ ﺍﺳﺌﻠﺔ ﺍﻟﺪﻛﺘﻮﺭ ﻣﺤﻤﺪ ﻛﻠﻬﺎ ﺗﻌﺘﻤﺪ ﻉ ﺍﻟﻔﻬﻢ ﻓﻲ ﺍﻟﻤﺤﺎﺿﺮﻩ ﻭ ﻫﺬﺍ
ﺿﺎﻳﻖ ﻫﻠﺒﺎ ﻃﻠﺒﺔ ، ﺍﻣﺎ ﻧﻮﺭﻫﺎﻥ ﻓﻄﻮﻝ ﺍﻟﻤﺤﺎﺿﺮﻩ ﻭ ﻫﻲ ﺗﺪﻋﻲ ﻋﻠﻴﻪ 😹
ﺻﺢ ﻣﺠﺎﻭﺑﺔ ﺑﺲ ﻫﻲ ﺍﻟﺜﺎﻧﻴﺔ ﻉ ﺩﻓﻌﺘﻬﺎ ﺗﺒﻲ ﺗﺠﻴﺐ ﺩﺭﺟﻪ ﻋﺎﻟﻴﺔ
ﻣﺤﻤﺪ : ﺍﻧﺘﻬﺎﺀ ﺍﻟﻮﻗﺖ ﻳﺎ ﻃﻠﺒﺔ ⌛ ﻭ ﻧﺎﺿﻮ ﻳﺴﻠﻤﻮ ﻓﻲ ﺍﻭﺭﺍﻗﻬﻢ
ﻧﻮﺭﻫﺎﻥ : ﺣﻄﺖ ﻭﺭﻗﺘﻬﺎ ﻭ ﻫﻲ ﺗﺸﻮﻓﻠﻪ ﺑﻌﻴﻦ ﺣﻤﺮﻩ ﻭ ﺗﻜﺸﺦ ،
ﻣﺤﻤﺪ؛ ﺍﺳﺘﻐﺮﺏ ﻟﻴﺶ ،ﻭ ﺟﻤﻊ ﻟﻮﺭﺍﻕ ﻭ ﻃﻠﻊ ﻉ ﺍﻣﻞ ﻳﺸﻮﻓﻬﺎ
ﻧﻮﺭﻫﺎﻥ : ﺍﺗﺼﻠﺖ ﺑﺰﻳﺪﺍﻥ ﻭ ﻃﻮﻝ ﺭﻭﺣﺖ ، ﻭ ﻃﻮﻝ ﺍﻟﻄﺮﻳﻖ ﻛﺎﺍﺍﺍﺍﺭﻫﻪ ﻣﺤﻤﺪ
ﻭ ﻣﺮ ... ﺍﻟﻮﻗﺖ ... ﻋﺎﺩﻱ ..... ﻭ ﻻ ﺟﺪﻳﺪ .... ﻳﺬﻛﺮ
_ ﻓﻲ ﺍﻟﻌﺸﻴﺔ ⛅⛅
ﻣﺤﻤﺪ؛ ﺍﻟﺴﻼﻡ ﻋﻠﻴﻜﻢ
ﺯﻳﺪﺍﻥ : ﻭﻋﻠﻴﻜﻢ ﺍﻟﺴﻼﻡ ﺗﻔﻀﻞ
ﻣﺤﻤﺪ :ﺳﻠﻢ ﻋﻠﻴﻪ ﻭ ﻗﻌﻤﺰ ﻓﻲ ﺍﻟﺼﺎﻟﺔ
ﺯﻳﺪﺍﻥ؛ ﻛﺎﻥ ﻳﺸﻮﻑ ﻝ ﻣﺤﻤﺪ ﻭ ﺍﻧﺎﻗﺘﻪ ﻭ ﻋﻄﺮﻩ ﻭ ﺟﻤﺎﻟﻪ ﻭ ﻛﺎﻥ ﻣﻘﻮﺭ ﻭ ﻣﺶ
ﺭﺍﺿﻲ ﺍﻧﻪ ﻳﻘﺮﻱ ﻫﻨﺎﺀ ﻭﻻ ﻳﺨﺶ ﺍﻟﺤﻮﺵ ﻣﻦ ﺍﻻﺳﺎﺱ🔥
ﻭ ﺧﺶ ﺍﻟﺤﺎﺝ ﻣﺤﻤﻮﺩ ﺳﻠﻢ ﻋﻠﻴﻪ ﻭ ﻫﺪﺭﺯ
ﻭ ﺑﻌﺪ 10 ﺩﻗﺎﻳﻖ
ﻧﺰﻟﺖ ﻫﻨﺎﺀ ﻭ ﻛﺎﻧﺖ ﻻﺑﺴﺔ ﺑﻠﻮﺯﺓ ﻣﺨﻄﻄﺔ ﺍﺳﻮﺩ ﻓﻲ ﺑﻴﺞ ﻃﻮﻳﻠﺔ ﺗﺤﺖ
ﺍﻟﺮﻛﺒﺔ ﻭ ﺑﻨﻄﻠﻮﻥ ﺍﺳﻮﺩ ﻭ ﺩﺍﻳﺮﻩ ﺷﻌﺮﻫﺎ ﺫﻳﻞ ﺣﺼﺎﻥ ، ﺑﺤﻜﻢ ﻣﺶ ﻣﺘﺤﺠﺒﺎﺕ
ﻫﻨﺎ ،
ﻣﺤﻤﻮﺩ : ﻭﺍﻫﻲ ﺑﻨﺘﻲ ﻫﻨﺎﺀ
ﻣﺤﻤﺪ؛ ﺍﻫﻠﻴﻦ ﺑﻨﺘﻲ ﺗﺸﺮﻓﺖ ﺑﻴﻚ ،
ﻫﻨﺎﺀ : ﺳﻠﻤﺖ ﺍﻫﻠﻴﻦ ﻋﻤﻲ
ﺭﻭﺍﺳﻲ ﺑﺤﺮ ﺍﻟﺪﻳﻦ : ﻃﺒﻌﺎ ﻓﺮﻕ ﺍﻟﻌﻤﺮ ﺑﻴﻦ ﻫﻨﺎﺀ ﻭ ﻣﺤﻤﺪ ﻭﺍﺍﺍﺍﺍﺟﺪ ﺑﻜﻞ ﻳﻌﻨﻲ
ﻓﻲ ﺟﻴﻞ ﻋﻤﺎﻣﻬﺎ ﻫﻮ ،
ﺣﻄﺖ ﻫﻨﺎﺀ ﻛﺘﺒﻬﺎ ﻉ ﺍﻟﻄﺎﻭﻟﺔ ﻭ ﻗﻌﻤﺰ ﻣﺤﻤﺪ ﻉ ﺍﻟﻜﺮﺳﻲ ﻳﻠﻲ ﻣﻘﺎﺑﻠﻬﺎ ﺑﺪﺍ
ﻣﺤﻤﺪ ﻳﺸﺮﺡ ﻭ ﻳﻔﻬﻢ ﻓﻴﻬﺎ ﺍﻭﻝ ﺑﺄﻭﻝ
ﻭ ﻫﻨﺎﺀ ﺳﺎﺍﺍﺍﻛﺘﺔﻭ ﺗﻐﻴﺮ ﻓﻲ ﺻﻮﺗﻬﺎ ﻛﻞ ﻣﺮﺓ ﺻﻮﺕ ﻭ ﻫﻮ ﺭﻛﺰ ﻉ ﺍﻟﺸﻲ ﻫﺬﺍ
...
_ ﺯﻳﺪﺍﻥ؛ ﺧﺶ ﻉ ﻧﻮﺭﻫﺎﻥ ﻟﻘﺎﻫﺎ ﻣﻘﻌﻤﺰﺓ ﻉ ﺍﻟﻼﺑﺘﻮﺏ
ﻧﻮﺭﻫﺎﻥ : ﺍﻧﻀﻨﻲ ﻳﺪﻗﻮ ﺍﻟﺒﺎﺏ ﻗﺒﻞ ﻻ ﻳﺨﺸﻮ
ﺯﻳﺪﺍﻥ؛ ﺗﻲ ﻣﺶ ﻭﻗﺘﻚ ﻳﺎﻓﺮﺧﻪ ، ﺍﻻﺳﺘﺎﺫ ﻟﻮﻃﺎ ﺭﺩﺑﺎﻟﻚ ﺗﻨﺰﻟﻲ
ﻧﻮﺭﻫﺎﻥ : ﻋﺎﺭﻓﺔ ، ﻭ ﺻﻜﺮ ﺍﻟﺒﺎﺏ ﻭﺭﺍﻙ 😑😑
ﺯﻳﺪﺍﻥ : ﻃﻠﻊ ﻭ ﻫﻮ ﻣﺘﻌﺼﺐ ﻭ ﻛﺎﻥ ﺑﻴﻘﻌﻤﺰ ﺟﻨﺒﻬﻢ ﺑﺲ ﻟﻤﺎ ﻻﻗﻰ ﺑﻮﻩ ﻗﺎﻋﺪ
ﻣﻘﻌﻤﺰ ﺑﺤﺪﺍﻫﻢ ﻉ ﺍﻟﺼﺎﻟﻮﻥ ﺗﺮﻳﺢ ﻭ ﻃﻠﻊ ﺑﺮﺍ ﻣﻦ ﺍﻟﺤﻮﺵ
_ ﻫﻨﺎﺀ ﻧﺴﺖ ﻣﻮﺿﻮﻉ ﺍﻟﺼﻮﺕ ﻭ ﺍﻟﺘﻠﻔﻮﻥ ﻭ ﺭﻛﺰﺕ ﻉ ﺩﺭﺳﺘﻬﺎ ،
ﺍﻣﺎ ﻣﺤﻤﺪ ﻣﺎﻧﺴﻴﺶ ﺍﻟﻤﻮﺿﻮﻉ ،
ﻧﻮﺭﻫﺎﻥ : ﺣﺴﺖ ﺑﻔﻀﻮﻝ ﻭ ﻃﻠﻌﺖ ﺗﺮﻗﺐ ﻣﻦ ﺍﻟﺪﺭﻭﺝ ﻉ ﻣﺤﻤﺪ
ﻣﺤﻤﺪ : ﺷﺎﻓﻬﺎ ﻭ ﻟﻤﺎ ﺷﺎﻑ ﺗﻠﻔﻮﻧﻬﺎ ﻓﻲ ﻳﺪﻫﺎ ﺧﻄﺮﺕ ﻋﻠﻴﻪ ﻓﻜﺮﻩ
ﺑﺲ ﻫﻲ ﻣﺎﺣﺴﺖ ﻋﻠﻴﻪ
ﻣﺤﻤﺪ : ﻟﻮ ﻓﻬﻤﺘﻲ ﺣﻠﻲ ﺍﻟﺘﻤﺎﺭﻳﻦ ﻫﺬﺍ
ﻫﻨﺎﺀ (ﺑﺪﻟﻊ ﻭ ﺗﺼﻨﻊ ) : ﺣﺎﺯﺭ ﺍﺳﺘﺎﺯ
ﻭ ﻫﻨﺎﺀ ﺗﺤﻞ
ﻣﺤﻤﺪ : ﺑﺎﻟﺪﺭﻗﺔ ﻃﻠﻊ ﺗﻠﻔﻮﻧﻪ ﻭﺭﻥ ﻉ ﺍﻟﺮﻗﻢ ، ﻭ ﻋﻴﻮﻧﻪ ﻳﺸﻮﻓﻦ ﻉ ﺍﻟﺪﺭﻭﺝ ﻳﺒﻲ
ﻳﺸﻮﻑ ﻧﻮﺭﻫﺎﻥ ﺗﻠﻔﻮﻧﻬﺎ ﻳﺮﻥ ﻭﻻ ،
ﻫﻨﺎﺀ : ﺗﻠﻔﻮﻧﻬﺎ ﻛﺎﻥ ﻉ ﺍﻟﻄﺎﻭﻟﺔ ،
ﻭﻓﺠﺄﺓ
ﺗﺮﻥ ﺗﺮﻥ ﺗﺮﻥ
ﻣﺤﻤﺪ : 😨😨😨😨
... ﻳﺘﺒﻊ
ﻛﻴﻒ ﺣﺘﺘﺼﺮﻑ ﻫﻨﺎﺀ؟؟؟ ﻭ ﺷﻦ ﻣﻮﻗﻒ ﻧﻮﺭﻫﺎﻥ ؟؟؟ ﻭ ﻫﻞ ﺣﻴﺸﻮﻓﻬﻢ ﺣﺪ ؟
ﻭ ﻣﺤﻤﺪ ﺧﻄﺘﻪ ﻧﺠﺤﺖ ﻭﻻ ؟
ﺭﺃﻳﻜﻢ ﻓﻲ ﺍﻟﺤﻠﻘﺔ ﻭ ﻣﺎﺗﻨﺴﻮﺵ ﺍﻻﻳﻚ
