𝑯𝒆𝒓𝒆'𝒔 𝒀𝒐𝒖𝒓 𝑷𝒆𝒓𝒇𝒆𝒄𝒕[𝑪𝒐𝒎𝒑𝒍𝒆𝒕𝒆𝒅]

Ch-6

Unicode

အရင်ကဆို မားရဲ့ဆေးကုသစရိတ်အတွက် အချိန်ပိုင်းအလုပ်မှန်သမျှလုပ်ပြီး ပိုက်ဆံရှာနေရတာမို့ သူ့မှာတစ်စက္ကန့်လေးတောင် နားချိန်မရှိပေမယ့် နေ့ချင်းညချင်းဆိုသလိုသူ့ဘဝက ပြောင်းလဲသွားတာမို့ သူ့အတွက်အသားမကျသေးသလိုဖြစ်နေသည်။ ဒီအိမ်ကြီးမှာရှိတဲ့သူတွေက သူတို့အလုပ်နဲ့သူတို့ရှုပ်နေကြတဲ့အပြင် သူ့ကိုလည်းကူညီခွင့်မပေးတာမို့ တစ်နေ့တစ်နေ့နေရတာ ပျင်းလှသည်။

အခန်းထဲမှာပဲ တစ်နေကုန်နေရတာ ငြီးငွေ့နေပြီမို့ ဧည့်ခန်းဖက်လျှောက်လာရင်း တီဗီဖွင့်ထားလိုက်မိသည်။ ဒီလိုမျိုး စိတ်အေးလက်အေးနဲ့တီဗီထိုင်ကြည့်ဖြစ်တာ ဘယ်အချိန်ကနောက်ဆုံးလဲတောင် သေချာမမှတ်မိချင်တော့တာမို့ စိတ်လှုပ်ရှားစွာဖြင့် ချန်နယ်တစ်ခုပြီးတစ်ခုပြောင်းနေရင်း အကို့ပုံကိုမြင်လိုက်ရတာမို့ မျက်လုံးအပြူးသားဖြင့်ကြည့်နေမိသည်။

တီဗီမှာလာနေသည်က အကို့ကိုအင်တာဗျူးထားတဲ့အစီအစဉ်ကို တိုက်ရိုက်ထုတ်လွှင့်နေတာဖြစ်ပြီး စီးပွားရေးအကြောင်းကိုသာ အဓိကထားပြီး မေးမြန်းနေတာမို့ သူဘာတစ်ခုမှနားမလည်ပေမယ့်လည်း တည်ကြည်ခန့်ငြားလွန်းတဲ့ အကို့ရဲ့မျက်နှာချောချောကို သဘောတကျဖြင့် ငေးနေမိသည်။

သေချာကြည့်မိတော့မှ အကို့ရဲ့ဘယ်ဘက်နှုတ်ခမ်းအောက်နားလေးမှာ မှဲ့သေးသေးလေးတစ်လုံးရှိနေတာကို သတိထားမိသည်။ အကိုနဲ့မျက်နှာချင်းဆိုင်မိလိုက်တဲ့အခါတိုင်း သူ့ဘက်ကအကြောက်လွန်ပြီး ခေါင်းကအလိုလိုငုံ့ထားမိတာမို့ သတိမထားမိတာဖြစ်မည်။

မရယ်မပြုံးပဲ မျက်ခုံးနက်နက်တို့ကို အမြဲတွန့်ချိုးထားတာတောင် ချောမောနေဆဲဖြစ်တဲ့အကိုက အတိတ်ဘဝက သိပ်ပြီးဆုတောင်းကောင်းခဲ့ပုံပင်။

စကားပြောတိုင်း ချွန်ထွက်လာတတ်တဲ့ နှုတ်ခမ်းပါးလေးကို ငေးကြည့်နေရင်း သူဒီအိမ်ကို စရောက်တဲ့ညက အချိန်ကိုပြန်တွေးမိသွားပြီး တစ်ကိုယ်လုံးအပူငွေ့တွေတရှိန်းရှိန်းတက်လာတာမို့ မျက်လုံးစုံမှိတ်ရင်း ခေါင်းကိုအဆတ်မပြတ်ခါထုတ်လိုက်မိသည်။