غنى : تنهدت مرتضى جزعني وين ما اروح الكا بوجهي واستحي اصده انجبر اضل ساكته وهو ديسببلي احراجات ومااعرف شسوي
نرجس : كتلج الف مره مرتضى يحبج وهالشي مبين عليه ملاحظه شكد يهتملج وحتى من متجين يخبص روحه ... لج والله مرتضى خوش ولد والكل يحبه ويمدح بأخلاقه حلو وحباب ودارس شتردين بعد اذا حاول يتقرب منج انطي فرصه والله هو يحبج
غنى : بهدوء نرجس اني ويني وين هالسوالف تدرين بيه بعيده كل البعد عن الحب والعلاقات لا اريد احب ولا اريد انحب
نرجس : ليش شناقصج وتفكرين هيج شو تخبلين وحتى الاستاذ الموقر جعفر معجب بيج ومع هذا انتي معتكفه على نفسج ومالج علاقه بأحد ولا تنطين مجال لأحد
غنى : نرجس انتي تعرفين ظروفي حالياً اني ما اريد شي غير انو أامن مستقبل زين لمروان وهالتشوفين احنه على الراتب والشغل عايشين وبيبي ومروان مرضه ولازمهم دوه كل شهر اني منين اجيب بس كليلي
نرجس : مو كتلج اني اداينج فلوس اذا محتاجه بس انتي مدري ليش هيج معضمه الامور
غنى : اخذيها قاعده فلوس انتي متعبانه بيها محتتهنين ولا تحسين بطعمها
نرجس : لزمت ايدها انتي بنيه مثابره وحبابه وورده توكلي على الله وان شاء الله ينصفج
غنى : ونعم بالله ... ضلينه كاعدين شويه وكمنه لان بدت المحاضره ضلينه على هالمنوال لحد ما خلصنه وطلعنه للبيت ... طلعت اتمشى على الشارع العام حتى اصعد عبريه اخاف اصعد تكسي شكد تتوسل نرجس اروح وياهم بس مااقبل اكرهه انو اثقل على احد خاصه انو استاذي جعفر يصير اخوها واني استحي منه شويه ووصلت ذبتني الباديه على الشارع نزلت شويه ووصلت دكيت الباب طلعلي مروان
مراون : حضنتها الله يساعدج نونه
غنى : هله ياكلب نونه انت بوسته ودخلت هاا بشر شلونك بالامتحان اليوم
مروان : بأذن الله درجه كامله
غنى : ان شاء الله مادام ذكرت الله اكيد تاخذ درجه كامله ... طبيت شفت بيبي واكفه بالمطبخ شلونه الحلو
زكيه : هله يمه الله يساعدج
غنى : بستها ويساعدج حبيبتي عفيه شمسويه غده جوعانه
زكيه : مركه فاصوليه روحي بدلي وصلي هسه بس يتهدر التمن اصب
غنى : هزيت راسي ودخلت لغرفتي نزعت جبتي البسيطه والي كانت قديمه بس حلوه ذبيتها ودخلت للحمام سبحت وطلعت صليت بالصاله شوكت اتغده وانوب انامي ساعه حتى اكعد اخيط ... اي اني اشتغل خياطه حتى اكدر اعيش بيبي ومروان خاصه ثنينهم مريضين ... اباوع لمروان كاعد كبالي يمكن لو امي عايشه هسه مجانت حتحب مروان بكدي اباوعله وعيوني مدمعه حبيبي صار عمره 14 سنه حلو يجنن شاطر وملتزم ومطيع عمري مسمعت منه كلمه لا بس شنو الفائده وهو كلبه ضعيف وكل ساعه يوكع قبل اربع سنوات لاحظنه عليه بس يتعب يتخربط حتى لو ركض مسافه قليله يوكع ... اخذنا للدكتور طلعت عضله القلب مالته كُلش ضعيفه ولازمه عمليه بس مو هسه من يصير عمره 18 واني من يومها خاله كلبي بشيشه وارجف عليه لو كح ... وبيبي هم ضغط وسكر ولازمها ادويه واني مااعرف شلون ادبر الوضع
تعلمت خياطه واني عمري 17 سنه كمت ادرس و اخيط للجوارين والناس ولان خياطي حلو الاغلبيه يخيطون عندي ... اخذ فلوس حتى اكدر ادبر مصرف ... مرات يشلعون كلبي لو ينطن فلوس لو يسكتن واني انجبر اضل ساكته هواي بالكليه اسمع تنمر من الطلاب او بسمار بطريقه غير مباشره ... هاي جبتج مو لبستيها العام ... ليش متدخلين للنادي ... ليش منعزله ... ليش تصعدين بعبريه معندج فلوس تخلين سايق وهكذا ميدرون اني الربع اخاف اصرفه اكول خاف اعتازه بشغله للبيت عندي ابقه معتازه وجوعانه ميهمني اكل واتونس واللبس واخويه وبيبتي مرضى اهم شي عندي مروان وبيبي وطز بكلشي ... اني حتى حلمي تخليت عنه لخاطرهم ... جنت شاطره كلش ودرجاتي كلها كامله بس بالسادس وباخر يوم بالامتحانات مروان تخربط ونقلنا للمستشفى وبيومها مقريت وضليت وياه رجعت نص الليل والماده مقاريتها حاولت قدر الامكان ادرس حتى لو شلون ما كان ... رحت امتحنت وجنت ممجاوبه وبيومها اتذكر حتى تمرضت لان جنت اول مره ادخل امتحان وما اجاوب .... المهم
