آشــين الحُــب

البـارت الثالث عشر

" آشين الحُب "
فاطمة أحمد

النوم بـ عيوني وساعة ٦ الصبح .. واني واخواني بـ الشارع مااعرف شسوي!
الدموع تنزل على خدي ومااكدر احجي شي ..
شنو من أهل اني عندي .. الابو يطردنا بـ نص الليل والام تطردنا بـ ٦ الصبح!

الطريق شطولة صار عليّ .. اريد بس اوصل اريد مأمن ..  والخوف گتلني لا بابا يشوفنا ..

اصعب شعور هو الخوف من الأهل ..
إلي اعرفة أنُ الأهل همة السند لـ أولادهم وهمة الحايط الي يستند علي ابنهم .. الا اني أهلي كل مااستند عليهم أوكع واحس بـ خيبة اكبر من القبلها ..
محد جان الي سند .. غير بس ربي هو الوحيد الي الجئ اله بـ كل زمان ومكان ..

بلعت ريگي من حسيت صارت اكو حركة بـ الشارع سحبت اخواني وكمنا نمشي سريع ..
وصلت لـ بابنا واتذكرت بابا من كال :- بس ترجعون اكتلكم وارجعكم .. لا عبالكم تفكرون بيها!

التفتت ورحت لـ بيت عمي .. باب الشارع أعرف افتحة بس الداخلي مقفول .. كعدوا اخواني بـ الكراج نعسانين ومنا طريق خلصنا خوف وركض ..

بقيت ادك بـ الباب لحدما طلعت النا دنيا ..
النعاس بـ عيونها :- انتن شجابجن شنو حالاتكم هاي!!!

ـ دنيا ..
حجيتها وبجيت
حضنتني بسرعة ودخلتنا لـ البيت وصعدنا لـ غرفتها فرشت النا فراش بـ غرفتها ونومتنا ..
عمي جان طالع للشغل وبس هي وحدها ..

ماادري شكد وقت مر .. فزيت من نومي باوعت اخواني نايمين بـ تعب ..
نزلت جوا سلمت على بيبي وعمتي .. ردن السلام وبقن يسألن شكو وشعدجن جايات من الصبح .. ماجاوبتهن

دنيا سوت صينية ريوك وكالت صيحي لـ اخوانج وتعاي خلي نتريك سوا ..
كعدتهم ونزلنا .. نزلت بدون حجاب لان ماكو غريب .. كعدنا بـ الحديقة برا حتى مانسمع مغثة عمتي حوراء ..

خلصنا ريوك بس بقينا كاعدين نسولف .. وسولفت لـ دنيا كُلشي ..
انفتح الباب ودخل بهاء ..
بسرعه سحبت ملابس من الحبل وخليتها على راسي ..

شافني وكف .. بلع ريكة وتقدم الدموع متجمعة بـ عيونة ابتسم يخفي الي بـ داخلة :- شلونج هدهد!

ـ هلاا بهاء أنت شلونك

ـ يكولون بخير .. سمعت انخطبتي!

ـ ههه اي خطبة مارايدتها .. خب عفية بهاء لاتذكرني جاي اموت اني!

ـ اسم الله عليج ..

بعدة يحجي وشافتة عمتي حوراء :- يااا هذا بهاء هنا تعال خالة تعاال اسلم عليك ..

عافنا وراح ..
للعصر أجن عمتي حوراء وعمتي بشرى اتجمعن .. كعدت وياهن مُجبرة حتى اضيع وكت واحاول اشتت تفكيري ..

التفتت الي عمتي حوراء :- خايبة هوي شهَيدة مو تروحين توافقين على هذا المسربت سعدون !

ـ عمة تعبت اريد أخلص ماتشوفين أهلي كل يوم مشكلة واني واخواني واكعين بيها!