Unwanted Misery

Chapter 19

PARENTS' PLAN

"Yeri, I'm sorry talaga. Promise, wala rin akong alam na ako pala ang planong ipapakasal kay Zach. Ngayon ko lang din nalaman. Kaibigan kita at ikaw ang girlfriend ni Zach pero ako na pala ang nakatakdang ipakasal sa kaniya kaya I'm so sorry talaga."

"Hindi mo kailangang magsorry, Kelly. Wala ka namang kasalanan," saad ko.

"Wala talaga akong laban kay mommy. Ang totoo nga niyan ay nabigla rin ako, syempre ayaw kong ikasal kami ni Zach. Alam ko naman kasing ikaw lang ang gusto niya at tumigil na rin naman ako sa pagkakaroon ng gusto kay Zach pero wala talaga akong magawa para pigilan 'yon."

"Naiintindihan kita," ngumiti ako. "Nagpapasalamat pa nga ako sa 'yo at kahit papaano, gumagawa ka ng paraan para tulungan kami ni Zach. Pero hindi mo na kailangang gawin 'yon. May gusto rin sana akong ipakiusap sa 'yo," napa-iwas ako ng tingin sa hiyang nararamdaman.

"Hm? What is that?"

"Kung pwede sana ay huwag mong sabihin sa mommy mo at sa parents ni Zach na... 'yon nga... na kami ni Zach."

"Oo naman! But I'm curious, ano ang plano niyo?" Tanong niya.

"Natatakot kasi akong baka ilayo siya sa 'kin ni Mr. Evilord kapag sinabi namin ang totoo. Kaya kahit ayaw ni Zach, napilitan siyang pumayag na itago na muna ang relasyon naming dalawa."

"Ang hirap niyon," aniya.

"Mabuti na rin 'yon kumpara sa malaman ng dad niya at paghiwalayin kaming dalawa," buntonghininga na lamang ako.

"So, sinasabi mong hahayaan na muna natin ang kasal-kasal na 'yan?"

"Ganoon na nga, hayaan na muna natin ang mga magulang niyo at matagal pa naman magaganap ang kasalang pinaplano nila sa pagitan ninyo ni Zach, pwede ba 'yon sa 'yo, Kelly?"

"Oo naman. Kung ano ang disesyon niyo at kung saan ako makakatulong, doon ako," aniya na malawak na ikinangiti ko. Sa huli ay natagpuan ko na lamang ang sarili kong mahigpit siyang niyayakap.

"Salamat, Kelly. Sobrang swerte ko talaga at naging kaibigan kita," sambit ko sa ibabaw ng braso niya.

"Ano ka ba, wala lang sa 'kin 'yon. Ano pa't kaibigan kita 'di ba?" Tugon niya.

Hindi ko talaga inakalang ganito siyang klase ng tao. Sa mga sandaling lumilipas na kasama't nakakausap ko siya, mas lalo lamang niyang pinatutunayan ang sarili niyang hindi siya masamang tao na siyang unang impresyon ko sa kaniya noong una ko siyang nakita.

Ilang linggo na ang lumipas at sa mga linggong iyon, kapansin-pansin na ang malaking pagbabago rito sa loob ng mansion ng mga Evilord. Palihim na ang relasyon namin ni Zach lalo na kapag kaharap na namin ang mga magulang nito.

Hindi na kami halos magkibuan sa loob ng bahay at pansin iyon ni yaya Niña ngunit hindi niya iyon pinagtutuonan ng pansin o sadyang nirerespeto niya lang talaga ang kung anong relasyon mayroon kami ni Zach.

Madalas ng pumupunta rito si Kelly at sa kagustuhan iyon ni Mr. Evilord. Madalas siya rito magpalipas ng buong araw. Halos palagi na rin siyang kasabay sa pagkain ng pamilya. Nagpapakita lamang na sobra ang pagtanggap nila kay Kelly para sa nag-iisa nilang anak na lalaki.

Nag-usap na kami ni Kelly at alam na niya ang gagawin. Maging si Zach ay gano'n din. Susunod lamang sila sa gusto ng kanilang mga magulang, magpapanggap silang magkasintahan sa harap nila para maitago ang isiping mayroon kaming relasyon ni Zach. Salamat kay Kelly at nauunawaan niya ang sitwasyon naming dalawa ni Zach.

Isang linggo na naman ang nagdaan at habang tumatagal, kahit papa'no ay dahan-dahan na rin akong nasasanay sa patagong relasyon namin ni Zach. Dagdag pang personal maid niya ako, kaya wala silang napapansin kapag madalas kaming magkasama dahil kasama naman iyon sa trabaho ko.