ဉာဏ်များလွန်းသော ခင်ပွန်းသည်

အခန်း (၇၁)

Burmese Translation of Fu Jun You Zhe Dian {夫君，悠着点} by Author 苏行乐.

အခန်း (၇၁)

TRANSLATOR - NC

--------------------

မီးဖွားရာမှ ရန်ရှီးနဉ်တစ်ယောက် နန်းတော်တွင်းမှာပဲ အားဖြည့်နေထိုင်ရင်း သက်သာလာခဲ့သည်။

ရန်ရှီးနဉ် မီးဖွားပြီးနောက်ပိုင်း နာလန်ပြန်ထရာ၊ ရင်သွေးကို နို့ချိုတိုက်​ကျွေးချိန်အတောအတွင်း မင်းကြီးသည် ယုံကြည်စိတ်ချရသော အပျိုတော်များ၊ မိန်းမစိုးများမှတဆင့် အာဟာရပြည့်ဝသော စားဖွယ်သောက်ဖွယ်များကို သူမထံ ပို့စေသည်။

တစ်လကြာသော် ရန်ရှီးနဉ် လမ်းကောင်းစွာ ပြန်လျှောက်နိုင်လာသည်။ သူမ၏ သားတော်လေးမှာလည်း ပြည့်ပြည့်ဖြိုးဖြိုး ဖြစ်လာတော့သည်။ အငိုကတော့ သန်၏။ 

"ဘုရားရေ...!" ရန်ရှီးနဉ် ပွားနေမိတော့သည်။ "ဘာကိစ္စ ဒီလူရမ်းကားလေးက သိပ်ငိုနေတာလဲ၊ ခုနကတင် အိပ်ပျော်နေတာ မဟုတ်ဘူးလား"

ရန်ရှီးနဉ်၏ သားလေးမှာ မနက်လည်း ငိုသည်။ နေ့လည်း ငိုသည်။ ညနေလည်း ငိုသည်။ မအိပ်ခင်လည်း ငို၏။ တစ်ခါတရံ ပျင်းနေလျှင်လည်း ငိုသေး၏။ တခြားကလေးများကတော့ နည်းနည်း ငိုပြီးလျှင် အိပ်ပျော်သွားတတ်ကြသည်။ သို့သော် ဤလူရမ်းကားလေးကတော့ အချီမခံရမချင်း ငိုနေတတ်၏။ ဒါပေါ့လေ၊ လူရမ်းကား ဖေ့ကျင်းမှာ လူရမ်းကားပေါက်စသားလေး ရှိမည်ကိုး။

လွန်ခဲ့သော တစ်လကတော့ သူမ သား ငိုလေတိုင်း လုပ်ကြံသူ တစ်ဦးဦးဝင်လာ၍ အန္တရာယ်များ ပြုနေသလားဟု ရန်ရှီးနဉ်မှာ စိုးကြောက်ထိတ်လန့်ခဲ့ရလေသည်။ သို့သော် တစ်လကြာသော အခါမှာမူ သားဖြစ်သူ အငိုကြိုက်၍ ဝါသနာပါ၍ ငိုနေခြင်းဖြစ်သည်ကို သဘောပေါက်သွားပြီး ရန်ရှီးနဉ်လည်း နေသားကျသွားတော့၏။

ရန်ရှီးနဉ်ကတော့ ကလေး ငိုတိုင်း အလိုလိုက်ပြီး မချီပေးနိုင်။

သို့သော် ဖေ့ခန်းမှာမူ မိမိ၏ တူလေး ငိုနေသည်ကို မကြားရက်နိုင်ဖြစ်နေရှာသည်။

အရှင်မင်းကြီးက ရန်ရှီးနဉ်၊ ဖေ့ခန်းနှင့် မြေးတော်လေးကို မည်သူမျှ မနှောင့်ယှက်စေရန် အမိန့်ထုတ်ထားသေစသည်။