لمن قال لي ما مشكلة هسي نتطلق ونحقق ليك أمنيتك يا سسترة ميامن الفي شنو والماف شنو؟؟ .. عاينت ليهو وأنا عارفة ومتأكدة من أنو ما ح يعمل كدة رغم أنو هو كان بقول في كلامو دا بي نبرة جدية .. بس عارفاهو ما ح يطلقني لانو أنا واقفتا أعرسو بعد تعب وغير كدة هو إستحالة يضيع من يدو فرصة أنو يتولى مسؤؤلية شهد ويبقى زي أبوها ف كلامو دا كان عشان هو بجاري فيني وعايز يعرفني ح أصل لي وين ونهايتي شنو .. قال لي في شنو مالك سكتي فجاة؟ مش عايزانا نتطلق؟ .. قلت ليهو عاين يا جنابو فؤاد الأفضل نكون واضحيين وما نتكلم كتتير في حاجة ما ح تحصل ونضيع وقتنا في نقاش ما منو فايدة لانو أنا عارفه إنك ما ح تطلقني ومتأكدة كمان عشان أنت بتحب شهد شدديد وما ح تقبل تضيعها من يدك وتضيع فرصة أنك تربيها .. قال لي طيب طالما إنتي عارفه إني ما ح أعمل كدة من البداية بتطلبي الطلاق لييه؟ لعب هوو؟ .. قلت ليهو غاظني برودك ياااخي يعني والله ما ممكن يا فؤاد تكون بارد بي الطريقة دي ما ممكن عدديل .. قال لي البرود دا حاجة طبيعيه فيني ف الاحسن تتعودي عليهو من بدري وما تنتظري مني شي أو تنتظريني أتفاعل معاك في حاجة نهائيًا .. قلت ليهو غااايتو غلطانة أنا البتكلم معاك وبحرق في دمي على الفاضي أنت ما ممكن تتغير خالص .. قال لي بي ابتسامة مستفزة كدا: بالظبط .. أتنهدتا بي زهج وبادلتو نفس الابتسامة .. أتجاوزني وقال لي بي مناسبة سيرة شهد هي وين لسه ما جات من قبيل؟؟ .. قلت ليهو المفروض تكون عند ناس أمي لانو أمي قبيل ضربت لي وقت الجوطة وقالت لي أنها معانا و... قبل ما أتم كلامي هي جات داخلة وكانت ماسكة مؤيد ولد حازم من يدو وجايباهو معاها وهو بيبكي .. شهد قالت لي فؤاد: تؤاد أنا قبل شوية كنت دايه هنا عشان مريم جابتني من ناس حبوبة لكن قبل ما أدخل ثوفتا مؤيد قاعد يبكي وأبا يوريني هو مالو اثألوا لي قاعد يبكي .. فؤاد قرب منو ومرر يدو على شعرو وقال ليهو في شنو يا بطل مالك بتبكي؟ .. مؤيد قال ليهو أمي من الصباح مافيشه وخالتو سارة قبيل لمن جات تشيل تلفونها مني قالت لي أمك وأبوك طلعو مشوار وح يجو راجعين بعد شوية لكن لحدي هسي ماما ما جات وبابا قاعد جوا الغرفة وما بفتح لي الباب أمي فاتت وين يا عمو؟؟.. فؤاد قال ليهو أمك وأبوك بعد ما مشو المشوار مشو ناس حبوبة وأمك قالت إلا تبيت هناك عشان كدا بابا رجع براهو وما فتح ليك الباب لانو بكون ما أنتبه لي دقك .. مؤيد قال ليهو لكن ماما دايما لمن تكون عايزة تبيت عند ناس حبوبة بتسوقني معاها .. فؤاد قال ليهو لانو المرة دي هي مشت ناس حبوبتك من مشوارها ما من هنا عشان تسوقك معاها وبعدين هي ما قايلة نفسها ح تبيت .. مؤيد قال ليهو بس أنا ما بعرف أنوم بدونها .. فؤاد قال ليهو الليلة بس حاول نوم مع أبوك وبكرة أمك بتجي راجعة.. مؤيد قال ليهو طيب .. فؤاد قال ليهو خلاص أرح لي أبوك كان يفتح لينا الباب .. وساقو ومشو...
كنت عايزة أمشي معاهم لكن تلفوني ضرب ف ما قدرتا .. لقيت دي سارة رديت عليها وقلت ليها ايواا يا سرو .. قالت لي طمينيني الوضع عندكم كيف؟ وحازم رجع؟ ورجاء حالتها بقت كيف؟ .. قلت ليها الوضع هدأ نوعاً ما وايواا يا ستي حازم جا راجع قبل مدة بسيطة ما كتيرة ورجاء كويسة .. قالت لي يا حليلو قاطع قلبي والله يا ميامن والعجب ولدو طبعا ما شفتيهو قبيل حنني كيف لمن مشيت أجيب منو تلفوني وقعد يسألني ويقول لي "خالتو سارة إنتي أهلي وين؟؟ ومشو لي بدوني؟ " أضطريت أكذب عليهو وقلت ليهو مشو مشوار صغير وح يجو راجعين في أسرع وقت وعشان أشغلو كتبتا ليهو كم تمرين وقلت ليهو لو الحصة الجاية لو جيت ولقيتك حاليهم صاح وبي طريقة حلوة ح أديك هدية وهو أتشجع لي الفكرة وقال لي طيب .. خليتو بحل فيهم وقلت ليهو بعد تخلص أرقد نوم ولمن أهلك يجو ح يصحوك حاضر؟ .. قال لي حاضر....
