كل مخلص في الهوى واعزتي له...لوتروح سنين عمره ينتظرها

بارت19

بالمركزنواف يشرب من قهوته السوداء ويقلب الاوراق الي حوالينه ويقراء هنا ويكتب هنا ومندمج
جلست جنبه ماحس عليها ناظرته كيف مندمج باهتمام مع هالاوراق
سحبت ورقه بهدوء تقراء عقدت حواجبها ماانتبه لها الا لما قالت:قضية مخدرات!
لف بسرعه جهتها وسحب الورقه:خلي عنتس اللقافه
لفت بكل جسمها له وهي عاقده حواجبها:وشهو شغلك
تأفف بتعب :افنان ماني رايق لتس الحين خليني اركز
افنان سكتت تطالعه وهو يقراء مااهتم لها وقفت بقهر:وركز زين اني مااعرف عنك شي من تزوجتك وانت عارف كل صغيره بحياتي
اتجهت للمطبخ وواضح الزعل والعصبيه من طريقة مشيها
زفر وحط الاوراق من يده ولحقها وقف على باب المطبخ شافها تغسل الصحون وهي اصلاً نظيفة تنهد وقف وراها وباس كتفها:اسف وش تبين تعرفين امري
لفت عليها:كل شي كل شي يانواف
نواف ابتسم وهو يقرص خدها بخفه:كل هالعصبيه عشانتس ماتعرفيني اسئلي وبجاوبتس
ميلت فمها من قال بضحكه:كملي غسيلتس والحقيني
رجع مكانه جاته وهي تمسح يدها وجلست:اول شي كيف
عرفت بالي يصير معي
ناظر فيها ثم ضحك:ماراح تصدقين من وين اجيب علومتس
افنان عقدت حواجبها وتنتظره يكمل:مريم بنت عمتس
شهقت بتكذيب:مريوموه ام لسان ، ضربت كتفه بزعل:وانت تسحب الحكي من البزارين
ضحك:وش اسوي دامتس ماتعطيني وجهه
افنان:ويازيني يوم اعطيك وجهه وانا مااعرفك
مد كفه لها:تدرين انها جاتني عشان هالجرح تقول افنان دكتوره بتشيل وجعك
تأملت يده الي فيها ثار جرح وسكتت ماتدري شتقول وهو كذلك سكت ينتظرها تتكلم
:حكني عن نفسك
رجع يرتب اوراقه ويحطهم بالملف:مااعرف قلت لتس اسئلي
افنان بتردد:اهلك وينهم امك ابوك
ابتسم بحزن:أمي وابوي واخوي الصغير توفوا بحادث قبل10سنين وبقيت لحالي عايش ببيتنا عاد تخيلي واحد عمره21 تحمل مسؤولية نفسه ودراسته تعبت يافنان تعبت حيييل لين صرت ماانا عليه الحين
افنان وعينها تتأمل ملامحه ترحمت عليهم بهمس ثم قالت:خوالك واعمامك ماتطريهم
اختفت ابتسامته:طردوني على قولهم مايتشرفون بولد امه اجنبيه تقاسموا ورث ابوي ورثي اخذته منهم غصب بالمحاكم ومن بعدها انقطعت عنهم نهائياً الي عشتيه من طمع عمتس عشت انا من طرفين
انصدمت ووضح على وجهها ماتوقعت ولاواحد بالميه تكون حياته بهالشكل تأملته مافيه ملامح اجنبيه شكله مااخذ شي من امه :اسفه
قرب منها:وليش الاسف مات قليبي ناحيتهم ماعاد اهتم لهم
سكتت ماتدري شتقول تحس انها غلطت بس هي ماتدري
رفع راسها:شبلاتس
افنان:ماكنت ادري
حضن وجهها بيده: لاتلومين روحتس كملي استجوابتس ياحضرة المحققه
، ابتسم لها اما هي تحس تبخرت كل الاسئله الي كانت تدور براسها طولت ساكته:إذا ماعندتس اسئله خليني اكمل شغلي
وقفت بسرعه:كمل شغلك
زفر وهو يقلب في اوراقه تعكر مزاجه وهو يبين لها عكسه
:
بعد صلاة العصر تجهزت لبست رفعت شعرها كامل ذيل حصان دخل وهي تلبس خاتمها ابتسمت له
مسكها يلفها له:كثيير هالزين علي يااخت سياف
نزلت راسها بخجل وهو مكمل يتأملها بإعجاب تام
اندق الباب وفز كان شارد بجميلته ضحكت عليه بخفيف
فتح الباب ترف واقفه بكشتها ولابسه تيشرت ايمن الي صاير ثوب عليها ضحك ونزل لمستواها وهو يبعثر شعرها:صح النوم ياحلوه
ابتسمت وهي تناظر وراه:الله هبوب هنا
ضحكت بفرحه وهي تأشر لها ببوسه طايره رجعت لها البوسه بنفس لفت راس حمد لها ساحت بمكانها من الحياء من قال
:ماشاءالله البوسه لناس وناس لا
ترف:ابي اجلس عندكم
حمد وهو يدفعها:يلايلا عند امتس
جات امه على كلمته تسحبها من شافت شكلها:ياهلبنت الي ماتستحي امشي عدلي روحتس
مشت معها وهو التفت لهبوب :نمشي
هزت راسها ولبست عباته وطلعت معه وهم يمشون شاف سياف واقف عند الباب طلعت منها شهقه غصب عنها التفت بسرعه لها اما هي اسرعت بمشيها لاخوها الي استقبلها بإبتسامه حضنته وسلمت على راسه :ماامداتس تشتاقين
هبوب ببكي:اكيد بشتاق لكم
حاوطها بجنبه وسلم على حمد بعد ماسلم عليه دخلت على طول مشتاقه لجدتها الي تصحى معها من الفجر وتناقرها
قفل سياف وراها الباب
حمد وهو يسحب بكت الدخان الي كان بالجيب العلوي لسياف بعدم إعجاب:من متى
سحبه منه ورجعه بجيبه:من اسبوع
كتف يده :وتجاوب بعد وش الي مضايقك
سياف وعيونه تنتقل بكل مكان عشان ماتطيح بعين حمد ويفضح نفسه انقذه صوت بكي هبوب الي وصلهم ضحك على وجهه حمد الي انخطف وعيونه للباب :لاتخاف بنتنا دمعتها على طريف
ناظر له :الله يعيني