درب القطاطعية(مكتملة)

38

🎭درب القــــطـــــااطــــــعــــيــة🍷🛡️

*البارت مئة وستة وثمانو(186)

•بأنامل :khadija Akrouch

🥂بناات القرية فدرب القطاطعية 🎭🍷

_ وَأراكَ في ڪُّلِ بِقاعِ الارضِ ڪأَنَّما ، لا جُرمَ في فَلڪي يدورُ سواک

ضارت كي سمعاتو كيرحب بيها..كان لابس فوقية عريضة ووجهو كيخليك ترتاحي ونتي كتشووفي فيه ...باينة فيه انسان طيب مشات لعندو تعاونو شادة فيه حيت كتبان فيه عيان وكيتمشا غي بالعكاز ..گلساتو فوق الفوتاي وگلسات جنبو وهي كتحاااول تذكر فين شافتو ..بقات كتشووف فيه وفلحظة فتحااات عينيها حاطة ايديها على فمها كي تذكراااتو وتفكرات النهار الاول لي تلاقاتو ...شاف ردة فعلها وهو يتكلم مسولها ...

الحاج: مالك ابنتي ياك لبس؟!

تذاركات الوضع وبعدات ايديها على فمها كتقاد فالكلسة باش تبان طبيعية ...حيت باينة فيه ماعقلش عليها واصلا العمر ديالو كبير وذاكرتو غتكوون ضعيفة وهدشي فصالحها ...

ماريا: لا والو الحاج ...اش خبارك بعدا الصحيحة هي هديك..

الحاج: الحمد الله ابنتي راني شرفت وحاجة طبيعية تكون صحتي على قد الحال..اوا ابنتي عاودي ليا اش جابك لعندي ونتي مكتعرفينيش ...

ماريا:انا غنعااود ليك كلشي الحاج ..سمعني وعطيني وذنيك باش حتى نت تجاوبني ...

حرك ليها راسو للايجاب كيسمع لكلامها ..تنهدات وهي كتدعي الله اسمح ليها على هدشي لي غادي تگول ابتاسمات وباشراات فكلامها ...

ماريا: انا الحاجة ساكنة انا وختي فواحد الدرب كيگول ليه درب القطاطعية..حيت بصح حاكمينو زوج خوت قطاطعية قاطعين النفس فالجيران ومحكمين فيهم من كبيرهم تال صغيرهم ..انا وختي جابتنا الظروف ورزقنا طيحنا فداك الدرب سكنا فيه ..غي هو حنا كنا مرتاحين وواخدين راحتنا فيه ماشي بحال الجيران ..الخوت كانو ظريفين ...تطورات علاقتنا معاهم وواحد فيهم ولا كيبغي ختي الصغيرة وقرر باش يخطبها من عندي ولكن رفضت حيت وخا هكاك مانقدرش نزوج ختي لقطاطعي ماعندو حد يتيم ومقطوع من شجرة  ...بقا معايا ولكن ديما كنت كنرفض ..ومني شافني مصرة قرر باش يعتارف ليا ويصارحني بلي هما ميسورين وعندهم ڤيلا  وبلي جدو باقي حي ..وباش نتاكد طلبت منو يعطيني العنوان وهانا دبا جيت لعندك ...

بقا مركز معاها وكي سمع بلي واحذ فالخوت غيخطب بانت الضحكة على وجهو والفرحة بانت من هضرتو ..

الحاج: هي گولي ليا واااحذ فحفاايدي قرر يتناازل ويتزوج اخيرا ويدير ولادو ..حمدتك ياربي وشكرتك ..ولكن شكون فيهم ...

ماريا: المبوق

الحاج:شكوون؟!

ماريا: امير الحاج امير ...