حب بعد الزواج

شريان (نبذه)

#حب بعد الزواج(4)
#شريان (نبذه)
#زينب أمير

#جانب -- منذر:

زيي او ك معظم الشباب دخلت في علاقات حب كتيرهه م بكذب عليكم حياتي كلها كانت عباره عن سن طيش ومراهقه.. كان كلو همي اطلع وانبسط مع اصحابي ونمشي شارع النيل وقعده قهوه وبلياردو وخلاص،، صراحه كنت شخص غير مبالي لدرجه ما،، ح تقولوا لي طيب اهوو انت عايز تتزوج ليه طيب؟ مش الزواج ده مسؤوليه كبيره ومعنى كده ح تبطل البتعمل فيهو ده كلو؟ ح اقول ليكم قبل اربعه سنوات  بالضبط بديت أدرك في البعمل فيهو ده وقلت لنفسي مرحله وعدت واغلبنا بنكون عايشين فتره لعب ومراهقه،، وفجأه بنقعد مع نفسنا وبنقول نحنا للأن عملنا في حياتنا شنو؟ اهدافنا كانت شنو او هي شنو؟ فتره نقاهه مع نفسي وقلت خلاص ي منذر اوقات اللهو واللعب انتهت،، قبل سنتين عملت لي مشروع وكان ناجح جدا،، استثمرت فيهو وقتي وعقلي والحمدلله كلو اتسهل ونجح،،حاليا شغال مع ابوي واخواني الكبار ،،، بالنسبه للزواج فهو حرفيا مسؤوليه كبيره زوجه وبإذن الله ح يكون في اولاد كمان وكل شئ ح يزيد وفجأه ح الاقي نفسي م برأي واني بقيت رب اسره،، طيب انا هسي حاسي نفسي اني قادر للمسؤوليه دي وقادر اني اكون زوج وأب كمان،،،، بالنسبه ل لجين ف هي زي م قالت ليكم شفتها في تخريج،، انا م بقول ليكم حبيتها ولا كمان أعجبت بيها،، ح تقولو لي طيب ل شنو الخطوه الجاده دي؟ ببساطه أمكن لاني حسيت بيها انها المناسبه لي ولسبب تاني ح تعرفوه قداام...

صباحاً :

خلاص انتهيتي ولا باقي ليكي كتير؟ لا باقي لي دور واحد في النشاف... قالت لي سمح بعد تخلصي تعالي لي في بيتي بهناك،، رديت ليها وانا شايله الملابس في الحوض تمام ي رحمه،، بديت انفض واشرشر في السلك،، بعدها ب دقائق جاتني تاني ماسكه تلفوني وهو بضرب قالت لي هاك ي لجين تلفونك ده من قبيل بضرب،، شريت اخر قطعه وقبلي م امسكو منها قلت ليها منو،، فتحتو وختتو في اضاني وقالت لي بنبره سريعه هاك هاك ده منذر،، قبلي م ارد ليها لقيتو بقول لي الو الو السلام عليكم،، اتنحنحت وقلت ليهو ايوه معاك كيفك وعليكم السلام،، قال لي بخير الحمدلله،، امس الحاجات نسيت والله وم نزلتها بمر عليكم بعد الفطور لو م عندكم حاجه،، قلت ليهو لالا م مشكله تمام،، قال لي طيب  وقفل.. وقفت مع نفسي مسافه بفكر هل المكالمه جافه ولا انا متحسسه زياده عن اللزوم؟ ده حتى م قال لي انتي كيفك؟!! لو دي البدايه كده النهايه بتكون كيف؟ ،، مش مفترض ال مخطوبين ديل يكونوا فرحانين والخطيب دائما بهتم بخطيبتو وبحسسها بحبو او ع الاقل عايزها وشاريها؟ طيب انا ليه م بحس منذر كده؟ مسحت وشي وقلت ي لجين دي ياداب البدايه وانتو لسه يادابكم بتتعرفوا ببعض وان شاء الله كلو ل خير،،، ايوه ثواني جايه اهوو،، مشيت سريع ع بيت رحمه لأنها كانت بتكورك لي،، دخلت وبقيت بناديها قالت لي ايوه في المطبخ هنا مشيت ليها لقيتها بتجهز ليها في ملاح تقليه.. عايزه افتح خشمي كده قالت لي قبل م تتكلمي نفسي فيهو وقلت اسويهو نفطر بيهو وانا حاليا لا تعبانه ولا حاجه.. وزاتو ماف حاجه متعباني غير النوم الكتير،، عاينت ليها وسكت منها ل ثواني،،، تاني قلت ليها القال ليك منو انتي ي بت اني ح أسألك؟ ضحكت وقالت لي بعرفك انا من امس ولا من اول امس؟ ،، سنوات ي بيبي سنوات،، المهم اعملي العصير هنا وشيليهو طوالي علشان نفطر جعت انا والله اضافه ل كده كم مره قلت ليك م تقولي لي ي بت،، متزوجه انا ع فكره وأم بإذن الله قريبا،،، غمزتا وقلت ليها زوجه لكن،، تمام تمام وين السكر طيب ي امنا؟! ...

وانا في المطبخ بعمل في قهوه سمعت الجرس بضرب،، بنادي ل امي ورحمه ماف واحده فيهم بترد علي،، وطيت الشعله لاني كنت واقفه فيها وطلعت من المطبخ وشغاله ل الفي الباب ايوه جايه جايه ،،، مع ختت يدي للمقبض  كده كان اسمع ليك  صوت امي،، منو في الباب ي لجين؟ وانا بفتح في الباب ومقبله عليها قلت ليها اهوو بشوف لسه،، التفت ع الباب ساعه سمعت صوت زول بقول السلام عليكم،، عايزه ارد كده لقيت امي جايه علينا وبتقول ليهو اتفضل اتفضل وعليكم السلام،،،، مد لي يدو قمت مديت ليهو يدي احساس اسلم وكده لقيتو مد لي الأكياس اتنحنحت باحراج ومسكت جزء منها،، جات امي سلمت عليهو وانا دخلت طوالي بعد الموقف البيش ده....ختيت الأكياس في الصاله،، مسافه شفت ليها مكان مناسب لقيتهم داخلين علي وشايلين أكياس هم كمان،، ختوهم مع ديلك وقال طالع،، امي حلفت عليهو يفطر اول لكن قال فاطر قالت ليهو سمح اشرب الجبنه،، عاينت لي وقالت لي امشي جيبيها ي لجين سرعه،، حاول يعترض امي قالت ليهو والله م بتطلع  ساي،،، مشيت وخليتهم بتناقشوا،، صفيت القهوه وختيت كبابيها ومعاها كبايه مويه،، م لقيت حاجه  اختها مع القهوه،، لا كيك لا غيرو،،،، طلعت ختيت ليهم الصينيه ،، كان اسمع ليك صوت رحمه وهي بتسلم من خشم الباب،،، جات داخله وشايله صحن بسبوسه في يدها في قلبي قلت الحمدلله الجابتها ،،، الونسه كانت عاديه واغلبها عن الأهل واخبارهم مرت عشره دقايق وقام ع حيلو استأذن قال مشغول شويه،،  امي وقفت معاهو وصلتو جنب باب الشارع،، جات داخله وهي بتشكر فيهو ساي ،،، رحمه قالت ليها ود خالتي م شاء الله عليهو تبارك الله،،، عاينت ليها بطرف عيني،،، قرصتني في يدي وقعدت تضحك...

الايام بتمر عادي وخلصنا كل حاجه بتخص الحبسه،،، ياهو خالتو خديجه     واخواتها جاييننا بكره...الايام الماضيه كنت بمش مع مزن السوق نتم النواقص،،، لانو رحمه كان الحمل متعبها شويه...

#"في جانب رحمه"

جاا داخل وقفل الباب وراهو سمعت صوت المفتاح قامت طلعت ليهو بره،، وقفت تعاين ليهو،، احمد قعد يعتذر ليها،، قبلت منو بزعله وقالت ليهو تسعه ي أحمد!؟ الساعه تسعه! ده ع اساس قلت ح تجي بدري   ونقعد مع بعض ونعمل جو ظريف،، قرب منها وخت يدو في كتفها وقال ليها غصباً عني والله،، الشغل فوق راسي لكن بوعدك بكره ان شاء الله ح اجي بدري شديد واقعد معاك لمن تزهجي مني،، حضنتو وقالت ليهو استحاله انا ازهج منك كل الموضوع  انا مشتاقه ليك شديد شديييد وعايزه اتونس معاك واحكي ليك وافضفض،، باسها في رأسها وقال ليها انا زاتي مشتاق ليك اكتر من م تتخيلي واشتقت كمان ل عسلنا ده كان ولد ولا بت،، ابتسمت وغمضت عيونا حضنا عليهو زياده وهم لسه واقفين..

*ملحوظه*(1)
بالنسبه ل تأخير الروايه ف انا يجماعه بنزل حسب التفاعل لقيتو سمح بنزل،، لا بنتظر شويه،، عايزين كل يوم بارت اجدعوا ال لايك وبصلكم البارت اسرع..

*ملحوظة*(2)
انا م عندي مشكله العايز يرسل الروايه في اي قروب يرسلها،، ع شرط اسمي واسم الروايه موجودين،، يرسلها زي م انا مرسلاها بالضبط،، ماف داعي تقسم البارت نصين وترسل كل واحد براهو،، وبس والله...

#يتبع...