سحرتني عيناك💕🎶

الحلقة22👰🏻🍃

سحرتني عيناك💕🎶
للكاتبةHaboshaM
الحلقة22🍃

فات شهر كامل وجي عرس هبة ومحمد‍💕🎶..وأخيراً بيتحقق حلمهم وبيكونو مع بعض❤..
(مش حنحكي عن التفاصيل واجد وبنختصر لأنها معروفة❤)..
يوم الإثنين مشت هبة للحمام البخاري ولبست البودري💕ومشت معاهافاطمة ووفاء بس.. والباقي مشو معاهم بالسيارات وحصلو جو سمح❤..روحت قبل المغرب دارو تورته على شكل ردي بودري ودارو الرشدة المبكبكة(المقطع) وميخلاش الوضع من الدربوكة اللي تخدم💕..
(لبس البودري محلاها💕كل بنية تتمناها🎶..
لبس البودري والحنة💕ربي مايحرمنا منه🎶..
وعروستنا تقول حمامة💕لبست بوخطين تواما🎶)..

يوم الثلاثاء كانت الكسوة💕..جو مع العصر وكانو حوالي 20مرا..
جابو هبة وسبعتها عمتها الكبيرة تسكن ف الشرق اسمها'نزيهة' وقعدو يشتو عليها..ودارو الداعبة بين أهل العروس وأهل العريس..

يوم الأربعاء كانت الحنة💕..فاطمة ووفاء لبسو نفس بعض سروال أكحل وبلوزة بيضاء فاطمة مكتوب عليها صاحبة العروسة💕🎶 ووفاء من قدام بنت عم العروسة💕🎶 ومن ورا بنت خالة العروسة💕🎶 ومرسوم عليهن بنت لابسة ردي بودري💕 دايرات شعرهن كودة(كعكة)وفاطمة دايرة الشيانه مادارت شي على وجهها لكن وفاء دارت لمسات خفيفة💕..
مع العصر جهزو المكان للحنة وجابو هبة..فتحو العلاقة ويوزعو شوي وبدو العزايز يشوبروا فيها ويلالو..فاطمة(جدة فاطمة صاحبتنا)وأم الخير عمه بوها أيديها الأثنين ورجليها وحده جداها مبروكة أم بوها والتانية جداها امباركة أم أمها❤..(وميخلاش الأمر من التصوير طبعاً وفاء مخلتش حاجة الا وصورتها)..
المهم كملو وغطوها💕وجت جنبها فاطمة ووفاء يطيرن عنها ف الكساد💕دارن شوط سمح بالدربوكة لين تعبن..
(يامبروك عليك الحنة💕درتي حوش تجينا منه🎶..
مبروك الحنة في أقدامك💕والخير وراك وقدامك🎶..
ياأم صباع تقول شماعي💕جيتي للحنة تداعي🎶..
مبروك شبورك بالنيرة💕يابنت بوعين كبيرة🎶)..
وقعدن يهدرزن💕..
فاطمة:محمد يتصل بيك..
هبة:صكري عليه وابعتيله مسج قوليله مش فاضية توا بعدين نكلمك..
فاطمة(دارت زي ماقالتلها):والله ماك مكلمتيه نعرفك أني..
هبة:يتعلم الصبر شوية..
وفاء:حرام عليك الولد يبي يصور معاك بس..
هبة:وأني منبيش..
فاطمة:التصوير بالبودري ميتفوتش بكل راه..وبعدين حرام عليك حارمتيه منك من الأسبوع اللي فات واجد عليه هكي💔..
وقعدو يقنعو فيها بعد تحول الحنه تمشي تصور مع محمد💕🎶قعدو فوق راسها لين اقتنعت💕..
بعد حوالي ساعتين ونص هبة فكت الحنة وكانت صابغة تهبل(الحاجة مبروكة ماخلت حاجة الاوحطتها فيها)ومشت مع عزيز للمصور بتصور مع محمد💕عزيز ماخلوشي يخش معاهم للتصوير لذلك محمد خدي كامل راحته ف اللقطات.. وهبة عاجبها الجو وع أساس متبيش💕..
المهم كملو وروحو مع المغرب وبدت السهرية💕..
وفاء لبست فستان لفوق الركبة لونه أحمر كتوفه نازلات وفتحت شعرها ومكياج خفيف شوية وطلعت روعة❤..
فاطمة لبست فستان للركبة منفوش شوي لونه اكحل وكمامة شيفون وفتحت شعرها ومكياج مفيش أخف من هكي لكن طلعت خيال♥..
قعدن خاشات طالعات ع التقديم وهكي بعدين طفو المنظومة اللي كانت والعة من بكري وخدو الدربوكة ومشن جنب هبة وبدو يشطحو💕💃..