في مهب الريح

10

*#في~مهب~الريح《10》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
المهم لمن النتيجه طلعت شلناها و مشينا دخلنا بيها للدكتور ، قال لي عندك لوز بس ، أبوي قال ليهو البت دي ليها اسبوع عيانه و ما قاعده تاكل كويس و دائماً تعبانه و مصدعه ، دا كلو لوز بس !!
الدكتور قال ليهو اي لوز بس ، ح أوصف ليها أدويه تلتزم بيهم و بإذن الله ح تبقى كويسه ، المهم طلعنا و مشينا الصيدليه و شلنا الأدويه و رجعنا البيت و أنا راسي عايز يتشق من الصداع ، المهم اول ما وصلنا البيت ، أبوي قال لي أكلي عشان تبلعي الحبوب ، فعلاً أكلت و بلعت الحبوب و بعدها طوالي رقدت عشان أنوم و فعلاً نمت....
لمن صحيت صحيت على صوت رغد و هي شغاله لي قومي خلاص المغرب قرب و نومة المغرب ما كويسه ، لمن فتحت عيوني قالت لي الصداع خفى ؟
قلت ليها اي ، قالت لي أبوي قال إنو الدكتور قال ليك لوز صحي ؟؟ قلت ايوه قال كدا ، المهم بعد صلاة المغرب جبت كتبي و قعدت اقرا عشان المسابقه ، ح تكون في 10 مواد ، المهم في اليوم البعدو لمن طلعنا عشان نمشي المدرسه ، لاقينا خالتو خنساء و أمها حاجه سعاد واقفين جنب الباب لمن سلمنا عليهم قالوا لي الدكتور قال ليك شنو ؟؟ قلت ليهو لوز ، خالتو سعاد قالت لي ربنا يديك العافيه يا بتي ، رغد قالت ليها ماشين وين يا خالتو سعاد ، خالتو خنساء ضحكت و قالت لينا أنا بتقولوا لي خالتو و أمي كمان بتقولوا ليها خالتو !؟😂
خالتو سعاد قالت ليها هسي أنا ما قدرك يا خنساء !؟ قالت ليها أمي خافي الله كيف يعني نحنا قدرين بعض ! فجأة كدا جا ولدها أواب مع أخوهو أمجد ، سلموا علينا و أواب قال لأمو أكيد متناقشة في نفس موضوع انكم قدرين بعض أو لا !! خالتو سعاد قالت ليهو بأمانه كدا يا أواب هسي أنا ما بتشاف أصغر من أمك ؟؟
قال ليها أكيد اصغر من أمي و أصغر مني انا ذاتي يا حبوبه ، لمن قال ليها كدا قعدنا نضحك ، قالت ليهو اوعك تقول لي يا حبوبه تاني ، خالتو خنساء ضحكت و قالت لينا أرح نوصلكم معانا ، نحنا ماشين الرياض عندنا بكى ، قلت ليهم أنا مدرستي في شارع تاني ، قالت لي ما مشكله بنوصلك معانا ، المهم أواب و حبوبتو ركبو قدام و أنا و أمو و رغد و براءه ركبنا ورا و أمجد و ياسر ركبوا في صندوق العربيه ، أصلا عربيتهم دبل قبين ، المهم وصلوا رغد و براءه اول شي و بعدهم ياسر و أنا آخر وحده ، نزلت و قلت ليهم شكراً ، المهم في اليوم دا الطابور علينا و كالعاده لين هي الح تقدموا ، المديره قالت ليها معليش يا لين بس ليه كل طابور بتقدميهو انتي ؟؟
قالت ليها لأنو كلهم بقولوا ما عايزين ، والله قدر ما أحنسهم عشان تطلع وحده بس و تقدم بدلي بقعدوا يتعززوا حتى الفقرات لو لاحظتي بطلعوا فيها ناس معينين و الباقين بتفرجوا بس ، المديره قالت ليها هسي قدميهو لكن الأسبوع الجاي يا أولى "أ" اتصرفوا و شوفوا ليكم نفرين تلاته كدا يقدموا الطابور غير لين و المعاها البطلعوا في الفقرات ، الإسبوع الجاي لو جات لين عصام و قدمت الطابور صدقوني الفصل كلو ح يتعاقب ، لين قالت ليها لو عندك مشكله في تقديمي ف هسي ما ح أقدمو و طوالي رجعت وقفت معانا ، المديره قالت ليها ما عندي مشكله في تقديمك و مشكلتي ما معاك انتي يا لين مشكلتي مع باقي الفصل البس بقيفوا و بتفرجوا زي ما قلتي ! المهم تعالي قدمي طابوركم و نشوف الأسبوع الجاي البحصل شنو ، المهم لين مشت و قدمتو براها مع انو الطابور بقدموهو اتنين أو تلاته ، المهم بعد ما دخلنا الفصل جانا أستاذ التاريخ و أدانا حصصو ، ساعة الطابور قلت ل ريما انتي شروق دي مالا معاك ؟؟ يعني سبب المشكله شنو بالظبط ؟؟
قالت لي عامله فيها زعلانه عشان أنا كنت بتكلم معاك و هسي هي عايزا تغيظني بناس تهليل ، قلت ليها اهااا يعني أنا سبب المشكله ! قالت لي ما انتي براها بتاعة حركات و حاسه اني بعتها رغم انو هي العملت كدا ، فجأه شفت شروق خاشه فصل تانيه ، أصلاً هي بتعرف بنات من تانيه ، قلت ل ريما أرح ليها ، قالت لي ما ماشه خليها تزعل تطرشق ، خليتها في مكانها و مشيت فصل تانيه و لقيت شروق قاعده مع شلة بنات ، قلت ليها يا شروق تعالي عايزاك ، صرت وشها و جاتني و قالت لي خير ؟؟!
قلت ليها اول حاجه عايزا اقول ليك إنو ريما لا باعتك لا يحزنون و أنا و هي ما صحبات و أساساً أنا ما بحب أصاحب زول لا ريما لا غيرها عشان كدا ما تخسرو بعض بسببي لأنو لا انتي لا ريما لا غيركم صحباتي ، أنا صحبة نفسي و بس ، و بالجد لو كنت عارفه انك زعلانه بسبب الحاجه دي والله من زمان كنت جيت و وضحكت ليك الحاصل ، انتي و ريما صحبات من زمان و مستحيل تبيعك عشاني و لو ملاحظه أنا ما مديا أي زول وش و عايشه مع نفسي و......فجأه كدا كل الفصل صنه ، لمن إتلفت لقيت أستاذ أحمد داخل بكتابو و طباشيرو ، قال لينا يلا يا أولى اطلعوا برا ، طوالي أنا و شروق طلعنا ، قلت ليها ريما قاعده هناك أمشي ليها و أنا طوالي مشيت الفصل ، المهم مرت الأيام و ريما و شروق اتصالحوا و أنا بقيت اتجنب الكلام معاهم و رجعت أقعد براي ، لحد ما مروا الأسبوعين و عملوا لينا مسابقه في المدرسه ل 12 بت و في الآخر اختارونا أنا و رهام و ريما و وشاح من فصل "أ" و وئام و أحلام من فصل "ب" طبعاً الطابور لمن جا دورنا قدموهو بنات غير لين ، المهم بقينا نجهز نفسي عشان نمشي للمسابقه الأكادميه الح تكون بين 6 مدارس و كل مدرستين ح يتنافسوا مع بعض و في الآخر حيكون في 3 مدارس ، حيتنافسوا اتنين و البفوز ح يتنافس مع المدرسه التالته ، لو فزنا ح نشارك في مسابقه على مستوى الأزهري و بعدها على مستوى ولاية الخرطوم ، المهم الأساتذه بقوا يراجعوا معانا نحنا ال6 كل يوم نهاية اليوم الدراسي ، قبل يوم من المسابقه المراجعه كانت على أستاذ أحمد ، طبعاً هو اليوم داك ما جا المدرسه بس المديره أكدت لينا إنو ح يجي في نهاية اليوم ، المدرسه فضت من البنات و ما بقى فيها زول غير أنا و ال5 بنات المعاي و المديره و الغفير ، كنا قاعدين معاها في المكتب و هي كبت لينا شاي و بقت تحفز فينا وبتقول لينا انا واثقه فيكم و بإذن الله حترفعوا راس المدرسه ، المهم بقينا قاعدين كدا لحد ما جانا أستاذ أحمد داخل ، سلم على المديره و قال لينا معليش اتأخرت عليكم ، قالوا ليهو ماف مشكله ، المديره فايزه قالت ليهو اقعد أشرب شاي و نحنا طوالي مشينا الفصل ، أول ما قعدت تكلت راسي في الكنبه ، ريما قالت لي انتي لسه ما بقيتي كويسه ؟؟ قلت ليها لسه رغم انو الأدويه خلصت بس ما حاسه بتحسن ، قالت لي امشي لدكتور تاني ، و نحنا بنتكلم كدا أستاذ أحمد جا ، كلنا كنا قاعدين قدام ، أنا و ريما و وشاح في كنبه و رهام و البتين الإسمهم وئام و أحلام في كنبه ، المهم أستاذ احمد بدا يراجع معانا و يشرح لينا ، شويه كدا جات المديره و قالت ليهو أنا ح أطلع يا أستاذ أحمد ضروري ، قال ليها تمام ما عندك مشكله ، المهم قعد يشرح لينا لحد ما بعد العصر ، قال لينا انتوا ساكنين قريب ولا بعيد ؟؟
رهام قالت ليهو أنا ساكنه الحي راقي و وشاح ساكنه جنب جامعة الرازي و الباقين ما عارفاهم ، ريما قالت ليهو أنا ساكنه هي و بيتنا بتمشي بالرجلين ، وئام و أحلام قالوا ساكنين ورا جامعة الوطنيه ، لمن عاين لي قلت ليهو ساكنه هنا ، المهم شرح شويه و لمن الزمن خلاص ضاع طلعنا صلينا العصر و هو ذاتو صلى و طلع معانا ، قال ل وشاح و أحلام و رهام و وئام أرحكم معاي مواصلاتنا وحده ، وشاح قالت ليهو ح تضطر تدفع لينا كلنا ، ضحك و قال ليها ما عندي مانع بس انتوا أرفعوا لينا راسنا....
ما عارفه ليه اتغظت شديد لمن ضحك مع وشاح و بقى يهظر معاهم ! حسيت إنو هو ما لازم يتكلم مع غيري أو يضحك معاهو ، ما كنت عارفه داك اسمو شنو بالظبط بس بالجد ساعتها كنت حاسه انو أستاذ أحمد دا ما مفروض يتكلم مع بت غيري ، مشيت من جنبهم من دون ما أقول ليهم مع السلامه ، يعني انسحبت و مشيت البيت و أنا عايزا أطق من الزعل ، طبعاً لقيت رغد غسلت بدلي الملابس و كوتهم ، لمن غيرت ملابسي قلت ليها عليك الله غسليهم لي و أكويهم بكرا ماشين عندنا مسابقه ، قالت لي ياخ ما قادره ما كفايه اني غسلت بدلك و كويت !!؟
قلت ليها أصلك كلبه و عديمة إحساس ، قالت لي شكراً ، براءه قالت لي بغسلهم ليك أنا لكن بعد ما انتهي من الكتابه ، قلت ليها عسل انتي لكن خليهم بغسلهم براي و فعلاً غسلتهم و صليت المغرب ، رغد ك عادتها ماسكه التلفون و بتتصفح فيهو ، على بال ما الملابس تنشف رقدت شويه و في رقدتي ديك نمت ، لمن صحيت لقيت رغد كوت لي ملابسي و ختت لأبوي الأكل ، قمت صليت العشا و مشيت جبت شنطة ياسر و فتشتها ليهو لقيت آخر درس كاتبو في كل كراساتو قبل أسبوع و في بعض الكراسات قبل اسبوعين بمعنى إنو ما قاعد يكتب !! ناديتو و قلت ليهو ليه ما قاعد تكتب يا ياسر !!؟
قالت لي لأنو ما أدونا حاجه اكتب ليك من راسي يعني ؟؟
قلت ليهو بطل لئامه و ما تحاول تكذب علي ! ما بتكتب ليه فهمني !!؟
قال لي قلت ليك ما قاعدين يكتبونا ، قلت ليهو بكلم ليك أبوي يا ياسر أحسن تنعدل ، قال لي يااااخ هي حاجه قاعده في الكتاب ف ليه يخلونا نكتبها !!؟
قلت ليهو ياسر عليك الله حاول تتعب شويه في القرايه عشان نساعد أبوي ، انت ما عايز تبقى دكتور أو مهندس ولا شنو ؟؟
قال لي ابقى دكتور ليه عشان بكرا لو مات زول يسجنوني أنا ؟!!
بالجد كلامو ضحكني رغم استهتارو !
رغد قالت ليهو أبقى مهندس خلاص ، قال ليها عشان العماره تقع في الناس بسببي ، أبوي جا و قال ليهو يعني انت واثق من فشلك في كل المهن !!؟
قال ليهو أنا عايز ابقى بتاع خرد بس ، رغد قالت ليهو عشان يجيك بتاع عربيه يشوتك انت و حمارك هنااااك مش ؟!!
ضحكنا ضحك على كلامها ! ابوي خلى ياسر يقعد بالغصب عشان يقرا و أنا رجاله شرحت ليهو الحاجات البعرفها ، المهم زي الساعه 10 كدا أنا و رغد كنا بنحضر و أبوي راقد برا و ياسر و براءه ناموا ، لمن زهجت من التلفزيون قلت ل رغد أديني التلفون عايزا اخش صفحتي ، طبعاً مره قلت عايزا اتكلم انجليزي و خليت رغد تعمل لي صفحه في الفيس و كنت خاشه فيها قروبات بتاعة انجليزي و اقوال أدبيه و تاني طولت ما دخلتها ، قالت لي صفحتك أنا نسيت كلمة سرها انتي متذكراها ؟؟
قلت ليها لا ما متذكراها و أصلا انتي العملتيها لي أنا لا بعرف كلمة سر لا غيرو و الفيس دا ذاتو كما انتي وريتيني ليهو ما كنت عرفتو ، قالت لي خلاص ما مشكله بعمل ليك صفحه تانيه و فعلاً عملتها لي في نفس الوقت و أنا عشان كنت هبله و غبيه و ما بعرف حاجه في التلفون انبهرت فيها و قلت ليها بقيتي خطيره و كلو عشان عملت لي صفحه ، في الوقت داك كنت شايفاها حاجه صعبه شديد و البعرفها دا عبقري....
عملت لي الصفحه و عملت لي إضافه في القروبات العايزاها ، المهم في اليوم البعدو مشيت المدرسه بدري ، لقيت المديره قاعده ، ضحكت و قالت لي دا حماس ولا خوف ؟ قلت ليها الإتنين ، المهم قالت لي ح نتحرك من المدرسه الساعه 8 و المسابقه 8 و نص ، المهم بعد شويه كدا الناس جات ، قالوا ح يمشي معانا استاذ بكري و أستاذه تيسير و أستاذ أحمد ، طبعاً بقيت انبسط لمن هو يكون موجود ، يعني حضورو عندو أثر واضح ....
المهم جابوا لينا عربيه ، أنا و ريما و رهام ركبنا ورا و الباقين اتوزعوا في الكراسي القدامنا ، ناس تانيه ذاتم كانوا معانا ، المهم لمن وصلنا المدرسه المتكون فيها المسابقه أستاذ بكري قال لينا قبل ما ندخل ، عايزا اقول ليكم إنو المدرسه مدرستهم و الجمهور جمهورهم بس ما تخلوا الحاجه دي تأثر عليكم حتى لو ما كان معانا مشجعين ، المهم دخلنا المدرسه و استقبلونا أحسن استقبال و ضيفونا بارد و كيك ، لمن جا زمن المسابقه ودونا لمساحه كبيره في طرف المدرسه و كل المدرسه جات اتجمهرت ، ختوا كراسي المعلمين قدام و نحنا ختوا لينا تربيزتين في النص ، وحده لينا و التانيه ل طلاب مدرستهم الح يتنافسوا معانا ، طبعاً مدرستهم كانت مختلطه و المنافسننا بنات و أولاد ، اول شي عملوا مسابقة ناس الصف التاني و كانت تعادل و الزمن خلص ، ف قالوا خلاص ناس أولى حيكسروا التعادل دا ، طبعاً لو كانوا تانيه فازو عليهم و نحنا كمان كدا بإعتبار اننا كسبنا الجوله كلها و انو المدرسه الخسرت دي ما ح تتنافس مع مدرسه تانيه فلو تاني اتعادلنا معاهم كدا ح يشاركوا تاني و يلعبوا مع مدرسه غيرنا ، المهم بدت المنافسه 5 اسئله من كل ماده ، ما بنكر إنهم كانوا شاطرين شديد و زينا جاوبوا على كل الأسئلة و كل ما نقول سبقناهم في الدرجات نلقاهم لحقونا ، للحظات حسيت إننا ح نخسر ، لمن اتعادلنا كان باقي سؤال واحد ، البضغط على الزر أول هو الح يجاوب و اذا الجواب غلط ح يفوز الفريق التاني و دا الوترنا لأنو الأسئله في البدايه كانت عباره عن سؤال لينا و سؤال ليهم ، السؤال كان في الفيزياء و أدونا مسأله صعبه عشان نحلها ، رهام و وشاح و ريما قعدوا يعاينوا لي ، قالوا لي الفيزياء دي مادتك انتي ، بقينا نعاين في المسأله و أنا ثقتهم فيني موتراني ، لمن عاينت لأستاذ أحمد عمل لي حركه بمعنى اني اتنفس و أروق شويه و ما أتوتر ، مسكت القلم و بقيت اكتب و هم بساعدوني في تطليع المعطيات ، المسأله كانت مكونه من تلاته مراحل ، لمن استوعبتها بقيت بكتب بسرعه و بفكر بطريقه سريعه لحد ما كتب القوانين و باشرت الحل و الأرقام كانت كبيره و مفروض نضربها من دون ما نستخدم حاسبه ، ريما إتوترت و بقت تقول سرعه سرعه ديلك شكلهم ح يضغطوا الزر و بقوا ينقوا فيني و يشتتوا تفكيري ، رهام قالت ليهم اسكتوا ياخ خلوها تضربهم سرعه ، استخدمت القسمه بالمنفله و بعد ما حصلت على الناتج تاني ضربتو و فجأه ضغطت الزر ، كل الأنظار إتوجهت علينا ، وشاح قالت يا رب يكون حلنا صاح ، استاذ بكري و استاذه تيسير و أستاذ أحمد حسيتهم حابسين انفاسهم و قلوبهم واقفه ، عاينت للمشرف على المسابقه و قلت ليهو الإجابه هي 3346.7 متر/ث ، أخد نفس عميق و عاين في الورقه العندو و قال للأسف الإجابة....صحيحه...
مع جملتو دي قعدنا نصرخ و نضم في بعض ، و عاد بنات تانيه ديل عملوا عمايل ، أستاذه تيسير جات ضمتنا وحده وحده و قعدت تزغرد ، استاذ بكري قال لينا والله متكيف منكم شديد و كنت واثق فيكم ، أستاذ أحمد ابتسم بس ...غاظني شديد ، المهم طلعنا و مشينا ركبنا و أول ما العربيه إتحركت بنات تانيه قعدوا يغنوا و يزغردوا ، و يقولوا ألف ثقه منو البغلبا ، أستاذه فايزه هي المدربه 👏👏
استاذ بكري قال ليهم يعني أنا و باقي الأساتذه نكرتونا حطب و مسكتوا في مديرتكم ! وحده قالت ليهو اعمل حسابك يا أستاذ عشان الكلام ما يصلها ، ضحك و قال ليها كنت عارف انو في خونه مندسين معانا....
المهم لمن قربنا من المدرسه وشاح قالت ليهم اسكتوا يا بنات خلونا نمقلبهم ، نزلنا من العربيه و دخلنا المدرسه و نحنا عاملين فيها زعلانين ، كل البنات و الأساتذة جونا طالعين ، المديره جات و قالت لينا ما مشكله الهدف المشاركه و ليس الفوز و.....البنات قاطعوها و قعدوا يصرخوا و يقولوا فزنااااا ، مع جملتهم دي كل المدرسه جات جاريه علينا ، أنا إنسحبت براحه و مشيت الفصل و قعدت هناك ، حسيت نفسي تعبانه و جسمي بقى نار بس ف طوالي تكلت راسي في الكنبه و نمت ، ما صدقت متين اليوم خلص طبعاً المديره و المعلمين شكرونا قدرتهم ، المهم لمن وصلت البيت و قبل ما أدخل كدا أواب جا طالع من بيتهم ، بعد ما سلم علي قال لي أخوانك قاعدين جوه و كان عايز يتكلم تاني بس براءه جات و قالت لينا نحنا هنا تعالي معانا ، قلت ليها فترانه يا براءه و عندي حمى ! أواب قال لي انتي مش قبل فتره ودوك الدكتور ؟؟
قلت اي لكن من دون فايده لأني ما حاسه بتحسن ، قال لي طيب مدام كنتي ما حاسه بتحسن كنتي تتكلمي !
قلت ليهو أه كلها حمى و بكرا بتروح ، فجأه اخوهو أمجد جا طالع ، قال لي مبروك الفوز علينا ، قلت ليهو شنووو ؟؟! قال لي المسابقه كانت في مدرستنا ، شفتك قبيل ، طلعتي شاطره و حفاره ، أواب قال ليهو قايلها زيك !! قال ليهو هسي أنا مالي ؟؟ قال ليهو انت دلوكه ساي ، قال ليهو لو أنا دلوكه فإنت قربه مقدوده ، طبعاً قعدت أضحك على كلامهم و بعدها دخلت البيت و مشيت إنجدعت على السرير حتى هدومي ما غيرتهم ، كنت مسخنه شديد و في نفس الوقت ما قادره اقوم استحمى و عيوني ديل خلاص بقيت ما قادره أفتحهم أصلا من قبيل بقاوم في المرض و بحاول أصحصح في المسابقه بس هسي ما قادره عديل ، شويه كدا رغد و خالتو خنساء و براءه جوني داخلين ، خالتو خنساء ختت يدها على جبيني و قالت لي حرارتك مرتفعه شديد ! يا بتي ساكته مالك انتي !؟ دي حمى بسكتو بيها !!؟
رغد قالت ليها مها دي طولت و هي عيانه! يعني أول مره تمرض لمده طويله كدا ، خالتو خنساء قالت لي أرح هسي دي بوديك الدكتور ، بالجلاله قدرت أقوم و أجهز نفسي ، رغد قالت ليها ح اتصل أكلم أبوي ، قالت ليها لا خليهو بعد نمشي و نجي عشان ما يقلق ساي ، انتوا امشوا اقعدوا في بيتنا ، أمي قالت جايه اقعدوا معاها ، المهم طلعت معاها و أواب هو الوداني المستشفى ، خالتو خنساء كانت بتسألني الواجعني شنو فقلت ليها معظم الوقت بكون مصدعه و تعبانه و بحس راسي عايز يتشق من الصداع ، أواب قال ليها ممكن نعمل ليها صوره للراس ، الوقت داك كنت متكله في خالتو خنساء و من جواي ما عايزا أكلفهم معاي ، قلت ليها بصوت تعبان لا يا خالتو ما عايزاكم تعملوا لي حاجه ، أواب قال لي انتي اسكتي ماف زول أخد رايك ، المهم قابلنا الدكتور و حكيت ليهو و عمل لي كذا فحوصات منها فحص الدم و صوره للراس ، قالوا لينا النتيجه ح تتأخر ، قعدنا منتظرنها بالساعات لحد ما طلعت ، و ديناها للدكتور ، قعدنا قصادو و بقينا نعاين ليهو و منتظرنو يتكلم ، عاين في الفحوصات مسافه و بعدها قال لينا غريبه !!
أواب قال ليهو في شنو ؟؟
قال ليهو الفحوصات كلها نضيفه !!
خالتو خنساء قالت ليهو كويس طيب نعمل ليها فحوصات لحاجه تانيه مدام ديل طلعوا نضيفات و الحمدلله ماف حاجه في الراس ...
فعلاً تاني عمل لينا فحوصات كتيره الزمن اتأخر و النتيجه طلعت الساعه 10 مساء ، تاني لمن مشينا للدكتور و شاف الفحوصات ، قال لينا برضو نضيفه !! دي حاجه بتحير !! أواب قال ليهو فهمني بس كيف يعني الفحوصات نضيفه ! يعني هي بتكذب مثلاً؟؟
قال ليهو ما عارف بس انا علي بالحاجه الظاهره قدامي و دي الفحوصات الواضح فيها إنو هي ما عندها شي ، قلت ليهو لكن أنا هسي مصدعه ، خالتو خنساء قالت ليهو و جسمها سخن كمان ، الدكتور لمس يدي و قال ليها فعلاً !!
بس الفحوصات بتثبت إنو ماف شي !!
كتبت لي اسم مسكن قوي للصداع و قال لي ان شاء الله الصداع ح يروح ...
المهم لمن رجعنا البيت لقينا أبوي و عمو سليمان راجل خالتو خنساء واقفين جنب الباب و أبوي واضح إنو كان مقلق ، أول ما نزلنا عمو سليمان قال لأواب انا من قبيل بتصل عليك ما بترد ليه؟ لا انت لا أمك قلقتونا على البت ! خالتو خنساء قالت ليهو أنا تلفوني خليتو في البيت ، أواب قال ليهو و أنا تلفوني نسيتو في العربيه و لمن انتبهت لمكالماتك الوقت داك كنت سايق فقلت لمن نرجع ح أوريكم الحصل ، قال ليهو طيب على الأقل كنت تتصل علي أو على حبوبتك عشان ما تقلق بالناس ساي ! هسي عمك دا من قبيل واقف على حيلو و خايف على بتو !! أواب قال ليهو معليش يا عمي و حقك علي ، ابوي قال ليهو ماف مشكله حصل خير المهم الحصل معاكم شنو ؟؟

طبعاً كلهم بقوا متحيرين و أي واحد يعاين للتاني !!
عمو سليمان قال كيف يعني كل الفحوصات نضيفه !! طيب ممكن نمشي مستشفى غيرها ، خالتو خنساء قالت ليهو كلنا مستغربين...
المهم قعدنا معاهم زي نص ساعه كدا بعدها مشينا البيت ، أبوي جا فتح الدولاب و طلع جزلانو و قعد يحسب في قروشو ، قايلاهو عايز يوديني بيهم لمستشفى تانيه ، كنت عايزا اقول ليهو المسكن دا ح ينفعني و ماف داعي نمشي المستشفى عشان ما أزيد ليهو همومو بس هو سبقني و قال لي هسي القروشي ما بتكفي عشان ندي الناس ديل حقهم ! مع انهم ما شاوروني لمن ودوك المستشفى و عملوا الفي راسهم ، هسي أنا أجيب ليهم قروش من وين عشان أرجع ليهم حق كل الفحوصات العملوها !!
سكته ساي و غمضت عيوني و إتلفت على الحيطه....