ذو التيجان 👑مكتملة👑

👑الجزء 61👑

هز راسو تكا على كف يدو شاف فيها  وشاف  اضائة النار فعيونها العسلية وقال
انا عمرني تمنيت نكون سلطان ولا امير ..ماشي من حقي نختار؟
تنهدات قالت ليه نتا تايه..نتا تااايه ومزال مالقيتي راسك…باغي تعيش حر وفنفس الوقت متأثر بشخصية الاصيل وبغيتي تكون بحالو..  نقولو بغيتي تكون حر ..ربي بغاك تكون ملك..بغاك تتول د امير وتعيش سلطان ..الله اللي عطاك الجاه وعطاك السلطة..واخا تحاول تهرب ..جمع بين السلطنة والحرية ..  تعطاتك فرصة  من ذهب ..وخاصك دير يدك فيد السلطان الاصيل ..مهما كان كيبقا باك ..قولي بصراحة واش عمرك تمنيتي لو كان باك؟ ..حيت انا تمنيت كن كا با فاش كنت فالقصر عندو
بقا ساكت كيشوف فيها مطولا وقالت ليه  الى كانت مك نسات وسامحات.. علاش حتى نتا ماتنساش ؟! الى كان الاصيل باغيك ..حيت واضح التقرب ديالو منك انه متقبلك كإبن ..وعاطيك مكانة خاصة فقلبو ..
تنهدات وقالت ليه بعد المرات الحقيقة كتكون مرة ..وحارة وتقيلة على اللسان..قد ما طولات فاللسان كتبني جدور وعروق وكيصعاب علينا نطقو بيها.. الاصيل باينة تبدل حيت الوقت كله اللي  عشت عندو ماشفت منو غير الخير..ويقدر كان طايش فوقتو والانسان ماحدو كيكبر كيزيد يتبدل ..من الاحسن ماديرش شي حاجة تندم عليها امولاي وفكر قبلماتخطى خطوة انه ارواح ابرياء فرقبتك..فكر فيهم قبل من ما تفكر فراسك
قاليها عمرني مغنسمح ليهم واش حاسة باش كنحس؟؟
شدات ليه فوجهه قالت ليه حاسة بيك..حاسة بيك وتقدر ماتسامح ولاكن مادخلش البلاد فهادشي ..خلي المشاكل بيناتكم بلا مدمرو معاكم ناس ابرياء ..خاصك ترجع للقصر  وماتعاودش تفكر تنازل على السلطة ..حيت الى تنازلتي عليها واحد اخر  مستاعد يهزها ..ساعتها لا نتا ولا انا ..ولا مك ولا كاع اللي فالقصر واللي عزاز عليك غنكونو تحت الرحمة ديالو ..ويقدر فينا اللي بغا ونتا كتشوف..ديك الساعة غتعرف العقاب الاكبر اللي مستحيل تصبر ليه  ..عمرك تفكر تنازل على السلطة..نتا ماشي ولد صغير نتا دابا نضجتي ماشي فمراحل البلوغ باش تسنى شي واحد يوريك شنو دير . نتا سلطان..سلطان وهاد الهبة  مكتعطاش لأي كان .
بقا ساكت كيفكر فكلامها وتكا على الشجرة ساهي فديك العافية ..نعسات حطات راسها على رجلو قالت ليه فكر فكلامي امولاي..كولشي بين يديك نتا بيدك تهزنا ونتا بيدك تحطنا
تنهدات سدات عينيها نعسات وبقا السلطان فايق كيفكر حتى داه النعاس على الشجرة ..صبح الحال وصبحات روح الندى فبيتها مريضة .. وجهها اصفر والنعمة مكدوزش ليها.. اما حكيم من بعد ما ناض من الضربة ومالقاش اللي يسير البلاد ومخططاتو فحمايتها فشلات  مابقا ليه حل من غير يرسل للسلطان  سلطان اللي مباشرة حضر لغرناطة فاش قرا الرسالة  ومن غير ما يعرف بالحقيقة اللي خفا عليه حكيم حيت امر متعلق بالسلطان ..امر سلطان بحصار قرطبة من قبل الجيوش وخرج بنفسه معلنا الحرب على السلطان يور ..ووقف برا  القصر من بعد ما طوقو المدينة كلها منعو الحركة وحبسو الكل فبيتهم وبقاو غثر الجنود منتاشرين..كان سلطان كيضن ان يور لداخل فالقصر..ورسل رسول لداخل قايلو ذو الفقار  اللي خفا غياب السلطان يور خوفا من الهجوم على القصر وكان كيرد فمكان يور كأنه موجود على الاقل يربح شوية. الوقت ..اما الحريم فسدو عليهم فجناحهم والخدم خداو الحذر ديالهم والكل مخلوع والقصر مهزوز..
وسط هاد الحرب اللي نايضة رجع السلطان يور وجنبه يمامة على الفرس.. قبل ما يقرب من المدينة لاحظ كثرة الجنود   والمدافع قدام اصوار المدينة وراية غرناطة مرفوعة فالسما وفهم ان الحرب تعلنات عليهم والقصر والمدينة محاصرين وحتى الجيش محاصر لداخل.تلفتات يمامة حلات عينيها مخلوعة قالت ليه هادا مناش خفت امولاي..كن زطتي تعطلتي بتفكيرك منت غتلقا غير اثار المدينة
وقف يور  على وجهه وشاح والريح بحال العجاج كان نايض فداك النهار ويمامة دايرة القب على راسها وعليها سلهام كحل مطروز برموز ذهبي حتى للارض ..  كيشوفو فداك الجيش من اعلى تلة وفدوك المدافع المتوجهة جهة اصوار المدينة ..قالت ليه مك والحريم ديالك والجيش كامل لداخل امولاي.. القوة دابا ماعندهاش باش تنفعك يقدرو فأي لحضة يضربو المدينة ولا يدخلو على القصر
زير على قبضة يدو قاليها خاصني نوقف هادشي قبل ماتبدا الحرب
خليك هنا بعيدة على المدينة ..انا عندي جيش فيه ميات واحد وكل واحد بمية راجل اخف من البرق
حركات راسها بالنفي قالت ليه فكر مزيان فشنو خاصك دير.. ميات واحد شنو غادي دير بيهم ؟
عقد حجبانو قاليها كما محاصرين المدينة غنحاصروهم من اللور بالسهام مغنخليو حتى واحد فيهم حر
قالت ليه وشكون ضمن ايك هاد الخطة غادي تنجح ..والوقت اللي غتخاصروهم يستنجدو بجنود اخرى من غرناطة ويرجعو يهجمو على القصر..انا قريت القانون فبلاد السلطان الاصيل..قريت على سيايستو للبلاد..عندو ثلات اقسام فالجيش.. قسم الجنود الضوئية واللي هما هادو كيواجهو مواجهة عادية ..وعاد ماشي كاملين جايبين غير جزء منهم..وقسم السيف القاتل اللي مدرب تدريب خاص بفن محترف وكيتكون من عشرين الف مقاتل.. والقسم الاخير  اشباح الليل ..اللي متعرفهم منين خرجو ليك وهما متخصصين فصنع المكائد   وكيتقننو فن الصيد للفريسة بكل سهولة .. يعني ماعندكش كيفاش دير والحرب ماخصاهاش تنوض..ماشي لصالحك ..ماتنساش باللي اللي قدامك خوك دابا ماشي عدوك ..
تلفت قاليها وشنو اللي خاصني ندير؟ مكاينش حل اخر من غير نواجهه واخا يكون خويا ..هوا جاي يحارب خوه وانا ماغاديش نحني ليه الراس
تنهدات كتشرف فداك الخشد قالت ليه يمكن معارفش؟ ولا  يقدر يكون عارف وجا يضرب عصفورين بحجر واحد..ينتاقم لباه ويمحي  ليك الاثار ..ماتنساش دابا راك كتشكل خطر كبير عليه وعلى الولاية ديالو من بعد..يعني حلم السلطنة تبخر  عند الامير وخاصك ترد بالك منو ..هوس السلطة كيقتل امولاي
تلفت قاليها وشنو الحل؟ نفضي هاد الروينة بلا منسيل الدم؟ واخا الدم غادي يسيل  والى تهدنات دابا غتنوض مرة اخرى
هزات راسها كتشوف فالامير سلطان اللي كان فالواجهة على عودو كيمشي ويجي ويشوف فاسوار المدينة وقالت ليه  بتمعن
شد راس الافعى ..الى شديتي راس الافعى غتتحكم فالديل واخايكون كبر منك .اما الى شديتي الديل غادي تلوى عليك وتخنقك 
صغر عينيه كيتأمل فالجيش ويستوعب كلامها وحرك ليها راسو بالايجاب قاليها الله يسلم ليا دماغك الذهبية هادي ايامامة
تبسمات  هازة حاجبها كتشرف فالامير وقالت ليه  بمجهود قليل غتقضي على حرب كبيرة .. شد الامير سلطان واسره عندك ..خليهم بلا قائد تالفين خايفين ..وغادي يخضعو ليك من الصغير للكبير  ..الى طالبوك بفدية ولا ساوموك ماتعطيهمش الامير ..خاصو يبقا تحت يدك حتى يفيق الاصيل..اما الى سلمتيهم الامير فعول على حرب خت هادي غادي تصيبنا منهم مادام السبطان اصيل طريح الفراش..هاكا غادي تسيطر على غرناطة من اولها لاخرها
تلفت قاليها والى ماصحش السلطان؟ ومات ؟
شافت فيه قالت ليه ديك الساعة غتسلم ليهم الامير..ولاكن ماشي كامل..غير راسو ..
تلفت قاليها راسو؟!!!!
حركات ليه راسها قالت ليه راس واحد اللي غيبقا ..يا راسك يا راسو ..حيت راس واحد اللي غيبقا بغيتي ولا كرهتي..ماتناس امولاي راك ولد الاصيل ..والاصيل عندو ولي العهد دابا ..والعرش كيبغي واحد ماشي جوج .نتا قدام اكبر حرب تقدر تخوضها فحياتك .. .. يا اما نتا وحاشيتك.. يا إما الامير سلطان وحاشيتو ..هادا علاش فطر بيه قبل ميتعشا بيه واسرو عند وماتخليش الغبار ينوض